Inda koshikalimo

Inda koshikalimo

Omapulo a dja kovaleshi

Omapulo a dja kovaleshi

Omolwashike inashi pitikwa okutula oishangomwa yEendombwedi daJehova kee-website dopaumwene ile komapandja amwe opaintaneta?

Molwaashi ohatu yandje oishangomwa yopaMbiibeli oshali, vamwe ohava kala ve udite kutya inashi puka oku i tapa noku i tula kee-website dimwe ile komapandja amwe opaintaneta. Ashike okuninga ngaho otaku nyono Omaufomhango e na sha nelongifo * lee-website detu nosha eta po omaupyakadi a kwata moiti. Ngaashi sha yelifwa nawa mOmaufomhango e na sha nelongifo, kape na oo a pitikwa “okutapa sha ko-website ei ta tapele konhele imwe kointaneta (kashi na nee mbudi kutya oko-website ilipi ile keenhele odo hadi ifanwa social network).” Omolwashike pa pumbiwa engabeko la tya ngaho?

Kape na oo ta dulu okutula oishangomwa yetu komapandja amwe opaintaneta

Keshe osho shi li kee-website detu osha amenwa. Ovashunimonima nosho yo ovapataneki vamwe ohava kendabala okulongifa oishangomwa yetu kee-website davo opo va pukife Eendombwedi daJehova nosho yo vamwe. Oishangomwa yokee-webiste odo oya nuninwa okukuna omalimbililo momadiladilo ovaleshi. (Eps. 26:4; Omayel. 22:5) Vamwe ohava longifa ouyelele oo u li moishangomwa yetu ile edidiliko letu lo-jw.org momashiivifo oipindi, koinima oyo tai landifwa nosho yo kee-aap do koikwaelektronika. Mokwaamena oufemba u na sha noumwene nomadidiliko opahangano, otu na oufemba wopaveta wokukelela elongifonai la tya ngaho. (Omayel. 27:12) Ashike ngeenge otwa efa ovanhu, nokuli novamwatate, va tule oishangomwa nouvidio vetu kee-website dimwe ile va longife edidiliko letu lo-jw.org eshi tava  landifa oinima yavo, eemhangu otashi dulika diha yambidide eenghendabala detu dokukelela ovapataneki ile ovanangeshefa va tya ngaho.

Okutapa oishangomwa yetu komapandja amwe e lili ehe fi o-jw.org yetu osha nyika oshiponga. Jehova okwe lineekelela ashike “omupiya omudiinini nomunaendunge” oshinakuwanifwa shokuyandja eendja dopamhepo. (Mat. 24:45) “Omupiya” oo oha longifa ashike ee-website detu dopambelewa, ngaashi www.jw.org, o-tv.jw.org, nosho yo o-wol.jw.org, okuyandja eendja dopamhepo. Otu na ashike ee-aap nhatu dopambelewa dokoikwaelektronika, ngaashi o-JW Language®, o-JW Library®, nosho yo o-JW Library Sign Language®. Ohatu dulu okukala noushili kutya inadi nwefwa mo kounyuni waSatana noihaku kala omashiivifo oipindi. Ngeenge otwa mono kutya eendja dopamhepo oda dilila kodjo imwe, otashi dulika da lundululwa. — Eps. 18:26; 19:8.

Shikwao vali, okutula oishangomwa yetu kee-website dimwe ohashi yandje omhito kovashunimonima nokovasheki vamwe va ningife ovanhu vaha kale ve lineekela ehangano laJehova. Ovamwatate vamwe ohava kala tava tu eemhata keenhele dokointaneta, naasho ohashi shekifa edina laJehova. Okutwa eemhata keenhele dokointaneta itashi wapalele ‘okupukulula ovanandubo nombili.’ (2 Tim. 2:23-25; 1 Tim. 6:3-5) Okwa monika kutya ope na omapandja opaintaneta nosho yo ee-website doipupulu odo da totwa po nedina lehangano, lOlutuwiliki nosho yo loilyo yalo. Ashike kape na oshilyo shOlutuwiliki shi na epandja lopaumwene lo-website ile lopaintaneta.

Okulombwela ovanhu va ye ko-jw.org ohashi kwafele okutandaveleka ‘evaengeli lOuhamba.’ (Mat. 24:14) Oilongifo oyo hatu pewa tu longife moukalele wetu otai twikile okupepalekwa. Otwa hala keshe umwe a mone mo ouwa. Onghee hano, ngaashi Omaufomhango e na sha nelongifo e shi ulika, oto dulu okutumina umwe oshishangomwa paelektronika ile u mu lombwele o-link oyo tai mu twala koishangomwa oyo tai hangwa ko-jw.org. Mokulombwela ovanhu ovo ve na ohokwe kombinga yee-website detu dopambelewa, ohatu va kwatakanifa ‘nomupiya omudiinini nomunaendunge,’ oo e li odjo yashili yeendja dopamhepo.

^ okat. 3 O-link yOmaufomhango e na sha nelongifo otai hangwa pedu lepandja letu lo-jw.org, nomangabeko oo otaa longo koinima aishe oyo i li kee-website detu.