Inda koshikalimo

Inda koshikalimo

 OSHO TASHI KWAFELE OVO VA NYIKA OLUHODI

Okuungaunga noluhodi — Osho to dulu okuninga

Okuungaunga noluhodi — Osho to dulu okuninga

Ngeenge owa kongo ekwafo li na sha nokuungaunga noluhodi, otashi dulika u ka mone omayele mahapu, oo amwe omuo e li ekwafo linene e dule makwao. Otashi dulika shi kale ngaho, molwaashi ngaashi sha popiwa metetekelo, keshe umwe oha nyiki oluhodi monghedi i lili. Osho tashi dulu okukwafela omunhu umwe, otashi dulika shiha longe kumukwao.

Ashike nande ongaho, ope na omaetepo a denga mbada, oo a kwafela vahapu. Omaetepo oo ohaa popiwa luhapu kovaxungimwenyo nokwa fela komafinamhango e shii okulineekelwa, oo taa hangwa membo lonale lounongo, Ombiibeli.

1: TAMBULA KO EKWAFO OLO TO PEWA OKOVAPAMBELE NOKOOKAUME

  • Ovashiivinawa vamwe ova tala ko onghedi oyo i li ekwafo linene, ngeenge u li moluhodi. Ndele omafimbo amwe, otashi dulika u kale wa hala okukala oove auke. Otashi dulika nokuli u kale u wete to ningilwa nai kwaavo tava kendabala oku ku kwafela. Osho oshi li paushitwe.

  • Ino kala u udite kutya ou na okukala alushe novanhu, ashike ino litongola ko filufilu. Oto ka pumbwa ekwafo lavo efiku limwe. Shiivifila vakweni pahole osho wa pumbwa pefimbo opo, naasho ino pumbwa.

  • She likolelela keemhumbwe doye, kala u na ondjele shi na sha nefimbo olo ho kala novanhu vakweni nosho yo naalo ho kala oove auke.

EFINAMHANGO: ‘Vavali ve dule umwe. Osheshi vo ngeenge tava punduka, umwe ta dulu okuyambula po mukwao.’ — Omuudifi 4:9, 10.

2: LUNGAMENA OIKULYA OYO HO LI NOKUKALA HO NINGI OMADEULO

  • Okulya oikulya i na oitungifi otaku ke ku kwafela u ungaunge nepolimano olo hali etwa koluhodi. Kendabala okulya oiimati yomaludi e lili noku lili, oikwambidi nosho yo oikulya oyo ihe na omaadi.

  • Nwa omeva mahapu nosho yo oikunwa imwe vali oyo i na oitungifi.

  • Ngeenge ku na ehalo lokulya, kala ho li oikulya inini efimbo nefimbo. Oto dulu yo okupula ndokotola woye shi na sha noikulya oyo i na oitungifi ya wedwa po. *

  • Okutondoka nosho yo omadeulo amwe, otaa dulu okuninipika omadiladilo mai. Omadeulo otae ku pe efimbo u kale netaleko li li pandjele li na sha nonghalo yoye, ile uha diladile unene shi na sha nayo.

EFINAMHANGO: “Kape na omulumenhu e tonde olutu laye mwene, ndele ohe li palula nohe li file oshisho.” — Ovaefeso 5:29.

3: KOFA SHA WANA

  • Okukofa okwa pumbiwa alushe, unene tuu kwaavo va nyika oluhodi, molwaashi otashi dulika va kale va loloka unene shi dulife shito.

  • Lungamena oikunwa i na okafeina nosho yo oikolwifa, molwaashi otai dulu oku ku nyonena eemhofi.

EFINAMHANGO: “Etulumuko li fike peke li dule eshambekela li yadi oupyakadi nokushikula omhepo.” — Omuudifi 4:6.

4: KALA HO TIFUKA

  • Kala u shii kutya keshe umwe oha nyiki oluhodi monghedi i lili. Onghee hano, ou na okutala kutya onghedi ilipi tai ku kwafele.

  • Vahapu ohava mono hashi va kwafele okulombwela vamwe kombinga yoluhodi lavo, ofimbo vamwe vehe hole okupopya kombinga yalo. Ovashiivinawa ove na omaetepo mahapu, ngaashi kutya ngeenge omunhu ta popi kombinga yomaliudo aye, ohashi mu kwafele neenghono aha kale a nyika oluhodi. Ngeenge owa hala okulombwela umwe nghee u udite, ndele ota ongaonga, oto dulu okukufila ko kaume koye omulineekelwa kombinga yomaliudo oye.

  • Ovanhu vamwe ohava mono okukwena haku va kwafele unene vaha kale va nyika oluhodi, ofimbo vamwe hava mono shipu, ngeenge itava kwena unene.

EFINAMHANGO: “Omutima tau shiiva oluhodi lao vene.” — Omayeletumbulo 14:10.

5: HENUKA OKULIHUMBATA MONGHEDI YOKULIHOLAMWENE

  • Vamwe ovo va nyika oluhodi ohava kendabala okudenga po omadiladilo mai mokulongifa nai oikolwifa, ile oingangamifi. Osha nyika oshiponga “okuninipika” oluhodi to longifa oinima ya tya ngaho. Omunhu oha kala ashike a pepelelwa pokafimbo opo, ndele lwanima oha ka hangwa koilanduliko ihapu ya kwata moiti. Kendabala eenghedi dimwe, odo tadi ku kwafele uha kale unene u na oisho.

EFINAMHANGO: “Tu likosheni kedilo keshe.” — 2 Ovakorinto 7:1.

6: LONGIFA NAWA EFIMBO LOYE

  • Vahapu opo vaha yandje unene elitulemo kwaasho she va etela oluhodi, ohava mono shi li xwepo okulongifa efimbo mokuninga oinima oyo tai va kwafele vaha diladile unene kombinga yaasho.

  • Oto dulu okumona epepelelo lopakafimbo mokupanga oukaume navamwe noku u kaleka po, okulihonga oinima ipe, ile mokuya keenhele domalihafifo.

  • Mokweendela ko kwefimbo, oinima otai ka xwepopala. Otashi dulika u ka mone kutya efimbo loye lihapu oho li longifa moinima ihapu, ponhele yokukala to diladila kwaasho she ku etela oluhodi. Osho otashi ulike kutya oto ende to kala nawa.

EFINAMHANGO: ‘Ashishe oshi notundi yasho ya pangelwa, efimbo lokulila nefimbo lokuyola, efimbo lokukema nefimbo lokutanha nehafo.’ — Omuudifi 3:1, 4.

7: KALA HO NINGI OINIMA PANDJIKILILE

  • Kala ho ningi oinima pandjikilile, diva ngaashi tashi dulika.

  • Ngeenge owa kala alushe ho kofa nawa, we lipyakidila noilonga nosho yo nomalipyakidilo amwe vali, onghalamwenyo yoye otai ka shuna kouwa.

  • Okukala we lipyakidila noinima i tya sha, otashi ke ku kwafela u ninipike omadiladilo mai.

EFINAMHANGO: “Iha diladila unene omafiku omokukalamwenyo kwaye, shaashi Kalunga okwe mu itavelela ehafo lokomwenyo waye.” — Omuudifi 5:20.

8: HENUKA OKUNINGA DIVA OMATOKOLO MANENE

  • Vahapu ovo va ninga diva omatokolo manene konima eshi va kanifa ovaholike vavo, lwanima ove ke lipa oushima.

  • Ngeenge otashi shiiva, teelela oule wokafimbo, ofimbo ino tembuka, ino konga oilonga imwe, ile ino hanauna po oinima yomuholike woye.

EFINAMHANGO: “Eemhangela dovadiinini tadi eta ouwa auke. Ndelenee omweendeleli keshe te likongele eemhumbwe.” — Omayeletumbulo 21:5

9: DIMBULUKA OMUHOLIKE WOYE

  • Vahapu ovo va nyika oluhodi ohava mono shiwa okuninga oinima oyo tai va dimbulukifa omunhu oo a fya.

  • Otashi dulika u mone tashi hekeleke okwoongela omafano, ile okushanga oiningwanima nosho yo omahokololo oo to dimbuluka.

  • Tuvikila oinima oyo tai ku dimbulukifa omafimbo mawa noku i talulula, ngeenge u wete tashi wapalele.

EFINAMHANGO: “Dimbulukwa omafiku omefimbo lonale.” — Deuteronomion 32:7.

10: TALELA PO EENHELE DONHUMBA

  • Oto dulu oku ka talela po.

  • Ngeenge ito dulu okuya molweendo lile, oto dulu okuninga oshinima shonhumba shihafifa oule ashike wefiku, ile avali, ngaashi okutalela po eeparka, eemisium, okuya komunghulofuta, ile okuya molweendo nookaume.

  • Nokuli nokuninga oshinima sha yooloka ko kwaasho ho ningi shito, otashi dulu oku ku kwafela uha kale unene wa nyika oluhodi.

EFINAMHANGO: “Itu yeni konhele ye likalela opo mu ka fude po kanini.” — Markus 6:31.

 11: KWAFELA VAMWE

  • Dimbuluka kutya efimbo keshe to kwafele vamwe, otashi ku kwafele u kale u udite u li xwepo.

  • Oto dulu okuhovela okukwafela ovo va kumwa kefyo lomuholike woye, ngaashi ookaume, ile ovapambele ovo tashi dulika va pumbwa oo tava lili pamwe navo.

  • Okuyambidida nokuhekeleka vamwe otaku dulu oku ku etela ehafo nosho yo elalakano olo tashi dulika wa pumbwa.

EFINAMHANGO: “Okuyandja ohaku eta ehafo shi dulife okupewa.” — Oilonga 20:35.

12: TALULULA OSHO WA PITIFA KOMESHO

  • Oluhodi otali dulu oku ku kwafela u ude ko nawa osho sha fimana.

  • Longifa omhito oyo, u diladile nghee to shi endifa monghalamwenyo yoye.

  • Ninga omalunduluko mwaasho wa pitifa komesho, ngaashi tashi shiiva.

EFINAMHANGO: ‘Osha wapala okuya meumbo li neefya, shi dule okuya meumbo li noitelekela. Osheshi linya olo exulilo lovanhu aveshe, nomunamwenyo ote shi diladila momwenyo waye.’ — Omuudifi 7:2.

Paushili wo vene, kape na osho tashi dulu okukufa po filufilu ouyehame oo u udite. Kakele kaasho, vahapu ovo va filwa ovaholike vavo otava dulu oku shi koleka kutya okukatuka eenghatu tadi ti sha, ngaashi odo da popiwa moshitukulwa eshi, oshe va kwafela va mone ehekeleko. Oshoshili kutya eenghedi odo hado ashike tadi dulu oku tu kwafela tuha kale twa nyika oluhodi. Ashike ngeenge owa kendabala amwe omomaetepo oo, otashi dulika u ka mone kutya okwe ku etela epepelelo.

^ okat. 13 Oshifo Kala oupafi! inashi popya shi na sha nouhaku wokondadalunde wa kwatela mo oukolele.