Inda koshikalimo

Inda koshikalimo

Jesus okwa li a ka talela po inamweno yaPetrus ndele te mu velula. — Mateus 8:14, 15; Markus 1:29-31

Mbela okukala omulikaleli oshi li oshiteelelwa shovakalele Ovakriste?

Mbela okukala omulikaleli oshi li oshiteelelwa shovakalele Ovakriste?

OMALONGELOKALUNGA mounyuni aushe, ngaashi Ongeleka yaKatolika kaRoma, Ortodoks, Ovabuddha nosho yo amwe vali, ohaa pula ovawiliki novakwatelikomesho meengeleka dao va ninge ovalikaleli. Ashike ovanhu vahapu ove udite kutya okuninga ngaho osho tashi etifa ominyonena di na sha nomilele da kwatela mo ovakwatelikomesho vomalongelokalunga e lili noku lili.

Onghee hano, osha fimana okupula kutya: Mbela okukala omulikaleli oshiteelelwa ngoo shopamishangwa shovakalele Ovakriste? Opo tu mone enyamukulo kepulo olo, tete natu konakone kutya onghedi oyo oya hovela naini nonghee Kalunga he i tale ko.

ONDJOKONONA YOKUKALA OMULIKALELI MOMALONGELOKALUNGA

O-Encyclopædia Britannica oya ti kutya omulikaleli otashi ti “okukala ino hombola ile ino hombolwa nokulidilika omilele, osho luhapu hashi ningwa opo omunhu a dule okuwanifa po oshinakuwanifwa shonhumba shopalongelokalunga.” Mo 2006, Omupapa Benedict omuti-15 okwa li a popya nongudumutima hai ifanwa Roman Curia kutya oshiteelelwa shokukala ino hombola ile ino hombolwa oshi li “onghedi oyo ya dja nale kefimbo lovayapostoli lwaapo.”

Ashike Ovakriste vomefelemudo lotete kava li ve na elongekido lopalongelokalunga li na sha novalikaleli. Omuyapostoli Paulus, oo a li ko mefelemudo lotete, okwa li a londwela ovaitaveli kombinga yovalumenhu ovo va li tava ka popya oinima tai ‘pukifa nokukelela okuhombola.’ — 1 Timoteus 4:1-3.

Mefelemudo etivali, okukala omulikaleli okwa li kwa hovela meengeleka dokoilongo yokouninginino daavo have liti Ovakriste. Embo Celibacy and Religious Traditions ola ti kutya osho osha li “onghedi opo ya totwa po yokulidilika omilele oyo ya li apeshe mOuhamba waRoma.”

Momafelemido a ka landula ko, ongongahangano yongeleka nosho yo Oopata ova li va xumifa komesho okukala omulikaleli kovakwatelikomesho mongeleka. Okwa li tava diladila kutya okuya momilele inashi  koshoka noitashi wapalele ovakwatelikomesho vongeleka. Ashike o-Encyclopædia Britannica oya popya kutya “lwomefelemudo eti-10 ovapristeri vahapu nosho yo nokuli ovabishofi vamwe ova li ve na ovakulukadi.”

Ovakwatelikomesho vongeleka ova li va fininikwa va ninge ovalikaleli pokwoongala kwongudu hai ifanwa Lateran Councils kwomo 1123 nomo 1139, oko kwa li kwa ningilwa muRoma, noku li oshiteelelwa shopambelewa shOngeleka yaKatolika kaRoma fiyo okunena. Omolweendjidikila odo, ongeleka oya li ya ninga ngaho opo iha kanife eenghono ile oyuuyemo, osho sha li hashi ningwa ngeenge ovapristeri va li va shangifa ounona vavo va pewe po oiniwe yongeleka.

ETALEKO LAKALUNGA LI NA SHA NOVALIKALELI

Etaleko laKalunga li na sha novalikaleli ola yelifwa nawa mEendjovo daye, Ombiibeli. Jesus okwa popya kombinga yaavo va hala okukala inava hombola ile inava hombolwa ngaashi ye, a ti: ‘Ove shi lininga voovene omolwOuhamba wokeulu.’ (Mateus 19:12) Omuyapostoli Paulus naye okwa popya kombinga yOvakriste ovo va hala okushikula oshihopaenenwa shaye shokukala ina hombola “omolwevaengeli.” — 1 Ovakorinto 7:37, 38; 9:23.

Ashike nande ongaho, Jesus naPaulus inava lombwela ovakalele va kale ovalikaleli. Jesus okwa ti kutya okukala ino hombola ile ino hombolwa oku li ‘oshipewa’ osho itashi dulika kovashikuli vaye aveshe. Eshi Paulus a shanga kombinga yaavo inava hombola ile inava hombolwa nale, okwa popya sha yukilila a ti: “Inandi pewa oshipango shOmwene, ndele ohandi tongo omayele ange.” — Mateus 19:11; 1 Ovakorinto 7:25.

Shikwao vali, Ombiibeli otai ulike kutya ovakalele Ovakriste vahapu vomefelemudo lotete, mwa kwatelwa omuyapostoli Petrus, ova li ovalumenhu va hombola. (Mateus 8:14; Markus 1:29-31; 1 Ovakorinto 9:5) Omolwoluhaelo olo la li la hapupala muRoma pefimbo opo, Paulus okwa shanga kutya ngeenge omupashukili Omukriste okwa hombola, oku na okukala ‘omulumenhu womukainhu umwe aeke, noha tekula nawa ounona vaye.’ — 1 Timoteus 3:2, 4.

Eehombo odo kada li dovalikaleli, molwaashi Ombiibeli oya popya sha yela ya ti kutya “omulumenhu na wanife [po] eemhumbwe domukainhu waye” nonokutya ovalihomboli kave na ‘okulidilika’ omilele. (1 Ovakorinto 7:3-5) Onghee hano, Kalunga i na teelela ovanhu va kale ovalikaleli, nokashi fi oshiteelelwa shovakalele Ovakriste.

OMOLWEVAENGELI

Ngeenge okukala omulikaleli kashi fi oshiteelelwa, omolwashike Jesus naPaulus va popya kombinga yokukala ino hombola ile ino hombolwa? Omolwaashi okukala ino hombola ile ino hombolwa otaku dulu okupa omunhu omhito ya wana yokuudifila vamwe onghundana iwa. Ovo inava hombola ile inava hombolwa otava dulu okulonga shihapu, molwaashi kave na oisho oyo i niwe kwaavo va hombola ile va hombolwa. — 1 Ovakorinto 7:32-35.

Diladila koshihopaenenwa shaDavid, oo a li a tokola okweefa po oilonga yaye oyo kwa li hai futu nawa moMexico opo a tembukile komikunda koCosta Rica a ka honge vamwe Ombiibeli. Mbela David okwa li e udite kutya okukala ina hombola osho she mu kwafela a ninge ngaho? Okwa ti: “Osho lela. Osha li eshongo kwaame okwiikilila eputuko lipe nonghalo oyo ya li ya yooloka ko komudingonoko oo nda li ndi shi, ndele molwaashi okwa li ashike handi lifile oshisho aame andike, osha li shipu kwaame okwiikilila onghalo yomoshitukulwa.”

Claudia, Omukriste ina hombolwa oo a tembukila konhele imwe oko kwa li kwa pumbwa ovaudifi vevaengeli, okwa ti: “Ohandi hafele okulongela Kalunga. Eshi nda mona nghee Kalunga ha file nge oshisho, eitavelo lange ola pama nekwatafano lange naye ola kola neenghono.”

Claudia okwa ti: “Kutya nee ou li mohombo ile ino hombola ile ino hombolwa, oto ka kala ashike wa hafa ngeenge oho pe Jehova Kalunga osho sha denga mbada.”

Okukala ino hombola ile ino hombolwa kashi na okukala omutengi. Claudia okwa weda ko a ti: “Kutya nee ou li mohombo ile ino hombola ile ino hombolwa, oto ka kala wa hafa ngeenge oho pe Jehova Kalunga osho sha denga mbada.” — Epsalme 119:1, 2.