Embo laMateus 19:1-30
19 Eshi Jesus a mana okupopya oinima oyo, okwa dja ko kuGalilea ndele ta i keengaba daJudea a tauluka Jordan.
2 Okwa li yo a shikulwa keengudu dinene dovanhu, ndele ta velula ovo va li tava vele.
3 Opo nee Ovafarisai ove uya kuye, ndele tave mu pula va hala oku mu yeleka, tava ti: “Oshi li tuu pamhango omulumenhu a teye ohombo nomukulukadi waye omolwoshinima keshe?”
4 Okwa nyamukula a ti: “Hamba inamu lesha kutya ou e va shita pehovelo okwe va shita omulumenhu nomukainhu?
5 Nokwa ti: ‘Nomolwaasho omulumenhu oku na okufiya po xe naina, ndele ta kanyatele komukulukadi waye, ndele tava ningi onhumba imwe.’
6 Onghee kave fi vali vavali, ndele onhumba imwe. Hano osho Kalunga a tula kumwe, inashi kufwa kumwe komunhu.”
7 Ova tya kuye: “Omolwashike hano Moses a yandja elombwelo opo pa yandjwe ombapila yeteyohombo ngeenge omukulukadi ta hengwa po?”
8 Okwa tya kuvo: “Moses okwe mu pitika mu teye ohombo novakulukadi veni omolwoukukutu womitima deni, ashike osho hasho sha li ngaho okudja pehovelo.
9 Ohandi mu lombwele kutya keshe ou ta teya ohombo nomukulukadi waye omolwoshinima shimwe shihe fi oluhaelo,* ndele ta hombola umwe, ota haele.”
10 Ovahongwa ova tya kuye: “Ngeenge omulumenhu osho e na okukala nomukulukadi waye ngaho, mboli inashi wapala okuhombola.”
11 Okwa tya kuvo: “Havanhu aveshe tava dulu okuninga ngaho, ndele ovovo ashike ve na oshali.*
12 Osheshi ope na ovo nghee va dalwa ovalutulwa, naavo va ningwa ovalutulwa kovanhu, nope na yo ovalutulwa ovo ve lininga vo vene ovalutulwa omolwOuhamba womeulu. Ou ta dulu oku shi ninga ne shi ninge.”
13 Ndele kuye okwa li kwa etwa ounona e va tenheke omake* nokwiilikana, ashike ovahongwa ova li tave va kelele.
14 Onghee hano, Jesus okwa ti: “Efeni ounona ve uye kwaame, inamu va kelela ko. Osheshi Ouhamba womeulu owaava ve li ngaashi vo.”
15 Opo nee okwe va tenheka omake, ndele ta i.
16 Ndele tala, kuye okwe uya omulumenhu omunyasha, ndele ta ti: “Omuhongi, ondi na okulonga shike shiwa opo ndi ka mone omwenyo waalushe?”
17 Okwa tya kuye: “Omolwashike to pula nge kombinga yaasho shiwa? Kalunga oye aeke ta dulu okuufa osho shiwa.* Ndele ngeenge owa hala okumona omwenyo, kala ho dulika koipango.”
18 Okwa ti kuye: “Ilipi po?” Jesus okwa ti: “Ino dipaa, ino nyona ohombo, ino vaka, ino popya oipupulu,
19 fimaneka xo nanyoko, nokukala u hole mukweni ngaashi u lihole mwene.”
20 Omulumenhu oo omunyasha okwa tya kuye: “Aishe oyo onda kala handi dulika kuyo; oshike vali ndi na okuninga?”
21 Jesus okwa tya kuye: “Ngeenge owa hala okukala wa wanenena,* inda u ka landife po oinima yoye ndele oimaliwa to i yandje keehepele, opo u kale u na emona meulu, ndele to uya u ninge omushikuli wange.”
22 Omulumenhu oo omunyasha eshi e shi uda, okwa ya a nyika oluhodi, molwaashi okwa li e na eliko lihapu.
23 Opo nee Jesus okwa lombwela ovahongwa vaye, a ti: “Oshili ohandi mu lombwele kutya oshidjuu koshipuna okuya mOuhamba womeulu.
24 Natango ohandi mu lombwele, oshipu kongamelo okupita meyulu longwiya shi dulife okuya kwoshipuna mOuhamba waKalunga.”
25 Eshi ovahongwa ve shi uda, ova li va kumwa neenghono, nova tya: “Olyelye hano ta dulu okuxupifwa?”
26 Jesus okwe va tala, ndele ta ti kuvo: “Pataleko lopanhu osho itashi shiiva, ashike kuKalunga aishe otai shiiva.”
27 Opo nee Petrus okwe mu pula ta ti: “Tala, otwa fiya po oinima aishe ndele hatu ku shikula; mbela oshike hatu ka mona?”
28 Jesus okwa tya kuvo: “Oshili ohandi mu lombwele, meshitululo, ngeenge Omona womunhu a kala omutumba kolukalwapangelo laye liyapuki, ovo mwa shikula nge otamu ka kala omutumba komalukalwa 12, ndele tamu ka tokola omapata 12 aIsrael.
29 Ndele aveshe ovo va fiya po omaumbo, ile ovamwainamati, ile ovamwainakadona, ile ooxe, ile ooina, ile ounona, ile omapya omolwedina lange, otava ka mona oinima oyo lwefele, notava ka fyuulula omwenyo waalushe.
30 “Ndele vahapu ovo votete otava ka ninga vaxuuninwa, naavo vaxuuninwa otava ka ninga votete.
Eshangelo lopedu
^ MOshigreka, “porneia.” Tala omafatululo oitya.
^ Sha hala okutya, oshali yokukala ino hombola ile ino hombolwa.
^ Ile “e va yambeke.”
^ Eln., “Oku na ashike umwe aeke ou muwa.”
^ Ile “oku i wanifa po filufilu.”
