Inda koshikalimo

Inda koshikalimo

Kalunga ota ka ninga po shike?

Kalunga ota ka ninga po shike?

Ngeenge owa hangwa koupyakadi, oto ka kala wa hala kaume koye kopofingo e ku kwafele. Tu na osho momadiladilo, vamwe ohava ti Kalunga ke fi kaume kavo molwaashi ove udite kutya iha ningi po sha opo e va kwafele. Oushili oyoo kutya Kalunga okwe tu ningila oinima iwa ihapu omolwouwa wetu nota ka katuka eenghatu opo a xulife po omaupyakadi aeshe nosho yo okumona oixuna akushe oko tu li muko. Oshike osho Kalunga ta ka ninga po?

OUKOLOKOSHI OTAU KA XULIFWA PO

Kalunga ota ka xulifa po oukolokoshi mokuhanauna po odjo yao. Ombiibeli oya popya ya ti: ‘Ounyuni aushe ou li mepangelo lomunawii.’ (1 Johannes 5:19) ‘Omunawii’ oo oyoo a popiwa kuJesus e li “omupangeli wounyuni ou,” Satana, Ondiaboli. (Johannes 12:31) Satana ota nwefa mo ovanhu mounyuni noye e li odjo yomaupyakadi aeshe oo e li kombada yedu. Oshike osho Kalunga ta ka ninga po?

Mafiku Jehova ota ka katuka onghatu ta longifa Omona waye, Jesus Kristus, “opo a hanaune po nefyo laye ou a kala e nepangelo lefyo nokutya, Satana.” (Ovaheberi 2:14; 1 Johannes 3:8) Ombiibeli oya ulika kutya Ondiaboli oi shii kutya oi na ko “okafimbo kaxupi kongaho” ofimbo inai hanaunwa po. (Ehololo 12:12) Kalunga ota ka hanauna po yo aveshe ovo hava longo oilonga ii. — Epsalme 37:9; Omayeletumbulo 2:22.

OTA KA NINGA EDU OPARADISA

Konima ngeenge Kalunga okwa hanauna po ovakolokoshi aveshe kombada yedu, ota ka katuka onghatu opo a wanife po elalakano laye li na sha novanhu nosho yo nedu. Oshike twa teelela nodjuulufi?

Ombili neameno. “Ovananheni vo otava ka fyuulula edu, ndele tava ka hafela ombili inene.” — Epsalme 37:11.

Oikulya otai ka kala i na oukolele noya henena. “Moshilongo namu kale oshishipo shoilya, yo i mene fiyo okeexulo deemhunda.” — Epsalme 72:16.

Omaumbo mawa nosho yo oilonga itunhula. “Otava ka dika omaumbo ndele tava kala mo, ndele tava twike oikokola yomiviinyu, ndele tava li oiimati yayo. . . . Ovo vene tava ka shambukilwa oilonga yomake avo.” — Jesaja 65:21, 22.

Mbela ino teelela omauwa aeshe oo nodjuulufi? Mafiku oinima oyo otai ka ninga yakeshe fiku kwaaveshe.

OTA KA XULIFA PO OMAUYAHAME NEFYO

Kunena ohatu ehama nokufya, ashike oinima oyo itai ka kala po vali. Mafiku Kalunga ota ka longifa ekuliloyambo laJesus opo “keshe ou te mu itavele a ha kane, ndelenee a kale e nomwenyo waalushe.” (Johannes 3:16) Oshidjemo otashi ka kala sha tya ngahelipi?

Ouyahame otau ka xulifwa po. Kape na “nande umwe ta ti: ‘Aame oshingone.’ Ovanhu ava tava kala mo, ova diminwa po omatimba avo.” — Jesaja 33:24.

Efyo itali ka pangela vali ovanhu. “Ota ka hanauna po efyo fiyo alushe, ndele Omwene, Kalunga ta ka feta po omahodi momesho aaveshe.” — Jesaja 25:8.

Ovanhu otava ka kala nomwenyo fiyo alushe. “Oshalinghenda yaKalunga oyo omwenyo waalushe muKristus Jesus, Omwene wetu.” — Ovaroma 6:23.

Ovo va fya otava ka nyumunwa. “Otaku ka kala enyumuko lovayuki nolovalunde.” (Oilonga 24:15) Ovanhu otava ka mona ouwa moshali yaKalunga i na sha nekulilo.

Ongahelipi Kalunga ta ka wanifa po omaudaneko aeshe oo?

 OTA KA DIKA PO EPANGELO LI LI PAUYUKI

Kalunga ota ka wanifa po elalakano laye li na sha novanhu nosho yo nedu okupitila mepangelo laye lomeulu, na Kristus Jesus oye a hoololwa a kale Omupangeli walo. (Epsalme 110:1, 2) Oli li epangelo ile ouhamba oo Jesus a honga ovashikuli vaye va kale tava ilikana kombinga yao, a ti: “Tate yetu ou u li meulu! . . . Ouhamba woye nau uye.” — Mateus 6:9, 10.

Ouhamba waKalunga otau ka pangela kombada yedu nokuxulifa po omaupyakadi aeshe nosho yo okumona oixuna akushe. Ovanhu otava ka hafela neenghono epangelo lOuhamba waKalunga shi dulife omapangelo opanhu. Nomolwaasho Jesus e liyamba opo a udife “evaengeli lOuhamba” pefimbo loukalele waye kombada yedu, nokulombwela ovahongwa vaye va ninge sha faafana. — Mateus 4:23; 24:14.

Omolwohole yaJehova inenenene yokuhola ovanhu, okwa udaneka oku ka wanifa po oinima aishe oyo. Mbela osho inashi ku linyengifa u kale wa hala oku mu shiiva nokweehena popepi naye? Ngeenge owa hoolola okuninga ngaho, ouwa washike to ka mona mo? Oshitukulwa tashi landula ko otashi ka kundafana shi na sha naasho.

KALUNGA OTA KA NINGA PO SHIKE? Kalunga ota ka xulifa po ouyahame nefyo, okuhanganifa ovanhu koshi yOuhamba waye nosho yo okuninga edu oparadisa