Inda koshikalimo

Inda koshikalimo

Kalunga oku na omaukwatya a tya ngahelipi?

Kalunga oku na omaukwatya a tya ngahelipi?

Apa ngoo pe fike okulihonga kombinga yomaukwatya aumwe, opo ngoo tapa ka kala pe fike oku mu shiiva noukaume weni otau ka kala wa pama. Sha faafana, ngeenge otwa shiiva nawa omaukwatya aJehova, ohatu ka shiiva kutya okwa tya ngahelipi noukaume wetu naye otau ka kala wa pama. Momaukwatya aeshe aKalunga, omu na ane omuo a didilikwedi, ngaashi: omunaenghono adishe, omunongo, omuyuki nomunahole.

KALUNGA OMUNAENGHONO ADISHE

“Omwene, Kalunga! Tala, Ove owa shita eulu nedu neenghono doye dihapu.” — JEREMIA 32:17.

Eenghono daKalunga odi liwetikile meshito laye. Pashihopaenenwa, ngeenge owa i pondje pefimbo lokwenye, oshike ho kala u udite koshipa shoye? Etango ohali kala tali xwike. Kungaho, oho kala u wete eenghono daJehova di na sha noinima oyo a shita. Etango oli na eenghono di fike peni? Exuku lalo oli na oupyu u fike peedigili Celsius omamiliyona 15 lwaapo. Osekonde keshe, etango ohali yandje eenghono di fike pomitopelo deeboma dolute omamiliyona omafele.

Ndele nande ongaho, etango olinini pakuyelekanifa neenyofi omamiliyona odo di li mevalelwa. Ovanongononi ova tengeneka kutya onyofi imwe yomeenyofi odo dinene, hai ifanwa UY Scuti, oi dule etango momutamo lwomapa 1 700 lwaapo. Ngeenge oya tulwa opo pe na etango, omutamo wayo otau pitilile opo pe na edingonokondjila lopulaneta yaJupiter. Osho otashi tu kwafele tu ude ko moule eendjovo odo Jeremia a popya di na sha naJehova Kalunga kutya okwa shita eulu nedu neenghono daye.

Ouwa ulipi hatu dulu okumona meenghono daKalunga? Onghalamwenyo yovanhu oye likolelela konima oyo Jehova a shita, ngaashi ketango nosho  yo keedjo dimwe dopaushitwe odo di li kombada yedu. Natango, Kalunga oha longifa eenghono daye opo keshe umwe a mone mo ouwa. Ohe shi ningi ngahelipi? Mefelemudo lotete, Kalunga okwa li a pa Jesus eenghono opo a longe oikumwifilonga. Ombiibeli oya ti: “Ovapofi otava mono ko, noingudu otai ende, novanashilundu otava yelifwa, novafitamatwi otava udu ko, novafi otava nyumunwa.” (Mateus 11:5) Ongahelipi shi na sha nokunena? Ombiibeli oya ti: “Oye ota pe ava va loloka ouladi.” Oya weda ko vali ya ti: “Ndelenee ovo hava teelele Omwene, otava pewa eenghono dipe.” (Jesaja 40:29, 31) Kalunga ota dulu oku tu pa “eenghono di dule odo dopaushitwe” opo tu dule okulididimikila eenghalo didjuu nosho yo omaupyakadi oo hatu shakeneke monghalamwenyo. (2 Ovakorinto 4:7, NW) Mbela ku wete wa ehena popepi naKalunga omunahole, oo ha longifa eenghono daye opo e tu kwafele?

KALUNGA OKU NA OUNONGO

“Omwene, oilonga yoye oi fike peni! Aishe owe i shita nounongo.” — EPSALME 104:24.

Ngeenge otwe lihongo kombinga yoinima oyo Kalunga a shita, ohatu ka kuminwa ounongo waye. Ovanongononi vamwe ohava konakona nokuhopaenena omidutilo doinima yomeshito opo va xwepopaleke oinima oyo tava nduluka. Pashihopaenenwa, ova nduluka oinima i li paunafangwa ngaashi oupateko hava longo va fa nanghanyata nosho yo oyo ya kitakana, ngaashi eedila.

Eisho lomunhu oli li eshito likumwifi

Ounongo waKalunga ou liwetikile unene momalutu ovanhu ovo a shita. Natu ka taleni koshihopaenenwa shanghee olutu lokaana hali tungwa po. Tete osele oyo ya fimbapala ohai tungwa po nohai kala i na omaufyuululwakwatya aeshe. Osele oyo ohai litukula meesele dihapu odo hadi kala da faafana. Lwopokati opo, eesele ohadi hovele okulitunga meesele omafele da yoolokafana, ngaashi eesele dohonde, eesele domaliudo nosho yo eesele dokutunga po omakipa. Diva oitukulwa yolutu ohai uya po nokuhovela okulonga. Ashike moule weemwedi omuwoi, osele yotete oyo ya fimbapala ohai eta po okaana ke lixwa po, oko ka fikama po meesele omabiliyona. Ounongo waye ou liwetikile moinima oyo a shita, naasho ohashi shi linyengifa vahapu va twe kumwe neendjovo domushangi umwe wOmbiibeli odo tadi ti: “Ohandi ku pandula, eshi nda tungwa nda tungikika.” — Epsalme 139:14.

Ouwa ulipi hatu dulu okumona mounongo waKalunga? Omushiti oku shii osho twa pumbwa opo tu kale twa hafa. Molwaashi oku na eudeko lomoule nosho yo ounongo, ohe tu pe omayele taa longo oo e li mEendjovo daye Ombiibeli. Pashihopaenenwa, oye tu ladipika ya ti: “Diminafaneni po omanyono.” (Ovakolossi 3:13) Mbela omayele oo opandunge ngoo? Heeno. Eendokotola oda mona kutya okudimina po otaku dulu okuxwepopaleka okukofa kwaumwe nosho yo okuningifa ohonde iha londe. Otaku dulu yo oku ku ningifa uha kwatwe kepolimano nosho yo komaupyakadi amwe e na sha noukolele. Kalunga oku li ngaashi kaume oo e na ko nasha nafye nokwe lilongekida oku tu kwafela noku tu pa omayele taa longo.  (2 Timoteus 3:16, 17) Mbela ino hala okukala u na kaume a tya ngaho?

KALUNGA OMUYUKI

“Omwene oku hole ouyuki.” — EPSALME 37:28.

Kalunga oha longo alushe ouyuki. Natango, “Kalunga oku li kokule nouhenakalunga, nOmunaenghono adishe oku li kokule nowii!” (Job 34:10) Omatokolo aJehova okwa yuka, ngaashi omupsalme a popya kombinga yaye a ti: ‘Oto tokola oiwana nouyuki.’ (Epsalme 67:4) Molwaashi Jehova oha “tale omutima,” ita dulu okufufywa kwaavo ve na oihelele, ndele oku shii oshili nota tokola pauyuki. (1 Samuel 16:7) Natango, Kalunga oku wete okuhenouyuki keshe oko ku li kombada yedu nomolwaasho a udaneka kutya mafiku ‘ovahenakalunga otava ka dudwa mo moshilongo.’ — Omayeletumbulo 2:22.

Ashike Kalunga ke fi omutokoli omukwanyanya oo ha endelele okutokola. Oha ulike onghenda ngeenge sha pumbiwa. Ombiibeli oya ti: “Omwene Oye omunefilonghenda nomunanghenda,” nokuli nokovakolokoshi ngeenge ove livela ombedi shili. Mbela osho itashi ulike ouyuki waye? — Epsalme 103:8; 2 Petrus 3:9.

Ouwa ulipi hatu dulu okumona mouyuki waKalunga? Omuyapostoli Petrus okwa popya a ti: “Kalunga iha tale omunhu kombada. Ndele moshiwana keshe, keshe ou he mu tila ndele ta diinine ouyuki, ote mu wapalele.” (Oilonga 10:34, 35) Ohatu mono ouwa mouyuki waKalunga molwaashi ke na onhondo ile olwaamambinga. Atushe ohatu dulu okukala twa hokiwa kuye noku kala ovalongeli vaye, kashi na nee mbudi kutya otwa dja momuhoko, meputuko, ouhongelwe ile omufika wetu wopanghalafano owa tya ngahelipi.

Kalunga ke na onhondo, nohatu dulu okumona mo ouwa, kashi na nee mbudi kutya otwa dja momuhoko ulipi ile omufika wetu wopanghalafano owa tya ngahelipi

Molwaashi Kalunga okwa hala tu shiive notu mone ouwa mouyuki waye, okwe tu shitila eliudo. Omishangwa oda popya kutya eliudo oli li omhango ya ‘shangelwa momitima’ oyo ‘tai yandje oumbangi’ ngeenge ohatu ningi osho shi li mondjila ile shapuka. (Ovaroma 2:15, NW) Ongahelipi hatu  mono mo ouwa? Eliudo la deulwa nawa ohali tu linyengifa tu henuke osho sha nyika oshiponga ile eenghatu inadi koshoka. Ngeenge otwa nyono, ohali tu linyengifa tu lidilulule nokulivela ombedi omolwoshinima osho twa ninga. Ngeenge otwa udu ko ouyuki waKalunga, otashi ke tu kwafela noku tu ehenifa popepi naye.

KALUNGA OYE OHOLE

“Kalunga Oye ohole.” — 1 JOHANNES 4:8.

Kalunga oha ulike eenghono, ounongo nosho yo ouyuki, ashike Ombiibeli inai tya kutya Kalunga oye eenghono, ounongo ile ouyuki. Ndele oya ti oye ohole. Omolwashike mbela? Omolwaashi otaku dulu okutiwa kutya eenghono daKalunga ohadi mu ningifa a katuke onghatu nosho yo kutya ounongo ohau wilike onghedi omo ha katuka. Ashike ohole yaye ohai mu linyengifa a katuke onghatu mukeshe osho ta ningi.

Nonande Jehova ka li e na osho a pumbwa, ohole yaye oye mu linyengifa a shite oishitwa inaendunge, kutya nee oyokombada yedu ile oyomeulu, oyo tai dulu okumona ouwa nokuhafela ohole nefiloshisho laye. Okwa ulika okuheliholamwene eshi a shitila oishitwa yaye yopanhu edu olo tali wapalele li li eumbo layo. Nota twikile okuulikila ovanhu aveshe ohole eshi ha ‘pitifile etango laye ava vai naava vawa, nodula ote i lokifile ovayuki naava vehe fi ovayuki.’ — Mateus 5:45.

Shikwao vali, “Omwene Oye omunalukeno.” (Jakob 5:11) Oha kenukile ovo hava katuka eenghatu opo ve mu shiive noku ehena popepi naye. Keshe umwe ohe mu tale ko pauhandimwe. Natango, ‘ote mu file oshisho.’ — 1 Petrus 5:7.

Ouwa ulipi hatu dulu okumona mohole yaKalunga? Ohatu hafele okutala eshi etango tali ningine nongeenge okahanana taka yolo. Ohatu kala twa lenga ohole oyo hatu ulikilwa komupambele wopopepi. Otashi dulika oinima oyo ya nafangwa, ndele ohai xwepopaleke onghalamwenyo yetu.

Ohatu mono yo ouwa mefiloshisho limwe laKalunga lopahole: eilikano. Ombiibeli otai tu ladipike tai ti: “Kaleni muhe na nande oshisho shasha, ndelenee oufyoona weni u shiivifileni Kalunga momailikano nomomaindilo pamwe nomapandulo.” Ngaashi xe omudali, Kalunga okwa hala tu konge ekwafo kuye ngeenge tu na oisho yonhumba. Omolwohole yaye yokuheliholamwene, okwa udaneka oku tu pa ‘ombili yaye ei i dule eendunge adishe.’ — Ovafilippi 4:6, 7.

Mbela oshikundafanwa eshi shi na sha nomaukwatya aKalunga, ngaashi eenghono, ounongo, ouyuki nosho yo ohole, oshe ku kwafela u shiive kutya Kalunga omunhu a tya ngahelipi? Opo u dule okuulikila Kalunga olupandu, ohatu ku shivi u lihonge osho a ninga nosho yo osho ta ka ninga omolwouwa woye.

KALUNGA OKU NA OMAUKWATYA A TYA NGAHELIPI? Jehova omunaenghono adishe nomunongo e dule ovanhu aveshe. Ashike oukwatya waye oo udidilikwedi, ohole yaye.