Inda koshikalimo

Inda koshikalimo

 OSHIPALANYOLE SHOKOMBADA | OMBIIBELI OTAI TI SHIKE KOMBINGA YOVAENGELI?

Oku na ngoo shili ovaengeli ovakolokoshi?

Oku na ngoo shili ovaengeli ovakolokoshi?

Heeno, oku na ovaengeli ovakolokoshi. Ova dja peni? Dimbuluka kutya Kalunga okwa shita ovaengeli ve na emanguluko lokuninga omatokolo. Diva konima eshi omukainhu nomulumenhu wotete, Adam naEva, va shitwa, oshishitwa shimwe shopamhepo sha wanenena osha li sha longifa nai emanguluko lasho ndele tashi xwaxwameke omhepo yokuhadulika kombada yedu. Osha pondola mokuningifa Adam naEva vaha dulike kuKalunga. (Genesis 3:1-7; Ehololo 12:9) Ombiibeli inai popya kondadalunde kutya edina loshishitwa osho shopamhepo ola li lyelye ile kutya osha li shi na ondodo ilipi meulu fimbo inashi kwatwa komhepo yokuhadulika. Ashike konima yaasho, Ombiibeli osha yeleka eshi ye shi ifana Satana, tali ti “Omupataneki,” nosho yo Ondiaboli, tali ti “Omulundili.” — Mateus 4:8-11.

Shinyikifa oluhodi, omhepo yokuhadulika inai xulila opo. Pefimbo laNoa, omuvalu wovaengeli inau tumbulwa owa “fiya po omitumba davo” moukwaneumbo waKalunga womeulu. Ova li ve uya kombada yedu ndele tava lundulukile momalutu opambelela opo ve liwanifile po omahalo a puka omilele da nyata, osho shi li omhinge nelalakano laasho va shitilwa. — Judas 6; Genesis 6:1-4; 1 Petrus 3:19, 20.

Oshike sha ningilwa ovaengeli ovo ovakolokoshi? Eshi Kalunga a li a eta eyelu opo a hanaune po owii kombada yedu, ova lundulukila momalutu opamhepo ndele tava shuna monhele omo hamu kala oishitwa yopamhepo. Ashike Kalunga ina efa ovaengeli ovo ovakolokoshi va shune ‘koulenga wavo’ ile tu tye peendodo davo donale. Ponhele yaasho, okwe va efela ‘momambulukwena omulaulu’ dopamhepo, haa ifanwa Tartarus. (Judas 6; 2 Petrus 2:4) Eendemoni odo odi li mewiliko laSatana Ondiaboli, “omukulunhu weendemoni,” oo ta twikile ‘okulifefa omweengeli wouyelele.’ — Mateus 12:24; 2 Ovakorinto 11:14.

Ombiibeli otai hongo kutya Ouhamba waKalunga wopaMessias, oo u li epangelo lomeulu, owa dikwa po mo 1914. * Konima yoshiningwanima osho shididilikwedi, Satana neendemoni daye ova tewa mo meulu ndele tava kala va ngabekelwa kedu. Ehapupalo loukolokoshi noluhaelo kombada yedu otai ulike kutya ova handuka nove na enwefemo lii. — Ehololo 12:9-12.

Ashike ehapupalo loukolokoshi nelongifo leenghono otai koleke kutya exulilo lepangelo lavo lowii oli li popepi. Mafiku, oishitwa oyo yopamhepo oikwanyanya otai ka hanaunwa po. Konima ngeenge Ouhamba waKalunga owa pangele eduparadisa oule womido 1000, oishitwa oyo yopamhepo ikolokoshi otai ka pewa omhito i yeleke ovanhu oule wokafimbo kaxupi. Opo nee otai ka hanaunwa po fiyo alushe. — Mateus 25:41; Ehololo 20:1-3, 7-10.

^ okat. 6 Opo u mone ouyelele muhapu u na sha nOuhamba waKalunga, tala etukulwa 8 lembo Oshike hatu lihongo mOmbiibeli?, la nyanyangidwa kEendombwedi daJehova. Otali hangwa yo ko-www.jw.org/kj.