Inda koshikalimo

Inda koshikalimo

Ovalumenhu ovo mwa nangekwa po — lihongeni koshihopaenenwa shaTimoteus

Ovalumenhu ovo mwa nangekwa po — lihongeni koshihopaenenwa shaTimoteus

OMUDO wa ya, ovalumenhu omayovi ova li va nangekwa po ve li ovakulunhuongalo novayakuliongalo mokati kEendombwedi daJehova mounyuni aushe. Ngeenge ou li umwe womovamwatate ovo, otwe lineekela kutya oho hafele oshinakuwanifwa shoye shipe.

Ndele nande ongaho, otashi dulika ho kala u na oshisho. Jason, omukulunhuongalo omunyasha, okwa ti: “Eshi opo nda nangekwa po, onda li ndi udite nda wililwa po koinakuwanifwa yange ipe.” Eshi Moses naJeremia va li tava pewa oinakuwanifwa ipe kuJehova, ova li ve udite inava wana. (Ex. 4:10; Jer. 1:6) Ngeenge naave osho ho kala u udite ngaho, mbela ongahelipi to dulu okupondola nosho yo okutwikila okuninga omalunduluko? Diladila koshihopaenenwa shomuhongwa Omukriste Timoteus. — Oil. 16:1-3.

HOPAENENENI OSHIHOPAENENWA SHATIMOTEUS

Otashi dulika Timoteus a li e na omido omulongo nasha ile omilongo mbali nasha eshi omuyapostoli Paulus e mu shiva a ninge omweendi pamwe naye. Molwaashi Timoteus okwa li omunyasha, otashi dulika a li e lidina notashi dulika a li a ongaonga okuwanifa po oshinakuwanifwa shaye shipe. (1 Tim. 4:11, 12; 2 Tim. 1:1, 2, 7) Ashike konima yomido donhumba, Paulus okwa li a lombwela eongalo lokuFilippi a ti: “Mokulineekela Omwene Jesus onda hala Timoteus ndi mu tume kunye diva . . . Osheshi ame nghi na umwe ta diladila ngaashi aame.” — Fil. 2:19, 20.

Oshike sha li sha ningifa Timoteus a kale omukulunhuongalo a pyokoka? Didilika oilihongomwa ihamano oyo to dulu okulihonga moshihopaenenwa shaye.

1. Okwa li e na ko nasha novanhu. Paulus okwa li a lombwela ovamwatate vomuFilippi a ti: ‘Timoteus ote mu file oshisho shili.’ (Fil. 2:20) Oshoshili kutya Timoteus okwa li e na ko nasha novanhu. Okwa li a halelela oku va kwafela va ehene popepi naJehova, nokwa li e na ehalo lokuliyandja ponhele yavo.

Henuka okukala ngaashi omushingi wobesa oo ha kala ashike ta yandje elitulemo kokufika alushe pefimbo pomatulilo eebesa, ponhele yoku ka tala ovatwaalelwa. William, oo a kala omukulunhuongalo omido di dulife po 20, ota ladipike ovalumenhu ovo opo va nangekwa po kutya, “Kaleni mu hole ovamwatate. Yandjeni elitulemo keemhumbwe davo ponhele yokukala to lipula unene nonghedi omo oinima yonhumba i na okulongwa.”

2. Okwa li a pitifa komesho oinima yOuhamba. Paulus okwa yelekanifa oshihopaenenwa shaTimoteus navamwe a ti: “Vo hava kongo oinima yavo vene, hayei yaKristus Jesus.” (Fil. 2:21) Paulus okwa shanga onhumwafo yaye eshi a li muRoma. Okwa li a mona kutya ovamwatate ova li hava kala ve lipyakidila unene noinima yopaumwene. Vamwe kava li hava ningi eenghendabala va longe shihapu moilonga yaJehova. Ashike Timoteus hasho a li ngaho. Ngeenge opa holoka eemhito doku ka udifa onghundana iwa, okwa li ha katuka ngaashi Jesaja, oo a ti: “Aame ou, tume nge!” — Jes. 6:8.

Ongahelipi to dulu okukala u na ondjele ngeenge tashi uya poinakuwanifwa yoye yopaumwene noyopamhepo? Shotete, tala  kutya oshike sha fimana. Paulus okwe tu ladipika tu “shiive okutongola oinima ei iwa unene.” (Fil. 1:10) Oinima oyo Kalunga a tala ko ya fimana, naave i tala ko ya fimana. Oshitivali, kala u na onghalamwenyo yanafangwa. Efa po keshe osho hashi mane po efimbo neenghono doye. Paulus okwa li a ladipika Timoteus a ti: “Inda onhapo okahalu kounyasha, ndele shikula ouyuki neitavelo nohole nombili.” — 2 Tim. 2:22.

3. Okwa li ha longo noudiinini moilonga iyapuki. Paulus okwa li a dimbulukifa ovafilippi a ti: “Oulineekelwa waTimoteus omu u shii eshi a kala pamwe naame ongaashi xe nomona okuyakula evaengeli.” (Fil. 2:22) Timoteus ka li e na onyalo. Okwa li ha longo noudiinini pamwe naPaulus, naasho osha li sha pameka ekwatafano lavo.

Mehangano laJehova kunena omu na omhumbwe yoilonga. Oilonga oyo otai ti sha shili notai dulu oku ku ehenifa popepi novamwatate novamwameme. Onghee hano, shi ninga elalakano loye u kale ‘alushe omuladi moilonga yOmwene.’ — 1 Kor. 15:58.

4. Okwa li ha tula moilonga osho e lihonga. Paulus okwa li a shangela Timoteus a ti: “Ove wa ninga omushikuli wange momalongo nomeenghedi, meemhangela, meitavelo, moutalanheni, mohole, melididimiko.” (2 Tim. 3:10) Molwaashi Timoteus okwa li ha tula moilonga osho e lihonga, okwa li a wana okupewa oshinakuwanifwa sha wedwa po. — 1 Kor. 4:17.

Mbela ou na kaume oo e na owino noto dulu oku mu hopaenena? Ngeenge hasho, omolwashike ito kongo kaume a tya ngaho? Tom, oo a kala omukulunhuongalo omido dihapu, okwa ti: “Omukulunhuongalo umwe oo a li e na owino okwa li a ulika ohokwe mwaame nokwa li a deula nge nawanawa. Onda kala handi mu pula nokutula moilonga omayele aye. Osho osha li sha pameka eitavelo lange.”

5. Okwa kala he lideula. Paulus okwa li a ladipika Timoteus a ti: “Ove lideula metilokalunga.” (1 Tim. 4:7) Omulotoki otashi dulika a kale e na omudeuli, ashike naye mwene okwa pumbwa okulideula. Paulus okwa li vali e mu ladipika a ti: “Diinina oku va leshela omishangwa noku va kumaida noku va longa. . . Aishe ei i diinina, ove u kale muyo, opo okweehena kwoye komesho ku monike kwaaveshe.” — 1 Tim. 4:13-15.

Naave owa pumbwa okuxwepopaleka ounghulungu woye. Ino efa oupamhepo woye u nghundipale ile uha kale vali to endele pamwe nehangano laJehova. Natango, henuka okukala we lineekela mwoove mwene, tashi dulika to diladila kutya ou na owino muhapu noto dulu okuungaunga nonghalo keshe nopehe na okuninga omapekapeko. Opo u dule okuhopaenena Timoteus, “lipashukila ove mwene nenongeko loye.” — 1 Tim. 4:16.

6. Okwa li e lineekela omhepo yaJehova. Eshi Paulus a li ta popi naTimoteus shi na sha noukalele waye, okwa li e mu dimbulukifa a ti: “Oshipewa osho shiwa we shi pewa shi diinina mOmhepo Iyapuki, tai kala mufye.” (2 Tim. 1:14) Opo Timoteus a twikile noukalele waye, okwa li a pumbwa okukala e lineekela momhepo yaKalunga.

Donald, oo a kala omukulunhuongalo omido dihapu, okwa ti: “Ovalumenhu ovo va nangekwa po ova pumbwa okukala va lenga ekwatafano lavo naKalunga. Ovo hava ningi ngaho otava ka kala alushe ve na ‘eenghono dipe.’ Ngeenge ova ilikana va mone omhepo yaKalunga nokukulika oiimati yayo, otava ka kala shili enangekonoupuna kovamwatate.” — Eps. 84:7; 1 Pet. 4:11.

KALA WA LENGA OSHINAKUWANIFWA SHOYE

Oshi li etwomukumo okumona nghee ovamwatate ovo opo va nangekwa po, ngaashi ove, tamu ningi exumokomesho lopamhepo. Jason, oo a tumbulwa pehovelo, okwa ti: “Momukokomoko wefimbo olo nda kala omukulunhuongalo, onde lihonga shihapu neitavelo lange ola kola. Paife ohandi hafele oshinakuwanifwa shange nonde shi tala ko shi li oufembanghenda munene.”

Mbela oto twikile ngoo okuninga exumokomesho lopamhepo? Shi ninga elalakano loye okulihonga kuTimoteus. Opo nee naave oto ka kala enangekonoupuna koshiwana shaKalunga.