1, 2. (a) Jehova okwa popya shike osho tashi ningwa pefimbo letu? (b) Omapulo elipi taa ka nyamukulwa moshitukulwa eshi? (Tala efano pehovelo loshitukulwa.)

JEHOVA okwa popya kutya pefimbo letu “ovalumenhu omulongo vomomalaka aeshe oiwana otava ka kwata koshikutu shomulumenhu Omujuda nokukanyatela ko, ndee tava ti: Ofye otwa hala okweenda pamwe nanye, osheshi ofye otwa uda, nokutya Kalunga e li pamwe nanye.” (Sakaria 8:23) “Omujuda” ota faneke ovo va vaekwa kuKalunga nomhepo iyapuki. Ova ifanwa yo “Israel yaKalunga.” (Ovagalati 6:16) “Ovalumenhu omulongo” otava faneke ovo ve na eteelelo loku ka kala fiyo alushe kombada yedu. Ove shi shii kutya Jehova okwa nangeka noupuna ovavaekwa nove wete kutya oshi li oufembanghenda oku mu longela pamwe navo.

² Ngaashi omuprofeti Sakaria, Jesus okwa ti oshiwana shaKalunga otashi hanganifwa. Okwa popya shi na sha naavo ve na eteelelo lokuya meulu kutya “okangudu,” naavo ve na eteelelo lokukala nomwenyo fiyo alushe kombada yedu “eedi” dimwe. Ashike  Jesus okwa ti kutya otava ka kala “oshiunda shimwe” notave ke mu shikula e li ‘omufita umwe.’ (Lukas 12:32; Johannes 10:16) Molwaashi ope na eengudu mbali, otashi dulika vamwe ve lipule kutya: (1) Mbela eedi dimwe oda pumbwa okushiiva omadina ovavaekwa aveshe ava ve li ko kunena? (2) Ovavaekwa ove na okukala ve litala ko ngahelipi? (3) Ngeenge umwe meongalo letu okwa hovele okulya omungome nokunwa omaviinyu pEdimbuluko, ondi na oku mu tala ko ngahelipi? (4) Mbela ondi na okukala handi lipula unene ngeenge onda mono omuvalu waavo hava li omungome nokunwa omaviinyu pEdimbuluko tau hapupala? Oshitukulwa eshi otashi ka nyamukula omapulo oo.

3. Omolwashike itatu dulu okushiiva lela kutya oolyelye tava ka kala vamwe vomo 144 000?

³ Mbela eedi dimwe oda pumbwa okushiiva omadina ovavaekwa aveshe ava ve li natango kombada yedu kunena? Ahowe. Omolwashike mbela? Omolwaashi kape na oo ta dulu okushiiva lela kutya oolyelye tava ka mona ondjabi yavo. ^[1] (Tala eshangelo pexulilo loshitukulwa.) Nonande Kalunga okwe va vaeka va ye meulu, otava ka pewa ashike ondjabi yavo ngeenge ova kala ovadiinini. Molwaashi osho Satana oku shi shii, ota longifa ‘ovaprofeti ovanaipupulu’ ve “va pukife.” (Mateus 24:24) Ovakriste ovavaekwa itava dulu okukala noushili kutya otava ka mona ondjabi yavo molwaashi Jehova oye ta ka ufa kutya ova kala ovadiinini ile hasho. Jehova oha yandje ondjabi oyo pefyo lavo ile diva fimbo ‘omahepeko manene’ ile oudjuu munene inau hovela. — Ehololo 2:10; 7:3, 14.

4. Ongahelipi mbela eedi dimwe tadi dulu “okweenda pamwe” novavaekwa ngeenge kadi shii omadina ovavaekwa aveshe ovo ve li kombada yedu kunena?

⁴ Ongahelipi mbela eedi dimwe tadi dulu “okweenda pamwe” novavaekwa ngeenge kadi shii omadina ovavaekwa aveshe ovo ve li kombada yedu kunena? Ombiibeli oya ti kutya ‘ovalumenhu omulongo otava ka kwata koshikutu shomulumenhu Omujuda nokukanyatela ko, ndee tava ti: Ofye twa hala okweenda pamwe nanye, osheshi ofye twa uda, nokutya Kalunga e li pamwe nanye.’ Ombibeli otai popi Omujuda umwe, ndele outumbulilo “nanye” nosho yo “pamwe nanye” otau ulike kovanhu vahapu. Osho osha hala okutya Omujuda oo ke fi ashike omunhu umwe ndele oku lile po ovavaekwa aveshe. Osho Eedi dimwe odi shi shii, notadi longele Jehova pamwe nongudu oyo. Inadi pumbwa okushiiva omadina aaveshe ovo vomongudu oyo nokukala tadi yandje elitulemo unene kukeshe umwe womuvo. Jesus oye omukwatelikomesho wetu, nOmbiibeli otai tu lombwele kutya oye ashike tu na okushikula. — Mateus 23:10.

5. Elondwelo lilipi ovavaekwa ve na okudiladila kulo moule, nomolwashike?

⁵ Ovavaekwa ove na okudiladila moule shi na sha nelondwelo olo li li 1 Ovakorinto 11:27-29. (Lesha.) Ongahelipi omuvaekwa ta  dulu okulya omungome nokunwa omaviinyu “nai” pEdimbuluko? Ngeenge ita kaleke po ekwatafano laye naJehova noke fi omudiinini kuye, omunhu a tya ngaho ngeenge ta li omungome ile ta nu omaviinyu otashi ulike kutya ke na efimaneko. (Ovaheberi 6:4-6; 10:26-29) Elondwelo olo otali dimbulukifa ovavaekwa kutya ove na okukala ovadiinini ngeenge ova hala oku ka pewa ‘ondjabi yefindano Kalunga e i ifanena nge neifano lopombada muKristus Jesus.’ — Ovafilippi 3:13-16.

6. Ovakriste ovavaekwa ove na okukala ve litala ko ngahelipi?

⁶ Paulus okwa lombwela Ovakriste ovavaekwa a ti: “Aame omupandekwa mOmwene, ohandi mu kumaida, mu kale nokweenda ngaashi sha wapalela eifano leni mwa ifanwa nalo.” Mbela osho otave shi ningi ngahelipi? Paulus okwa ti: “Mu kale mu nelininipiko nombili nonheni nokulididimikilafana mohole, ndele nye mu hale shili okudiinina oukumwe mOmhepo omekwamo lombili olokumanga kumwe.” (Ovaefeso 4:1-3) Omhepo iyapuki ohai kwafele ovapiya vaJehova va kale ve lininipika ndele hakukala nounhwa. (Ovakolossi 3:12) Onghee hano, ovavaekwa ihava diladila kutya ove li xwepo ve dule vamwe. Ove shi shii kutya Jehova iha pe ovavaekwa omhepo iyapuki ihapu i dule oyo ha pe ovapiya vaye vamwe. Ihava kala yo ve wete kutya otava dulu okuuda ko oshili yOmbiibeli ve dule keshe umwe. Ihava lombwele nande oumwe kutya okwa vaekwa nonokutya na hovele okulya omungome nokunwa omaviinyu pEdimbuluko. Ponhele yaasho, ohava kala ve lininipika nove shii kutya Jehova oye aeke ta dulu okuvaeka ovanhu va ye meulu.

7, 8. Oshike osho ovavaekwa vehe na okuteelela, nomolwashike?

⁷ Nonande ovavaekwa ove shi tala ko shi li oufembanghenda eshi va vaekwa, ihava teelele vamwe va ungaunge navo monghedi ye likalekelwa. (Ovaefeso 1:18, 19; lesha Ovafilippi 2:2, 3.) Ove shi shii yo kutya eshi Jehova e va vaeka, ine shi ninga shi shiivike kukeshe umwe. Onghee hano, omuvaekwa iha kala eshi kuminwa ngeenge ope na oo ite shi itavele kutya okwa vaekwa. Oku shi shii kutya Ombiibeli oya ti inatu endelela okwiitavela umwe oo ta ti okwa pewa oshinakuwanifwa she likalekelwa kuKalunga. (Ehololo 2:2) Molwaashi omuvaekwa ina teelela vamwe va kale tave mu pe elitulemo lihapu, ita ka kala ta lombwele keshe umwe oo ta shakeneke kutya okwa vaekwa. Hano otashi dulika ite ke shi lombwela nande omunhu. Ite ke litadela yo oinima iwa oyo ta ka ninga meulu. — 1 Ovakorinto 1:28; lesha 1 Ovakorinto 4:6-8.

⁸ Ovakriste ovavaekwa ihava kala ve udite kutya ove na ashike okukala hava kala novavaekwa vakwao, va fa ve liyoolola ko. Ihava kendabala okukonga ovavaekwa vakwao opo va popye kombinga yoinima oyo ye va pamba ile va shakene moungudu opo va konakone Ombiibeli. (Ovagalati 1:15-17) Ngeno okwa li ovavaekwa osho hava ningi ngaho, ngeno eongalo inali hangana. Kungaho ngeno itava longo metwokumwe nomhepo iyapuki oyo hai kwafele oshiwana shaKalunga shi kale shi na ombili noukumwe. — Lesha Ovaroma 16:17, 18.

9. Omolwashike wa pumbwa okulungamena onghedi omo ho ungaunga naavo hava li omungome nohava nu omaviinyu pEdimbuluko? (Tala oshimhungu:  Ohole “ihai holoka nai.”)

⁹ Ongahelipi tu na okuungaunga novamwatate novamwameme ovavaekwa? Jesus okwa  lombwela ovahongwa vaye a ti: “Amushe ovamwainafana.” Okwa weda ko a ti: “Ndele ou te linenepeke, oye ta ninipikwa, naau te lininipike, ye ota nenepekwa.” (Mateus 23:8-12) Onghee hano, osha puka okukala wa fimaneka omunhu sha pitilila, nonande oku li omuvaekwa. Ngeenge Ombiibeli tai popi kombinga yovakulunhuongalo, otai tu ladipike tu hopaenene eitavelo lavo, ashike inai tu lombwela tu tale ko nande oumwe a fa ohamba yetu. (Ovaheberi 13:7) Oshoshili kutya Ombiibeli otai popi kombinga yaavo ve “lilongela okufimanekwa.” Osho osho shi li ngaho molwaashi ‘ohava lele nawa’ nove “li moshilonga shondjovo ndee tava longo,” ndele hamolwaashi ve li ovavaekwa. (1 Timoteus 5:17) Ngeenge otwa kala hatu fimaneke ovavaekwa sha pitilila ohatu va fifa ohoni, ile nokuli tu va ningife va kale ve na ounhwa. (Ovaroma 12:3) Kape na nande oumwe womufye ta kala a hala okuninga sha osho tashi dulu okuningifa ovamwaxe vaKristus ovavaekwa va ninge epuko la tya ngaho. — Lukas 17:2.

10. Ongahelipi to dulu okuulika kutya owa fimaneka Ovakriste ovavaekwa?

¹⁰ Ongahelipi hatu dulu okuulika kutya otwa fimaneka ovo va vaekwa kuJehova? Omokuhe va pula kutya osha enda ngahelipi opo va ninge ovavaekwa. Okuvaekwa oku li oshinima shopaumwene osho tuhe na oufemba woku shi shiiva. (1 Ovatessaloniki 4:11; 2 Ovatessaloniki 3:11) Katu na okufika pexulifodiladilo kutya ovashamane ile ovakulukadi, ovadali ile oilyo yomaukwaneumbo avo nayo oi li ovavaekwa. Eteelelo lomunhu lokuya meulu ile lokukala kombada yedu itali dulu okufyuululwa. (1 Ovatessaloniki 2:12) Katu na yo okukala hatu pula vakwetu omapulo oo tae va udifa nai. Pashihopaenenwa, itatu ka pula omukulukadi womuvaekwa kutya oku udite ngahelipi eshi ta ka kala fiyo alushe kombada yedu ehe li nomushamane waye. Shimwe ashike osheshi kutya, otu na oushili kutya mounyuni mupe Jehova ota ka ‘palula oinamwenyo aishe kohokwe yaye.’ — Epsalme 145:16.

11. Ongahelipi hatu dulu okuliamena ngeenge otwa henuka okutumbaleka vamwe?

¹¹ Ngeenge otwa kala ihatu tale ko ovavaekwa va tumbala ve dule vamwe, ohatu ke liamena yo fye vene. Ngahelipi mbela? Ombiibeli otai ti kutya otashi dulika meongalo mu kale ‘ovamwatate ovanaipupulu,’ ovo tashi dulika ve litye ovavaekwa. (Ovagalati 2:4, 5; 1 Johannes 2:19) Shikwao vali, ovavaekwa vamwe otashi dulika va kale vehe fi ovadiinini. (Mateus 25:10-12; 2 Petrus 2:20, 21) Ashike ngeenge otwa henuka okutumbaleka vamwe itatu ka shikula ovanhu kutya nee ovovo vavaekwa, ovo va shiivika nawa ile ovo va longela Jehova oule wefimbo lile. Kungaho, nonande ova kale vehe fi vali ovadiinini ile va fiya po eongalo, itatu ka kanifa eitavelo ile tu efe po okulongela Jehova. — Judas 16.

12, 13. Omolwashike tuhe na okukala hatu lipula nomuvalu waavo hava li omungome nokunwa omaviinyu pEdimbuluko?

¹² Oule womido dihapu da pita, omuvalu waavo hava li omungome nohava nu omaviinyu owa kala tau shuna pedu. Ashike mefimbo opo la di ko omuvalu oo owa hovela vali okuya pombada keshe odula. Mbela sho oshi na oku tu limbililika? Ahowe. Natu ka taleni kutya omolwashike.

 ¹³ “Omwene ava vaye oku va shii.” (2 Timoteus 2:19) Mepingafano naJehova, ovamwatate ovo hava valula ovanhu ovo hava li omungome nokunwa omaviinyu pEdimbuluko kave shii kutya olyelye a vaekwa shili. Omuvalu oo owa kwatela mo ovo tava diladila kutya navo ovavaekwa nonande inava vaekwa shili. Pashihopaenenwa, vamwe ovo va li hava li omungome nokunwa omaviinyu ihave shi ningi vali. Vamwe otashi dulika ve na oupyakadi wopamadiladilo ile wopamaliudo nohava diladila kutya otava ka pangela meulu pamwe naKristus. Osha yela kutya katu shi shii lelalela kutya ovavaekwa vangapi veliko kombada yedu kunena.

14. Ombiibeli oya ti shike shi na sha nomuvalu wovavaekwa ovo tava ka hangwa kombada yedu eshi oudjuu munene tau ka hovela?

¹⁴ Otapa ka hangwa ovavaekwa moitukulwa ihapu kombada yedu eshi Jesus te ke uya oku va twala meulu. Ombiibeli oya ti kutya Jesus ‘ota tumu ko ovaengeli vaye ve nomanghuma e neendaka dopombada, ndee tava ongele ko ovahoololwa vaye keembinga nhe, okominghulo deulu fiyo odikwao.’ (Mateus 24:31) Ombiibeli otai ulike yo kutya pefimbo lomafiku axuuninwa, kombada yedu otaku ka kala ashike ovavaekwa vanini. (Ehololo 12:17) Ashike inai popya kutya vangapi tava ka kala po eshi oudjuu munene tau ka hovela.

15, 16. Oshike tu na okuuda ko shi na sha no 144 000 ovo va hoololwa kuJehova?

¹⁵ Jehova oye mwene ha tokola kutya onaini ta hoolola ovavaekwa. (Ovaroma 8:28-30) Jehova okwa hovela okuhoolola ovavaekwa konima eshi Jesus a nyumuka. Osha fa shi li ngaha kutya mefelemudo lotete,  Ovakriste vashili aveshe ova li ovavaekwa. Oule womido omafele konima yaasho, vahapu vomwaavo va li tave liti Ovakriste kava li naanaa va shikula Kristus. Ashike nande ongaho, pefimbo lomido odo, Jehova okwa li a vaeka ovo va li Ovakriste vashili. Ova li va fa oilya oyo Jesus a popya kutya otai ka kulila mokati keu. (Mateus 13:24-30) Opo nee momafiku axuuninwa Jehova okwa twikila okuhoolola ovanhu va ka kale vomo 144 000. ^[2] (Tala eshangelo pexulilo loshitukulwa.) Onghee hano, ngeenge Kalunga okwa tokola okuhoolola vamwe vomuvo lwopexulilo, kape na omalimbililo kutya ota ningi oshinima shi li mondjila. (Jesaja 45:9; Daniel 4:35; lesha Ovaroma 9:11, 16.) ^[3] (Tala eshangelo pexulilo loshitukulwa.) Otu na okulungama tuha katuke ngaashi ovanailonga vamwe ovo va li tava ngongota shi na sha nonghedi omo omwene wavo a ungaunga naava va li va hovela okulonga peevili dokomudimbukilo. — Lesha Mateus 20:8-15.

¹⁶ Hakeshe umwe oo e na eteelelo lokuya meulu ta longo e li “omupiya omudiinini nomunaendunge.” (Mateus 24:45-47) Ngaashi ashike sha li mefelemudo lotete, Jehova naJesus kunena otava longifa ovanhu vanini va palule ile va honge vahapu. Ovakriste ashike vanini va li va longifwa mefelemudo lotete va shange Omishangwa dopaKriste dOshigreka. Kunena, Ovakriste ashike ovavaekwa vanini ve na oshinakuwanifwa shokupa oshiwana shaKalunga “oikulya pefimbo” la wapala.

17. Owe lihonga shike moshitukulwa eshi?

¹⁷ Oshike twe lihonga moshitukulwa eshi? Jehova okwa tokola okuyandja omwenyo waalushe kwaavo tava ka kala kombada yedu nosho yo kwaavo tava ka pangela pamwe naJesus. Jehova ota ka yandja ondjabi kovapiya vaye aveshe, “Omujuda” nosho yo “ovalumenhu omulongo,” nokwa teelela va dulike keemhango da faafana nova kale ovadiinini. Aveshe ove na okukala ovalininipiki, nove na oku mu longela moukumwe nova hangana. Ove na yo okulongela kumwe opo va kaleke po ombili meongalo. Eshi hatu ehene popepi elela nexulilo, atusheni natu twikileni okulongela Jehova nokushikula Kristus tu li oshiunda shimwe.