Embo laMateus 11:1-30

  • Johannes Omuninginifi ta tangwa (1-15)

  • Epupi lihe na eitavelo tali tokolwa (16-24)

  • Jesus ta tange Xe eshi e hole ovalininipiki (25-27)

  • Ondjoko yaJesus otai tulumukifa (28-30)

11  Eshi Jesus a mana okuyandja omalombwelo kovahongwa vaye 12, okwa ya moilando yopoushiinda opo a ka honge nokuudifila ovanhu.  Ofimbo Johannes a li modolongo, okwa uda oilonga yaKristus, ndele ta tumu ovahongwa vaye  ve ke mu pule kutya: “Oove tuu ou u na okuuya, ile otu na okuteelela umwe e lili?”  Jesus okwe va nyamukula ta ti: “Indeni mu ka lombwele Johannes osho mwa uda naasho mwa mona:  Ovapofi paife ove wete ko, oingudu otai ende, ovanashilundu otava velulwa, ovafitamatwi ove udite ko, ovafi otava nyumunwa neehepele otadi udifilwa onghundana iwa.  Ou ita limbililwa nge* ota kala a hafa.”  Fimbo tava i, Jesus okwa hovela okupopya neengudu dovanhu kombinga yaJohannes ta ti: “Omwa ka talele shike mombuwa? Mbela olumbungu tali telaanifwa komhepo?  Oshike naanaa mwa ka talele? Mbela omulumenhu a djala oikutu yondilo?* Ovo hava djala oikutu yondilo ohava kala momaumbo eehamba.  Omolwashike hano mwa ile mombuwa? Kamwa li mwa ka tala hamba omuprofeti? Ashike ohandi mu lombwele, ye oku dule kokule omuprofeti. 10  Oye a popiwa eshi kwa shangwa taku ti: ‘Tala, ame ohandi tumu omutumwa wange e ku tetekele,* oo te ke ku longekidila ondjila!’ 11  Oshili ohandi mu lombwele, mwaava va dalwa kovakainhu kamu na nande oumwe e dule Johannes Omuninginifi, ashike omunhu ou munini mOuhamba womeulu oku mu dule. 12  Okudja pefimbo laJohannes Omuninginifi fiyo opaife, ovanhu otava kendabala okuya mOuhamba womeulu, naavo tava kendabala noudiinini otava i mo. 13  Omhango nOvaprofeti aveshe ova xunganeka fiyo opefimbo laJohannes; 14  kutya nee omwa hala oku shi itavela ile hasho, Johannes oye ‘Elia oo a popiwa kovaprofeti kutya ote uya.’ 15  Ou e na omatwi, na ude ko. 16  “Epupi eli ohandi li yelekanifa nashike? Ola fa ounona ve li omutumba pomalandifilo tava ingida vakwao, 17  tava ti: ‘Otwe mu shikila eenyalilo, ndele inamu dana; otwa imba omaimbilo eenghali, ashike inamu lila.’* 18  Sha faafana, Johannes okwe uyile ita li noita nu, ndele ovanhu ova ti, ‘Oku na ondemoni.’ 19  Omona womunhu okwe uya ta li nota nu, ndele ovanhu ova ti, ‘Tala, omulumenhu ou omufukenhu nongholwe,* kaume kovafendelifi nokovalunde.’ Ashike ounongo ohau hololwa koilonga* yao ya yuka.” 20  Opo nee okwa hovela okuyandja oushima koilando omo a longa oikumwifilonga ihapu, molwaashi inai lidilulula. 21  Okwa ti: “Woo ovanhu vomuKorasin! Woo ovanhu vomuBetsaida! Molwaashi ngeno ovanhu vomoilando yaTirus naSidon ova monene oikumwifilonga oyo, ngeno ove lidilulula nale ndele tava djala eeshako nokulivaeka omute. 22  Ndele ohandi mu lombwele, mEfiku lEtokolo, ehandukilo leni otali ka kala linene li dulife laTirus naSidon. 23  Ove Kapernaum, mbela oto ka tumbalekwa u ye meulu? Oto ka kulukila mOmbila,* molwaashi oikumwifilonga oyo ya longwa mwoove ngeno oya longelwe muSodom, ngeno oko e li fiyo okefiku eli. 24  Ndele ohandi ku lombwele, mEfiku lEtokolo, ehandukilo loye otali ka kala linene li dulife laSodom.” 25  Opo nee Jesus okwa popya pefimbo olo a ti: “Tate, Omwene weulu nedu, ohandi ku tange moipafi yaaveshe, molwaashi oinima ei owe i holeka ovanaendunge novahongwanhu, ndele owe i hololela ounona vanini. 26  Heeno Tate, molwaashi eshi oshe ku wapalela. 27  Oinima aishe Tate okwe i pa nge, ndele kape na nande ou e shii Omona filufilu kakele kuTate; kape na yo ou e shii filufilu Tate, kakele kOmona nakeshe oo Omona a hala oku mu hololela Xe. 28  Ileni kwaame amushe ava hamu longo nomwa lolokifwa, opo ndi mu tulumukife. 29  Humbateni ondjoko yange nokulihonga kwaame, osheshi ame ondi na omwenyo muwa, nomomutima onde lininipika, opo nee otamu ke limonena etulumuko. 30  Osheshi ondjoko yange oiwa,* nomutengi wange omupu.”

Eshangelo lopedu

Eln., “ite lipumu mwaame nokulidenga po.”
Ile “youdjeko?”
Eln., “komesho yoye.”
Ile “lidenga meenhulo opo mu ulike kutya omwa nyika oluhodi.”
Eln., “nomufinyuni womaviinyu.”
Ile “koidjemo.”
Ile “mo-Hades,” sha hala okutya koufi. Tala omafatululo oitya.
Ile “oipu okuhumbata.”