Levitikus 23:1-44
-
Omafiku mayapuki noivilo (1-44)
23 Jehova okwa twikila okupopya naMoses, ta ti:
2 “Popya nOvaisrael u va lombwele kutya, ‘Oivilo yokomudo yaJehova oko mu na okushiva ovanhu oi li oyoongalele iyapuki. Ei oivilo yange yokomudo:
3 “‘Oilonga oi na okulongwa oule womafiku ahamano, ashike mefiku etiheyali eshabata lokufuwa po filufilu, oshoongalele shiyapuki. Itamu dulu okulonga oilonga yoludi keshe. Oli na okukala eshabata kuJehova keshe apa tamu ka kala.
4 “‘Ei oivilo yokomudo yaJehova, oyoongalele iyapuki, oyo mu na okushiivifa peufwafimbo layo:
5 Mefiku eti-14, momwedi wotete, eshi taku wiwile,* Opaasa yaJehova.
6 “‘Mefiku eti-15 lomwedi oo, Oshivilo shOmingome inadi ya Efulika kuJehova. Omu na okulya omingome inadi ya efulika oule womafiku aheyali.
7 Mefiku lotete, omu na okudana oshoongalele shiyapuki. Kamu na okulonga oilonga keshe idjuu.
8 Ashike omu na okuyambela Jehova omayambo okupitila momundilo oule womafiku aheyali. Otaku ka kala oshoongalele shiyapuki mefiku etiheyali. Kamu na okulonga oilonga keshe idjuu.’”
9 Jehova okwa twikila okupopya naMoses, ta ti:
10 “Popya nOvaisrael u tye kuvo, ‘Ngeenge omwe uya medu olo handi ke mu pa, ndele tamu teya omapya eni, omu na okweeta komupristeri oshipandi shoilya oyo ya pya tete.
11 Omupristeri ota ka dungadungifa oshipandi osho koshipala shaJehova, opo mu kale mwa hokiwa. Oku na oku shi dungadungifa mefiku olo tali shikula Eshabata.
12 Mefiku olo tamu ka dungadungifa oshipandi, omu na okuyamba odjona yondume ya koshoka yomudo umwe, i li exwikiloyambo kuJehova.
13 Eendjayambo dalo odi na okukala di fike poitimulongo ivali yoefa* youfila wa nakwa nawa, wa pilulilwa omaadi, i li eyambo ledimba liwa* la yambelwa Jehova okupitila momundilo. Oshikunwayambo shalo oshi na okukala shi fike poshitine sho-hin* yomaviinyu.
14 Kamu na okulya omungome keshe, oilya ya yofwa, ile oilya ipe fiyo omefiku eli, fiyo mwa eta omayambo aKalunga keni. Oyo onghedimhango yaalushe komapupi eni aeshe keshe apa tamu ka kala.
15 “‘Omu na okuvalula oivike iheyali* konima yeshabata eli, okudja mefiku olo mwa eta oshipandi shedungadungifwayambo. Oi na okukala oivike iheyali ye lixwa po filufilu.
16 Omu na okuvalula omafiku 50 fiyo omefiku olo tali landula Eshabata etiheyali, opo nee omu na okuyandja eendjayambo dipe kuJehova.
17 Omu na okweeta omingome mbali di li omadungadungifwayambo tamu di kufa meenhele deni. Odi na okukala di fike poitimulongo ivali yoefa* youfila wa nakwa nawa. Odi na okutelekwa da ya efulika, di li oiimati, oyo ya pya tete, ya yambelwa Jehova.
18 Omu na okuyamba omingome pamwe needjona deendume heyali da koshoka, keshe imwe yomudo umwe, ondumetana imwe needi mbali deendume. Otai kala ngaashi exwikiloyambo kuJehova pamwe neendjayambo noikunwayambo oyo hai yambwa pamwe nayo, i li eyambo la yambwa okupitila momundilo, ledimba liwa* kuJehova.
19 Omu na okuyamba okakombo kamwe ketimbayambo, needjona mbali deendume, keshe imwe yomudo umwe, i li eyambo loukumwe.
20 Omupristeri ote ke i dungadungifa pamwe nomingome doilikolomwa, oyo ya pya tete, i li edungadungifwayambo koshipala shaJehova, pamwe needjona mbali deendume. Oi na okukala i li oshinima shiyapuki kuJehova, notai ningi yomupristeri.
21 Mefiku olo omu na okushiivifa oshoongalele shiyapuki. Kamu na okulonga oshilonga keshe shidjuu. Oyo onghedimhango yaalushe meenhele deni adishe fiyo okomapupi eni aeshe.
22 “‘Ngeenge tamu teya omapya eni, kamu na okuteya filufilu kominghulo domapya eni nokamu na okutoola po oyo ya fyaala po, eshi tamu teya. Omu na oku i fiila po eehepele* nosho yo ovanailongo. Aame Jehova, Kalunga keni.’”
23 Jehova okwa twikila okupopya naMoses, ta ti:
24 “Lombwela Ovaisrael kutya, ‘Mefiku lotete, lomwedi omutiheyali, omu na okufuda po koilonga yeni aishe, efiku olo otali ka shiivifwa okupitila meshiko lenghuma, opo mu dimbulukifwe kutya oshoongalele osho oshiyapuki.
25 Kamu na okulonga oilonga keshe idjuu, notamu ka yambela Jehova omayambo okupitila momundilo.’”
26 Jehova okwa popya vali naMoses, ta ti:
27 “Ashike efiku etimulongo lomwedi omutiheyali, oli li efiku lokukosholwa omatimba. Omu na okudana oshoongalele shiyapuki nokunyika oluhodi,* nomu na okuyambela Jehova omayambo okupitila momundilo.
28 Kamu na okulonga oshilonga keshe shidjuu mefiku olo, molwaashi oli li efiku lokukosholwa omatimba, opo mu kosholwe omatimba eni koshipala shaJehova, Kalunga keni.
29 Omunhu* keshe oo ita nyika oluhodi* ota ka dimwa* mo moshiwana shavo.
30 Omunhu* keshe oo ta longo oilonga yoludi keshe mefiku eli, ohandi ke mu hanauna po.
31 Kamu na okulonga oilonga yoludi keshe. Oyo onghedimhango yaalushe komapupi eni aeshe keshe apa tamu ka kala.
32 Oli li eshabata kunye lokufuwa po filufilu, notamu* ka nyika oluhodi konguloshi yomafiku omuwoi omwedi oo. Omu na okudana eshabata leni okudja konguloshi fiyo okonguloshi ikwao.”
33 Jehova okwa twikila vali okupopya naMoses, ta ti:
34 “Lombwela Ovaisrael kutya, ‘Momafiku 15 omwedi ou omutiheyali ove na okudanena Jehova Oshivilo shOmatwali,* oule womafiku aheyali.
35 Oshi na okukala oshoongalele shiyapuki mefiku lotete, nokamu na okulonga oilonga keshe idjuu.
36 Mefiku etiheyali, omu na okuyambela Jehova eyambo la yambwa okupitila momundilo. Mefiku etihetatu, omu na okudana oshoongalele shiyapuki nomu na okuyambela Jehova eyambo la yambwa okupitila momundilo. Oshi li oshoongalele shiyapuki. Kamu na okulonga oshilonga keshe shidjuu.
37 “‘Ei oivilo yaJehova yokomudo oyo mu na okushiivifa i li oyoongalele iyapuki yokuyandja eyambo la yambelwa Jehova okupitila momundilo: exwikiloyambo, eendjayambo deyambo noikunwayambo, she likolelela kelandulafano lefiku keshe.
38 Oinima ei otai wedwa kwaasho sha yambwa momashabata aJehova, eeshali deni, omayambo eni eano nosho yo omayambo eni ehalo liwa, oo mu na okupa Jehova.
39 Ashike mefiku 15 lomwedi omutiheyali, eshi tamu ongele oilikolomwa yomedu leni, omu na okudana oshivilo shaJehova oule womafiku aheyali. Efiku lotete olokufuwa po filufilu, nefiku etihetatu olokufuwa po filufilu.
40 Mefiku lotete, omu na okukufa oiimati yomiti odo diwa, eembale, oitai yomiti odo di na omafo mahapu nosho yo omiti odo da hapa domolufilu, notamu ka hafa koshipala shaJehova, Kalunga keni, oule womafiku aheyali.
41 Otamu ke shi dana shi li oshivilo kuJehova oule womafiku aheyali momudo. Omu na oku shi dana momwedi omutiheyali, molwaashi oyo onghedimhango yaalushe komapupi eni aeshe.
42 Omu na okukala hamu di momatwali oule womafiku aheyali. Ovaisrael aveshe ove na okukala hava di momatwali,
43 opo omapupi eni omonakwiiwa a shiive kutya onda li nda ningifa Ovaisrael va dje momatwali, eshi nde va kufa medu laEgipiti. Aame Jehova, Kalunga keni.’”
44 Onghee Moses okwa lombwela Ovaisrael shi na sha noivilo yaJehova yokomudo.
Eshangelo lopedu
^ Eln., “pokati komaufiku avali.”
^ Oitimulongo ivali yoefa oi fike peelita 4,4. Tala Oshiwedelwako B14.
^ Ile “tali udifa nawa; tali tulumukifa.” Eln., “tali fuwifa.”
^ O-hin imwe oi fike peelita 3,67. Tala Oshiwedelwako B14.
^ Eln., “omashabata aheyali.”
^ Oitimulongo ivali yoefa oi fike peelita 4,4. Tala Oshiwedelwako B14.
^ Ile “tali udifa nawa; tali tulumukifa.” Eln., “tali fuwifa.”
^ Ile “ovafininikwa.”
^ “Okunyika oluhodi” ohashi udiwa ko meenghedi da yoolokafana di na sha nokulingabeka oinima, mwa kwatelwa okulidilika.
^ Ile “Omwenyo.”
^ Ile tashi dulika, “ite lidilike.”
^ Ile “dipawa.”
^ Ile “Omwenyo.”
^ Ile “neemwenyo deni otadi.”
^ Ile “shEenhele doPakafimbo.”
