1-2. Oshike hatu dulu okuninga, opo tu ungaunge nomaupyakadi etu? (Tala yo efano.)

 MBELA oto ungaungiwa naave shihe li pauyuki, oto patanekwa kovapambele voye, ile oto hepekwa omolweitavelo loye? Mbela oto lididimikile okuhe na oukolele, ile ounamido? Ile mbela oto ungaunga nonghalo i ehameka, tashi dulika wa filwa umwe oo u hole? Ngaashi eedi daJehova dihapu, otashi dulika u ‘yadi omaupyakadi nowa nyika oluhodi’ monghalamwenyo yoye. — Eps. 90:10.

² Opo tu ungaunge nawa nomaupyakadi etu, otwa pumbwa okukala tu na etaleko liwa. Osho osha kwatela mo shike? Natu shi faneke ngaha: Omaupyakadi oo wa taalela monghalamwenyo okwa fa onghalo yonhumba oyo tashi dulika u shakeneke, ofimbo to shingi. Ngeenge omakende otuwa yoye okwa kaka, ito ka dula okumona osho shi li mopate. Ashike ngeenge okwa yela, oto ka shiiva kutya ondjila ilipi to ka longifa. Sha faafana, opo tu ungaunge nawa nomaupyakadi etu, otwa pumbwa oku a tala ko ngaashi Jehova he a tale ko. Moshitukulwa eshi, ohatu ka kundafana (1) nghee hatu dulu okukala tu na etaleko liwa li na sha nomaupyakadi etu, (2) nghee etaleko lii li na sha nonghalo yetu tali dulu oku tu ehameka nosho yo (3) eenghatu dimwe odo hatu dulu okukatuka, opo tu kale tu na etaleko liwa, ngeenge twe lihange momaupyakadi.

OKUKALA NETALEKO LIWA LI NA SHA NOMAUPYAKADI

3. Omolwashike itatu dulu okuhenuka omaupyakadi?

³ Itatu dulu okuhenuka omaupyakadi mounyuni ou wa kolokosha. Atushe ohatu hangika komaupyakadi, molwaashi inatu  wanenena notu li mounyuni tau pangelwa kuSatana. Natango, eshi ounyuni ou tau ehene pexulilo, ohatu ka shakeneka nokuli omaupyakadi mahapu, kutya nee oyoo opaushitwe, ile oyoo a etifwa kovanhu, novanhu vahapu otava ka mona oixuna omolwoinima ii oyo tai ningwa kuvamwe. (Mat. 24:8; 2 Tim. 3:13) Ngeno Jehova okwa kandulile po omaupyakadi aeshe oo paife, ngeno okwa fa ta longele kumwe naSatana. Mounyuni ou, itatu dulu okuhenuka ‘oshiponga.’ — Omuud. 9:​12, esh.

4. Ovakriste ova taalela vali omaupyakadi elipi?

⁴ Ohatu mono oixuna, molwaashi ohatu dulika kuJesus. Luhapu Jesus okwa li ha lombwele ovahongwa vaye kutya otava ka hepekwa omolweitavelo lavo. (Mat. 24:9; Joh. 16:2) Okukala tu shii oshinima osho, otashi tu kwafele tu henuke okukala tu na eitavelo tali tengauka, ngeenge hatu hepekwa. (1 Tes. 3:​3, 4) Ngeenge hatu lididimikile omayeleko, molwaashi tu na eitavelo la kola, ohatu dulu okukala noushili kutya natango otu li mondjila oyo tai twala komwenyo waalushe. Shikwao vali, ohatu ulike kutya otwa hoolola okulongela Jehova, molwaashi oku li omupangeli a denga mbada nosho yo kutya Satana omunaipupulu. Satana okwa nyateka edina laKalunga, eshi a popya kutya ovanhu ohava longele Kalunga omolwokuliholamwene. Onghee Satana oha ponokele ovapiya vaJehova, opo a ulike kutya itava dulu okukala ovadiinini, ngeenge ve li moupyakadi. (Job 1:​9-11) Ohatu hafifa Jehova ngeenge hatu lididimike, molwaashi otu mu hole. — Omayel. 27:11.

5. Oshike hatu lihongo mOmuudifi 7:​13, 14? (Tala yo omafano.)

⁵ Jehova oha efa tu pite momaupyakadi. Jehova ke fi omukwanyanya, noihe tu ningile oinima ii. (Jak. 1:13) Ashike ohamba Salomo oya shanga kutya ‘efiku loudjuu’ oli li “oilonga yaKalunga kashili.” (Lesha Omuudifi 7:​13, 14.) Ovelise oyo oya popya ya yukifa kuJehova a fa ngeno ta ningi oshinima, ofimbo paulelalela ha efa shi ningwe. Salomo okwa yandja omayele mawa oo taa dulu oku tu kwafela tu kale tu na etaleko liwa li na sha nomaupyakadi etu. Tete, otwa pumbwa okudimina kutya ohatu ka kala tu na omafiku mawa nomafiku mai mounyuni waSatana, molwaashi inatu wanenena. Ngeenge tu li “mefiku liwa,” ohatu dulu okuulika olupandu omolwouwanghenda waKalunga nokutala ko efiku olo li li oshali ya dja kuye. Shitivali, Salomo okwe tu dimbulukifa kutya itatu dulu ‘okushiiva keshe osho hatu ka ningilwa,’ kutya nee efiku otali tu endele nawa, ile onai. Omuyuki nomuhenouyuki aveshe otava dulu okuhangwa komaupyakadi ombaadilila.

6. Omolwashike Jehova ha efa tu hangike komaupyakadi? (Ovaheberi 12:​7, 11)

 ⁶ Ngeenge otwa kala tu na etaleko liwa li na sha nomaupyakadi etu, ohatu ka mona kutya Jehova ote tu hongo tu kale twe mu lineekela, ponhele yokulineekela mufye vene. Jehova oha yandje alushe elitulemo kufye, ha kala a nyika oluhodi, ngeenge hatu mono oixuna nokwa hala oku tu kwafela. Nokuli nongeenge a efa tu ye “molufilu mwa laula fokofoko,” oha twikile oku tu wilika, oku tu shilipaleka kutya oku tu hole noku tu pa eenghono odo twa pumbwa, opo tu lididimike. (Eps. 23:4) Omaupyakadi otaa dulu yo oku tu kwafela tu didilike mo omaunghundi etu, nokekwafo laKalunga tu xwepopaleke omaukwatya etu. (Lesha Ovaheberi 12:​7, 11.) Pashihopaenenwa, Job okwa li a pumbwa okukala omulininipiki. Jehova haye a li a etela Job omaupyakadi, ashike okwa efa a ningwe nokwe a longifa, opo Job e lihonge oilihongomwa ya fimana. (Job 42:​1-6) Kashi na nee mbudi kutya ohatu piti momaupyakadi a tya ngahelipi, otu shii kutya keshe osho Jehova a efa shi ningwe itashi ke tu etela ouyehame fiyo alushe. Ngeenge otwe lididimikile omaupyakadi, ohatu ‘ka findana filufilu.’ — Rom. 8:​35-39.

7. Omolwashike to dulu okukala wa hafa, nonande oto hepekwa omolweitavelo loye?

⁷ Ohatu dulu okukala twa hafa, nonande ohatu hepekwa. Ngeenge oto hepekwa omolweitavelo loye, ino fika pexulifodiladilo kutya Jehova ite ku kwafele. Ponhele yaasho, dimbuluka kutya oto hepekwa, molwaashi oto dulika kuJehova nokwe ku hokwa. (Mat. 5:​10-12) Ngeenge owa kala u na etaleko liwa, oto ka kala wa hafa nowe lifimaneka, eshi to hepekwa molwaashi u li Omukriste, ngaashi ashike ovayapostoli va li va hafa. (Oil. 5:​40-42) Shikwao vali, otashi dulika u kwafele ovo vehe fi Eendombwedi ve lihonge oshili ‘nokufimanekifa Kalunga.’ (1 Pet. 2:12) Ngaashi Josef, Jehova naye ota dulu oku ku kwafela, ngeenge u li momaudjuu, ndele hakonima ashike ngeenge a pita po. — Gen. 39:​3, 23.

8. Oshike vali tashi dulu oku tu kwafela tu kale ovadiinini, nokuli nonande ohatu mono oixuna?

⁸ Omaupyakadi etu otaa ka xula po. Oshimoniwa shaJob otashi tu dimbulukifa kutya omaupyakadi etu otaa ka xula po. “Jehova okwa nangeka noupuna okukalamwenyo  kwaJob kwaxuuninwa ku dulife kwopehovelo.” (Job 42:12) Sha faafana, Jehova okwa undaneka okunangeka noupuna ‘okukalamwenyo kwoye kwaxuuninwa’ ku dulife kwopehovelo, oko ku yadi omaupyakadi. Itatu ka hafela tuu omanangeko noupuna, ngeenge otwe lididimike fiyo okexulilo! — Mat. 24:13.

NGHEE ETALEKO LII TALI DULU OKU TU EHAMEKA

9. Ongahelipi okukala netaleko lii li na sha nomaupyakadi etu tali dulu oku tu ehameka?

⁹ Kashi na nee mbudi kutya otwa taalela omaupyakadi elipi, otwa pumbwa okukala tu na etaleko liwa li na sha nao, opo tu henuke okulietela omaupyakadi fye vene. Pashihopaenenwa, otashi dulika tu kale tu udite kutya Jehova oye e tu etela omaupyakadi. Oule wokafimbo, Job okwa li e udite kutya Jehova oye e mu etela omaupyakadi, netaleko olo lii ola li le mu ningifa a kendabale okuulika kutya ye “oku li mondjila e dule Kalunga.” (Job 32:2) Sha faafana, potete Naomi okwa li a pa Jehova ombedi. (Rut 1:​13, 20, 21) Ngeno Job naNaomi ova kalele ashike netaleko lii, ngeno ova nyona po ekwatafano lavo naJehova. (Omayel. 19:3) Ashike Jehova okwa li e va kwafela va kale ve na etaleko liwa li na sha nomaupyakadi avo, nokwe va nangeka noupuna omolwoudiinini wavo.

10. Ngeenge tu li momaupyakadi, otashi dulika tu diladile shike?

¹⁰ Nonande otu na oushili kutya Jehova haye he tu etele omaupyakadi, otashi dulika tu hovele okulipula ngeenge natango oku na ngoo ko nasha nafye. Etaleko lii la tya ngaho otali dulu oku tu teya omukumo. (Omayel. 24:10) Ohamba David nosho yo omuprofeti Habakuk ova li va taalela omaupyakadi, nomafimbo amwe ova li have lipula, ngeenge Jehova oku udite ko ngoo omakemo avo. (Eps. 10:1; Hab. 1:2) Ashike kava li va efa po okwiilikana. Jehova okwa li a shilipaleka ovalumenhu ovo ovadiinini kutya ote va kwafele, nota dulu oku ku ningila sha faafana. — Eps. 10:17.

11. Oshike tashi dulu oku tu ningilwa, ngeenge otwa kala tu na etaleko lii li na sha nomaupyakadi etu?

¹¹ Ngeenge otwa kala tuhe na etaleko liwa li na sha nomaupyakadi, otashi dulika shi ke tu kumwife, tashi dulika hatu diladila kutya inatu pumbwa okuningilwa oinima ya tya ngaho. (1 Pet. 4:12) Ovahongwa vaJesus ova li va mona shidjuu okuuda ko kutya Jesus ota ka hepekwa. (Luk. 18:​33, 34) Nonande Jesus okwa li e va lombwela osho a li ta ka ningilwa, omuyapostoli Petrus okwa li ta diladila kutya osho itashi dulu okuningilwa Jesus. Jesus okwa li e shii kutya okudiladila kwa tya ngaho otaku dulu oku mu imba aha longe ehalo laJehova, onghee okwa li a hanyena Petrus. (Mark. 8:​31-33) Nokuli nokonima yefyo laJesus, ovahongwa vaye ova li va mona shidjuu okuuda ko kutya omolwashike a li a dipawa. Ashike Jesus ka li a sholola oku va kwafela. Eshi a popya navo konima eshi a nyumuka, okwa li e va kwafela va ude ko kutya omolwashike a li e na okuhepekwa moku va “fatululila nawa Omishangwa.” (Luk. 24:​25-27, 32, 44-48) Eshi va dilonga kwaasho Jesus a li e va honga, osha li she va kwafela ve lilongekidile omapataneko oo va li tava ka shakeneka ve li ovashikuli vaye. Ngeenge ohatu konakona oshili yOmishangwa otai ke tu kwafela tu lilongekidile omaupyakadi.

12. Otashi ke tu ningifa tu kale tu udite ngahelipi, ngeenge otwa kala tu na etaleko lii li na sha nonghalo yetu?

¹² Ngeenge otwa kala tu na etaleko lii li na sha nonghalo yetu, ohatu ka kala tu udite kutya onghalo yetu oya kwata moiti neenghono. Jesus okwa li a ulika nghee osho tashi dulu okuningwa mefaneko laye li na sha novalongi vomoshikunino shomandjebele. Ovalongi vamwe ova li tava ngongota, molwaashi ova li ve udite kutya inava pewa ondjabi oyo va li ve na okupewa, ashike omwene wavo okwa li a lombwela umwe womuvo a ti: “Kaume, inandi ungaunga naave shihe li  pauyuki.” (Mat. 20:​10-13) Ovalongi ova li va handuka, molwaashi ova li va teelela okupewa shihapu shi dulife pwaasho va li va pewa. Kunena, Eendombwedi dimwe nado otashi dulika di udite ngaho. Otashi dulika di udite kutya kashi li pauyuki, eshi itadi longele Jehova moshinakuwanifwa shonhumba. Oinima imwe ilipi hatu dulu okuninga, opo tu kale tu na etaleko liwa li na sha nomaupyakadi etu?

EENGHATU ODO HATU DULU OKUKATUKA, NGEENGE OTWE LIHANGE MOMAUPYAKADI

13. Oshike tashi dulu okuningwa po, ngeenge owe lihange moupyakadi?

¹³ Otashi dulika u shii osho Ombiibeli ya popya kombinga yomaupyakadi. Otashi dulika nokuli wa leshela vamwe eevelise donhumba, opo u va kwafele ve lididimikile omaupyakadi. Ndele ngeenge oupyakadi owe ku hange, otashi dulika shi kale shidjuu okukala netaleko liwa. Pashihopaenenwa, otashi dulika u kale u udite kutya Jehova okwe ku handukila, ile kutya ita pwilikine komailikano oye. Eenghatu dilipi to dulu okukatuka, opo u kale u na etaleko liwa?

14. Oshike to dulu okwiilikana kombinga yasho, ngeenge u li moupyakadi? (Ovafilippi 4:13)

¹⁴ Pula Jehova e ku kwafele. Lombwela Jehova oupyakadi woye nanghee we ku kuma. Oto dulu okwiilikana kondadalude nghee wa hala Jehova e ku kwafele. Oto dulu oku mu pula omhepo yaye iyapuki i kupe eenghono nosho yo ounongo, opo u dule okulididimika. Dimbuluka kutya Jehova otashi dulika a nyamukule eilikano loye monghedi omo wa li ino shi teelela. (Ef. 3:20) Otashi dulika yo a longife ovaengeli, ile ovamwatate novamwameme ve ku kwafele. (Eps. 34:7) Onghee tambula ko ekwafo laJehova monghedi keshe te li kupe. Oha yandje omhepo yaye nehalo liwa pomhito keshe opo we i pumbwa. — Lesha Ovafilippi 4:13.

15. Oshike tashi dulu oku ku kwafela u lididimikile omaupyakadi? (Tala yo efano.)

¹⁵ Kala ho ningi oinima yopamhepo pandjikilile. Ninga ngaashi to dulu, nokuli nonande ito dulu okukala ho ningi osho wa li ho ningi nale. Owa pumbwa okuyadifa omadiladilo oye nomadiladilo aKalunga, unene pomafimbo “oudjuu noupyakadi.” (Eps. 119:143) Twikila okulesha Ombiibeli yoye pandjikilile, oku i konakona nokudilonga kuyo. Kala ho kufa ombinga moukalele ngaashi to dulu, okuya kokwoongala nokukufa ombinga muko. Kala ho endafana novamwatate novamwameme. Henuka eamo lokulikalela. — Omayel. 18:1.

16. Omalimbililo elipi tashi dulika tu kale tu na ngeenge twa taalela oupyakadi, nongahelipi hatu dulu oku a finda? (2 Ovakorinto 10:​4, 5)

¹⁶ Finda omalimbililo. Ngeenge wa hangika koupyakadi,  otashi dulika wa pumbwa okweefa po omadiladilo oo a fa “eeshungongulu da kola,” mwa kwatelwa okukala we lilimbililwa, ile wa limbililwa Jehova. (Lesha 2 Ovakorinto 10:​4, 5.) Oto dulu okufinda omalimbililo a tya ngaho mokulongifa ‘eshiivo laKalunga’ olo li li mOmbiibeli nosho yo moishangomwa yehangano laye. Pashihopaenenwa, mbela owa limbililwa kutya Jehova natango okwe ku hokwa? Konakona oshihopaenenwa shomuyapostoli Paulus. Pefimbo loukalele waye okwa li a taalela omaupyakadi a kwata moiti, ashike okwa li e mu kwafela a kale a tomhwa kutya oku li omuyakuli waKristus. (2 Kor. 11:​23-27) Mbela oho kala to lipula, ngeenge Jehova okwe ku dimina po ngoo omolwomapuko oo wa ninga monakudiwa? Ngeenge osho, shanga omusholondodo womishangwa odo tadi ulike kutya Jehova oha dimi po omanyono. (Jes. 43:25) Opo nee lesha eevelise odo nokudilonga kudo. (Eps. 119:97) Mbela owa ningilwa oshinima shonhumba sha kwata moiti she ku ningifa u lipule shi na sha neudaneko laKalunga li na sha nokwaamena ovapiya vaye ovadiinini? Ninga omapekapeko e na sha noikundafanwa oyo kutya omolwashike Kalunga a efa okumona oixuna ku kale po, nanghee he tu amene pamhepo, kashi na nee mbudi kutya otwa taalela omaupyakadi a tya ngahelipi. (Eps. 91:​9-12) Natango, lesha oimoniwa yovamwatate novamwameme ovo ve lididimikila omaupyakadi. a

17. Oshike tu na okuninga, ngeenge twa taalela omaupyakadi?

¹⁷ Mbela oto hafele efiku liwa, wa manguluka ko koupyakadi wa kwata moiti? Ngeenge osho, pandula Jehova nokulongifa nawa omhito oyo, opo u dilonge kouwa waye. (Omuud. 7:14) Ashike ngeenge owa hangika koupyakadi, kala u na etaleko liwa nokupameka elineekelo loye muJehova. Eshi to ningi ngaho, Jehova ote ke ku ‘kwafela u dule okulididimika.’ (1 Kor. 10:13) Ashike ongahelipi shi na sha novamwatate novamwameme vetu ovaholike? Ongahelipi hatu dulu oku va kwafela, ngeenge va taalela omaupyakadi? Osho osho hatu ka kundafana moshitukulwa tashi shikula ko.