Inda koshikalimo

Inda koshikalimo

Mafiku Kalunga ota ka xulifa po okumona oixuna akushe

Mafiku Kalunga ota ka xulifa po okumona oixuna akushe

Habakuk, omulumenhu oo a li a hokiwa kuKalunga, okwa li a pula ta ti: “Akutu Omwene, fiyo naini ame ndi nokwiingida ekwafo, ndelenee Ove ito udu ko? Handi ku ingidile: Oukolokoshi! Ndelenee Ove ito kwafa?” (Habakuk 1:2, 3) Eendjovo odo oda popiwa kuHabakuk, omulumenhu oo a li a hokiwa kuKalunga. Mbela eshi Habakuk a li a pula omapulo oo, osha hala kutya ka li e na eitavelo? Hasho nandenande. Kalunga okwa li a shilipaleka Habakuk kutya okwa tula po efimbo lokondadalunde lokuxulifa po okumona oixuna. — Habakuk 2:2, 3.

Ngeenge ove ile omunhu wopopepi naave ta mono oixuna, otashi dulika u fike pexulifodiladilo kutya Kalunga ita endelele okukatuka onghatu noho kala wa hala e i xulife po pefimbo opo. Ashike Ombiibeli oye tu shilipaleka tai ti: “Omwene ina fya ounye okuwanifa eudaneko laye, ngaashi vamwe hava diladila nokutya, okwa fya ounye, vati, ndelenee ohe mu tale onheni, osheshi ina hala pa kane nande umwe, ndelenee aveshe ve lialulukile melidilululo.” — 2 Petrus 3:9.

KALUNGA OTA KA KATUKA ONGHATU NAINI?

Ota ka katuka onghatu mafiku. Jesus okwa li a popya kutya ope na epupi limwe olo tali ka mona omadidiliko e na sha nomafiku axuuninwa ‘onghalelo ei yoinima.’ (Mateus 24:3-42) Ewanifo lexunganeko laJesus olo tali wanifwa kunena, oli li euliko kutya mafiku Kalunga ota ka katuka onghatu. *

Ndele mbela ongahelipi Kalunga ta ka xulifa po okumona oixuna akushe? Eshi Jesus a li kombada yedu, okwa li a ulika kutya Kalunga oku na eenghono dokuxulifa po okumona oixuna. Natu ka taleni koihopaenenwa imwe.

Oiponga yopaushitwe: Ofimbo Jesus novayapostoli vaye va li mombautu mefuta laGalilea, omwa li mwa tukuluka oshikungulu shinene shomhepo ndele ombautu tai hovele okuningina. Jesus okwa li a ulika kutya vo naXe otava dulu okupangela eenghono domeshito. (Ovakolossi 1:15, 16) Jesus okwa li a lombwela oshikungulu ta ti: “Mwena, ove u lote.” Oshike sha li sha ningwa po? Ombiibeli oya ti: “Omhepo oya lota, ndele okwa tya filu.” — Markus 4:35-39.

Ouyahame: Jesus okwa li a shiivika kutya oku na eenghono dokuvelula ovapofi, oingudu, ovo ve na oshinhona, oshilundu nosho yo omikifi dimwe vali. Ombiibeli oya ti: “Novanaudu aveshe okwe va velula.” — Mateus 4:23, 24; 8:16; 11:2-5.

Ondjala: Jesus okwa li a longifa eenghono odo a pewa kuXe opo a hapupalife oikulya. Ombiibeli oya popya kutya okwa li a palula ovanhu omayovi lwoikando ivali pefimbo loukalele waye. — Mateus 14:14-21; 15:32-38.

Efyo: Jehova oku na eenghono dokunyumuna oonakufya, naasho oshi li wetikile moikumwifilonga itatu i na sha nenyumuko oyo Jesus a li a longa. Umwe womuvo oo a nyumunwa, okwa hangika a fya oule womafiku ane. — Markus 5:35-42; Lukas 7:11-16; Johannes 11:3-44.

^ okat. 5 Opo u mone ouyelele muhapu shi na sha nomafiku axuuninwa, tala etukulwa 9 lembo Oshike hatu lihongo mOmbiibeli? la nyanyangidwa kEendombwedi daJehova, Oli li yo ko-www.jw.org/kj