Embo laMateus 26:1-75
-
Ovapristeri tava kundafana va dipae Jesus (1-5)
-
Omaadi edimba liwa a tilwa momutwe waJesus (6-13)
-
Opaasa yaxuuninwa nokukengelelwa (14-25)
-
Okudikwa po kwOuvalelo wOmwene (26-30)
-
Petrus ta xunganekwa kutya ote ke lidimbika Jesus (31-35)
-
Jesus ta ilikana muGetsemane (36-46)
-
Jesus ta kwatwa po (47-56)
-
Jesus ta pangulwa mOmhangu yoPombada yOvajuda (57-68)
-
Petrus te lidimbike Jesus (69-75)
26 Eshi Jesus a mana okupopya oinima aishe oyo, okwa lombwela ovahongwa vaye ta ti:
2 “Omu shi shii kutya okudja paife oku na omafiku avali opo ku danwe Opaasa, nOmona womunhu ota ka yandjwa a valelwe komuti.”
3 Opo nee ovapristeri ovakulunhu novakulunhu voshiwana ova ongala momukala weumbo lomupristeri munene wedina Kajafas,
4 ndele ova kundafana va kwate po Jesus moku mu ningifa* a popye sha sha puka opo va dule oku mu dipaa.
5 Ndele ova tya: “Inatu mu kwata po pefimbo loshivilo opo paha holoke epiyaano mokati kovanhu.”
6 Fimbo Jesus a li muBetania meumbo laSimon, oo a li omunashilundu,
7 kuye okwe uya omukainhu umwe e na oshanga yomaadi* ondilo edimba liwa, ndele ta hovele oku a tila momutwe waye fimbo a li ta li.*
8 Eshi ovahongwa ve shi mona, ova handuka ndele tava ti: “Omolwashike omaadi taa hepifwa?
9 Ngeno okwa landifilwe po koimaliwa ihapu, ndele tai pewa eehepele.”
10 Eshi Jesus a uda osho tava popi, okwa tya kuvo: “Omolwashike mwa hala okuhandukifa omukainhu ou? Okwa longela nge oshilonga shiwa.
11 Eehepele odi li punye alushe, ndele ame itandi ka kala alushe punye.
12 Eshi a tila omaadi aa edimba liwa kolutu lange, okwe shi ninga a longekide olutu lange eshi handi ka fya.
13 Oshili ohandi mu lombwele, keshe apa onghundana ei iwa tai udifwa mounyuni aushe, oshilonga eshi omukainhu ou a longa nasho otashi ka hepaululwa opo a dimbulukiwe.”
14 Ndele umwe womwaavo omulongo navavali, oo ha ifanwa Judas Iskariot, okwa ya kovapristeri ovakulunhu,
15 ndele ta ti: “Otamu pe nge shike ngeenge onda yandje Jesus momake eni?” Opo nee ove mu udanekela ve mu pe oimaliwa yoisilveri 30.
16 Okudja opo, okwa kala ta kongo omhito tai wapalele opo a kengelele Jesus.
17 Ndele mefiku lotete lomingome inadi ya efulika, ovahongwa ove uya kuJesus, tava ti: “Openi wa hala tu ke ku longekidile ouvalelo wOpaasa?”
18 Opo nee okwa tya: “Indeni moshilando komulumenhu wonhumba ndele tamu ti kuye, ‘Omuhongi okwa ti: “Eufwafimbo lange oli li popepi; ohandi ka danena Opaasa pamwe novahongwa vange meumbo loye.”’”
19 Ndele ovahongwa ova ninga naanaa ngaashi Jesus e va lombwela nova longekida Opaasa.
20 Eshi kwa toka, Jesus okwa kala omutumba poshitaafula pamwe novahongwa vaye 12.
21 Ofimbo tava li, okwa tya: “Oshili ohandi mu lombwele, umwe womunye ota ka kengelela nge.”
22 Opo nee ova nyika oluhodi unene, ndele keshe umwe ta hovele oku mu pula, ta ti: “Omwene, haame ndi shii?”
23 Okwa nyamukula a ti: “Ou ta velele oshita naame metiti, oye ta ka kengelela nge.
24 Oshili, Omona womunhu ota ka fya ngaashi pa shangwa kombinga yaye, ndele woo omunhu ou te mu kengelele! Oshixwepo ngeno ka dalelwe.”
25 Ndele Judas, oo a li poku mu kengelela, okwa ti: “Muhongi,* haame ndi shii?” Jesus okwa tya kuye: “Enyamukulo ou li shii.”
26 Ndele ofimbo va li tava li, Jesus okwa kufa omungome, nokonima eshi a ilikana okwe u pambula, ndele te u pe ovahongwa vaye, ta ti: “Tambuleni, lyeni. Omungome ou otau faneke olutu lange.”
27 Opo nee okwa kufa eholo, ta pandula noku li va pa, ta ti: “Nweni mo amushe,
28 osheshi otali faneke ‘ohonde yange yehangano,’ oyo tai tilwashi omolwokudima po omatimba avahapu.
29 Ndele ohandi mu lombwele: Okudja nena eli itandi ka nwa vali nandenande omaviinyu aa fiyo efiku olo handi ke a nwa mape pamwe nanye mOuhamba waTate.”
30 Xuuninwa, eshi va imba omaimbilohambelelo,* ova dja mo ndele tava i kOmhunda yEemono.
31 Opo nee Jesus okwa tya kuvo: “Amushe otamu ka fiya nge po oufiku wonena, osheshi opa shangwa: ‘Ohandi ka denga omufita, needi doufita otadi ke lihana.’
32 Ndele shimha nda nyumuka, ohandi ke mu tetekela kuGalilea.”
33 Opo nee Petrus okwe mu nyamukula ta ti: “Nande vakwetu aveshe nave ku fiye po omolwoshinima osho to ka ningilwa, ame nghi na fiku ndi ku fiye po!”
34 Jesus okwa tya kuye: “Oshili ohandi ku lombwele, oufiku ou, fimbo ekondobolo inali kwena, oto ke lidimbika nge lutatu.”
35 Petrus okwa tya kuye: “Kutya nee otashi pula ndi fye pamwe naave, itandi ke ku lidimbika nande.” Ovahongwa vakwao aveshe navo ova popya sha faafana.
36 Ndele Jesus okwa ya novahongwa vaye konhele hai ifanwa Getsemane, opo nee okwa tya kuvo: “Kaleni omutumba apa fimbo handi i kwinya ndi ka ilikane.”
37 Opo nee okwa kufa Petrus novana vaSebedeus vavali, ndele okwa hovela okunyika oluhodi neenghono.
38 Okwa tya kuvo: “Onda* nyika oluhodi neenghono, nokuli fiyo okufya. Kaleni apa, nokukala oupafi pamwe naame.”
39 Ndele okwa ehena komesho kanini, te linyongamene pedu, ndele ta ilikana, ta ti: “Tate, ngeenge otashi dulika, eholo eli nali pitilile nge po. Ashike, hangaashi ame nda hala, ndele ongaashi ove wa hala.”
40 Opo nee okwa alukila kovahongwa vaye ndele okwe va hanga va kofa, ndele ta ti kuPetrus: “Hano itamu dulu okukala oupafi nande ovili imwe pamwe naame?
41 Kaleni oupafi nokukala tamu ilikana opo muha ye momayeleko. Oshoshili kutya omhepo oya halelela, ndele ombelela oi na ounghundi.”
42 Opo nee okwa shuna ko olutivali, ndele ta ilikana ta ti: “Tate, ngeenge itashi dulika eholo eli li koye nge inandi li nwa, ehalo loye nali wanifwe.”
43 Ndele okwe uya vali nokwe va hanga va kofa, osheshi omesho avo okwa li a dinda keemhofi.
44 Okwa shuna ko vali, ndele ta ilikana olutitatu, a popyulula eendjovo da faafana.
45 Opo nee okwa alukila kovahongwa, ndele ta ti kuvo: “Eli halo efimbo lokukofa nokufuda po! Taleni! Efimbo ola fika Omona womunhu a yandjwe momake ovalunde.
46 Fikameni tu yeni. Taleni! Ou ta kengelele nge oku li popepi.”
47 Ofimbo a li natango ta popi, Judas, umwe womwaavo omulongo navavali, okwe uya pamwe nongudu inene i na omaongamukonda needibo, va tumwa kovapristeri ovakulunhu nokovakulunhu voshiwana.
48 Ndele omukengeleli waye okwe va pa edidiliko, ta ti: “Ou handi xupita, oye ngaho; mu kwateni po.”
49 Opo nee Judas okwa ya a yukilila kuJesus, nokwa tya kuye: “Muhongi,* wa tokelwa po!” Ndele te mu xupita.
50 Jesus okwa tya kuye: “Kaume, owe uya okuninga shike apa?” Opo nee ova ehena kuJesus ndele tave mu kwata po.
51 Ndele tala, umwe womwaavo va li naJesus okwa kwata eongamukonda laye ndele te li pweya mo, nokuteta ko okutwi kwomupiya womupristeri munene.
52 Opo nee Jesus okwa tya kuye: “Shunifa mo eongamukonda loye moshilaleko, osheshi aveshe ava tava longifa eongamukonda otava ka fya keongamukonda.
53 Ile oto diladila kutya itandi dulu okwiindila Tate a tumine nge mepakumo leisho ovaengeli omayovi?*
54 Ndele ngeenge onda ningi ngaho, omishangwa otadi ka wanifwa ngahelipi odo tadi ti kutya osho shi na okuningwa ngaho?”
55 Pefimbo opo tuu opo Jesus okwa tya keengudu dovanhu: “Omwe uya okukwata nge po mu na omaongamukonda needibo mwa fa mwe uya okukwata po ombudi? Efiku nefiku onda li handi kala omutumba motembeli handi hongo, ashike inamu kwata nge po.
56 Ndele aishe oyo oya ningwa, opo osho sha shangwa* kovaprofeti shi wanifwe.” Opo nee ovahongwa aveshe ove mu fiya po, va ya onhapo.
57 Ovo va kwata po Jesus ove mu twala keumbo laKajafas, omupristeri munene, oko kwa li kwa ongala ovanongo vomishangwa novakulunhu voshiwana.
58 Petrus okwa kala te mu shikula e li konima kokule fiyo omomukala womupristeri munene. Eshi a ya mo, okwa kala omutumba povapiya opo a tale osho tashi ningwa po.
59 Ndele ovapristeri ovakulunhu noilyo aishe ikwao yOmhangu yoPombada yOvajuda ova li va konga ovanhu va totele Jesus omahokololo oipupulu opo va dule oku mu dipaa.
60 Ashike inava mona nande oumwe, nonande opa li pa holoka eembangi doipupulu dihapu. Xuuninwa ope ke uya mbali,
61 ndele tadi ti: “Omulumenhu ou okwa tile, ‘Ohandi dulu okungumauna po otembeli yaKalunga noku i tungulula omafiku atatu.’”
62 Opo nee omupristeri munene okwa fikama, ndele ta ti kuye: “Ito nyamukula sha? Ku udite ko hano eshi ovalumenhu ava tave ku hokololifa?”
63 Ndele Jesus okwa kala ashike a mwena. Opo nee omupristeri munene okwa tya kuye: “Ohandi ku anifa kuKalunga omunamwenyo u tu lombwele ngeenge oove Kristus, Omona waKalunga!”
64 Jesus okwa tya kuye: “Osho naanaa ngaashi wa popya. Ndele ohandi mu lombwele: Okudja paife otamu ka mona Omona womunhu e li omutumba kolulyo laKalunga Omunaenghono note uya moilemo yokeulu.”
65 Eshi omupristeri munene eshi uda, okwa pombaula oshikutu shaye shokombada, ndele ta ti: “Omulumenhu ou okwa sheka Kalunga! Omolwashike twa pumbwa vali okukonga eembangi? Taleni! Nanye omwe mu uda eshi ta sheke Kalunga.
66 Otamu ti ngahelipi?” Ova nyamukula tava ti: “Okwa wana okufya.”
67 Opo nee ove mu fiila omate moshipala noku mu denga neengonyo. Vamwe ove mu denga nomanghava moshipala,
68 tava ti: “Kristus, tu xunganekela, olyelye e ku denga?”
69 Ndele Petrus okwa li omutumba pondje momukala, nokakadona kamwe okapiya oke uya kuye, ndele taka ti: “Naave owa li pamwe naJesus Omugalilea!”
70 Ashike okwe likala moipafi yaaveshe, ta ti: “Nghi shii kutya oto popi kombinga yashike.”
71 Eshi a ya a finda koshivelo, okakadona kamwe vali oke mu mona, ndele taka ti kwaavo ve li po: “Omulumenhu ou okwa li pamwe naJesus Omunasaret.”
72 Natango okwe shi likala nokwaana ta ti: “Omulumenhu nghi mu shii!”
73 Konima yokafimbo, ovo va li ofika ove uya, ndele tava ti kuPetrus: “Oshili naave yo oumwe womuvo, osheshi elaka loye* ole ku holola.”
74 Ndele okwa hovela okulifingaela nokwaana ta ti: “Omulumenhu nghi mu shii!” Opo nee diva ekondobolo ola kwena.
75 Petrus okwa dimbuluka osho Jesus a li e mu lombwela, a ti: “Fimbo ekondobolo inali kwena, oto ke lidimbika nge lutatu.” Opo nee okwa ya pondje nokwa lila unene.
Eshangelo lopedu
^ Ile “kengelela.”
^ Ile “okakende komaadi.”
^ Ile “a li omutumba poshitaafula.”
^ Ile “Rabbi.”
^ Ile “omapsalme.”
^ Ile “Omwenyo wange owa.”
^ Ile “Rabbi.”
^ Eln., “eengudu 12 dovaengeli.”
^ Ile “opo omishangwa.”
^ Ile “onghedi yokupopya.”
