Inda koshikalimo

Inda koshikalimo

Mbela Kalunga oha ulikile ngoo ovanhu olukeno?

Mbela Kalunga oha ulikile ngoo ovanhu olukeno?

OSHO HATU LIHONGO KESHITO

Olukeno oo “oukwatya wokudula okuuda ko omaliudo avamwe ile okulifaneka u li monghalo yavamwe opo u mone kutya ove udite ngahelipi.” Rick Hanson, ondokotola oyo hai longo nouhaku wopamadiladilo, oya ti kutya “olukeno oukwatya oo twa dalwa nao.”

DILADILA KWAASHI: Omolwashike hatu dulu okuulikila ovanhu olukeno ile oukwao wananghali, oukwatya oo uhe li koishitwa imwe? Ombiibeli oya ulika kutya Kalunga okwa shita ovanhu oshifefa shaye. (Genesis 1:26) Otwa shitwa oshifeka shaKalunga meityo olo kutya ohatu ulike omaukwatya mawa a fa aye. Onghee hano, ngeenge olukeno tali tu linyengifa tu kwafele vamwe, kungaho ohatu hopaenene oukwatya wOmushiti wetu, Jehova Kalunga. — Omayeletumbulo 14:31.

OMBIIBELI OYA ULIKA KUTYA KALUNGA OHAU DILE OVANHU OUKWAO WANANGHALI

Kalunga oha kala e tu uditile olukeno noha kala e udite nai ngeenge hatu mono oixuna. Ombiibeli oya popya kombinga yoshiwana shOvaisrael shonale osho sha kala tashi lididimikile oupika muEgipti oule womido 40 ya ti: “Momaluhepo avo aeshe okwe va nyikila oluhodi.” (Jesaja 63:9) Didilika kutya Kalunga ka li ashike e wete eshi tava mono oixuna, ndele okwa li yo e udite nai. Okwa ti: “Ondi wete oudjuu wavo.” (Exodus 3:7) Okwa ti vali: “Osheshi ou te mu kumu, ota kumu ondada yeisho laye.” (Sakaria 2:8) Ngeenge vamwe ve tu udifa nai, kungaho ova udifa yo nai Jehova.

Ombiibeli otai tu shilipaleke kutya nonande otashi dulika tu kale tu udite kutya Kalunga ihe tu ulikile oukwao wananghali, oya ti: “Kalunga Oye e dule omutima wetu, noinima aishe oku i shii.” (1 Johannes 3:19, 20) Kalunga oku tu shii filufilu e tu dule. Oha kala e wete eenghalo adishe odo tu li mudo, omadiladilo etu nosho yo omaliudo etu. Oha kala e tu uditile olukeno.

Ohatu dulu okukonga ehekeleko, ounongo nosho yo ekwafo kuKalunga, tu na elineekelo kutya ote ke tu yambidida ngeenge tu li moudjuu

 Omishangwa odo tadi tu shilipaleke

  • “Ove to ka ifana ndele Omwene ote ke ku nyamukula, ove noto mu kuwile onghuwo, ndele Ye ota ka tya: Aame ou, ndi li apa!” — JESAJA 58:9.

  • “Osheshi omadiladilo ange nde e mu diladilila ondi a shii, Omwene osho ta ti, omadiladilo ombili, ha o omupya. Ame ohandi mu pe efimbo lokomesho pamwe neteelelo liwa. Opo nee nye otamu ka ifana nge ndele tamu ke uya ko ndele tamu ilikana nge, ndele Ame handi ke mu uda.” — JEREMIA 29:11, 12.

  • “Omahodi ange, we a pimhila moshimbudju shoye, heeno, shili, owe a nyolela membo loye.” — EPSALME 56:8.

KALUNGA OKU SHII NOKU UDITE KO OMALIUDO ETU

Mbela itashi tu kwafele tu lididimikile omaudjuu ngeenge otu shii kutya Kalunga oku tu uditile olukeno? Natu ka tale koshimoniwa shaMaria:

“Onda li ndi wete onghalamwenyo idjuu nokasha li pauyuki eshi nda filwa omonamati wange womido 18, oo a kala ta vele okankela oule womido mbali. Onda li nda handukila Jehova eshi ine mu velula.

Lwanima konima yomido hamano, kaume umwe womeongalo omunahole nomunalukeno, okwa li a pwilikina nelitulemo eshi handi mu lombwele kutya Jehova ke hole nge. Konima yeevili donhumba eshi a kala ta pwilikine nopehe na okukwata nge melaka, okwa li a tofa omushangwa wa 1 Johannes 3:19, 20, oo tau ti: “Kalunga Oye e dule omutima wetu, noinima aishe oku i shii.” Okwa li a yelifila nge kutya Jehova okuudite ko onghalo oyo tu li muyo.

Ashike nande ongaho, osha li shidjuu kwaame okuhandukuluka. Opo nee onda lesha Epsalme 94:19 olo tali ti: “Ngeenge ndi noshisho shoudjuu meni lange, omahekeleko oye oo a hekeleka omwenyo wange.” Onda li ndi wete kutya ovelishe oyo aame ya shangelwa. Mokweendela ko kwefimbo, onda ka mona shipu kwaame okupopya naJehova kombinga youpyakadi wange, ndi na oushili kutya oku udite ko noku shii onghalo oyo tu li muyo.”

Itashi hekeleke tuu okushiiva kutya Kalunga oku shii noku udite ko omaliudo etu! Ngeenge osho shi li ngaho, omolwashike pe na okumona oixuna kuhapu? Eshi hatu mono oixuna, mbela Kalunga okwe tu handukila omolwoilonga yetu ii? Mbela Kalunga ota ka ninga po sha opo a xulife po okumona oixuna akushe? Omapulo oo otaa ka nyamukulwa moitukulwa ya shikula ko.