Embo laJohannes 16:1-33

  • Ovahongwa vaJesus otava ka dipawa (1-4a)

  • Oilonga yomhepo iyapuki (4b-16)

  • Oluhodi lovahongwa otali ka shituka ehafo (17-24)

  • Jesus okwa finda ounyuni (25-33)

16  “Onde mu lombwela oinima oyo opo muha efe po eitavelo leni.*  Ovanhu otave ke mu konda mo meeshinagoga. Ndele efimbo otali ke uya eshi ovo tave ke mu dipaa tava ka diladila kutya otava longele Kalunga oilonga iyapuki.  Otava ka ninga ngaho molwaashi kave shii Tate ile ame.  Kakele kaasho, onde mu lombwela oinima oyo opo ngeenge efimbo olo tai ka ningwa la fiki, otamu ka dimbuluka kutya onde i mu lombwelele. “Oinima oyo kanda li nde i mu lombwela pehovelo molwaashi onda li punye.  Ndele paife ohandi i kwaau a tuma nge, ashike kape na nande oumwe womunye a pula nge kutya, ‘Oto i peni?’  Paife omwa nyika oluhodi momitima deni eshi nde mu lombwela oinima oyo.  Oshili ohandi mu lombwele kutya ohandi i omolwouwa weni. Osheshi ngeenge inandi ya, itamu ka pewa omhepo iyapuki, ndele ngeenge onda i, ohandi ke i mu tumina.  Ndele ngeenge oye uya, otai ka holola kutya oulunde oshike, ouyuki oshike netokolo laKalunga kutya olilipi:  tete otai holola oulunde molwaashi ovanhu inava itavela nge.* 10  Opo nee otai ka holola ouyuki molwaashi ohandi i kuTate noitamu ka mona nge vali. 11  Otai ka holola yo etokolo molwaashi omupangeli wounyuni ou okwa tokolwa. 12  “Ondi na oinima ihapu natango oku mu lombwela, ndele itamu dulu oku i uda ko paife. 13  Ndele ngeenge omhepo iyapuki* oye uya, otai ke mu wilika noku mu kwafela mu ude ko oshili pauyadi, osheshi hayo tai ka popya kuyo vene, ndele otai ka popya osho ya uda notai ke mu shiivifila oinima oyo tai ke uya. 14  Otai ka tumbalekifa nge molwaashi otai ke mu shiivifila osho ya uda kwaame. 15  Oinima aishe oyo Tate e na oyange, nomolwaashi nda ti kutya omhepo iyapuki otai ke mu shiivifila osho ya uda kwaame. 16  Ngeenge pa piti okafimbo kanini, itamu ka mona nge vali, ndele natango konima yokafimbo kanini, otamu ka mona nge.” 17  Ndele vamwe vomovahongwa vaye ova pulafana tava ti: “Okwa hala okutya ngahelipi eshi ta ti, ‘Ngeenge pa piti okafimbo kanini itamu ka mona nge vali, ndele konima yokafimbo kanini otamu ka mona nge,’ nosho yo kutya ‘ohandi i kuTate’?” 18  Onghee ova tya: “Okwa hala okutya ngahelipi eshi ta ti, ‘okafimbo kanini’? Katu shi shii kutya ota popi kombinga yashike.” 19  Eshi Jesus a didilika kutya ova hala oku mu pula, okwa tya kuvo: “Otamu pulafana molwaashi nda ti: ‘Ngeenge pa piti okafimbo kanini itamu ka mona nge, ndele konima yokafimbo kanini otamu ka mona nge vali’? 20  Oshili ohandi mu lombwele, otamu ka lila nokulililila, ndele ounyuni otau ka hafa; otamu ka nyika oluhodi, ashike oluhodi leni otali ka shituka ehafo. 21  Ngeenge omukainhu e li pokumona okaana oha kala e udite ouyahame omolwoshifeta, ndele ngeenge okaana oka dalwa iha dimbuluka vali ouyahame oo molwaashi oha kala a hafa eshi a mona okaana. 22  Paife nanye omwa nyika oluhodi, ndele eshi tamu ka mona nge vali, otamu ka kala mwa hafa, nokape na ou te ke mu kufa ehafo leni. 23  Mefiku olo itamu ka pula nge sha nandenande. Oshili ohandi mu lombwele, ngeenge omwa pula sha Tate, ote ke shi mu pa medina lange. 24  Fiyo opapa kamu na eshi mwa pula medina lange. Puleni ndele tamu pewa opo mu kale nehafo linene. 25  “Oinima oyo onde i mu lombwela momafaneko. Ndele efimbo otali uya eshi itandi ka popya vali nanye momafaneko, ashike ohandi ke mu lombwela kombinga yaTate sha yukilila. 26  Mefiku olo otamu ka indila Tate medina lange. Eshi nda popya ngaho inandi hala kutya ohandi ke mu indilila ko. 27  Tate oku mu hole, molwaashi omu hole nge nomwa itavela kutya ondi li omukalelipo waye. 28  Onde uya mounyuni ndi li omukalelipo waTate. Ndele ohandi fiye po ounyuni nohandi i kuTate.” 29  Ovahongwa vaye ova ti: “Tala, paife owa popya oinima ya fatuka eshi ino longifa omafaneko. 30  Paife otu shi shii kutya oinima aishe ou i shii nokape na ou a pumbwa oku ku pula sha. Osho oshe tu ningifa tu itavele kutya owa dja kuKalunga.” 31  Jesus okwa tya kuvo: “Mbela paife omwa itavela? 32  Taleni, efimbo otali uya, notali uya diva eshi amushe tamu ka fiya nge po, ndele keshe umwe ta i keumbo lavo. Ndele itandi ka fyaala po aame andike molwaashi Tate oku li pamwe naame. 33  Oinima oyo onde i mu lombwela opo mu kale mu na ombili omolwange. Otamu ka shakeneka omaudjuu mounyuni, ashike kaleni mu na omukumo. Ame onda finda ounyuni.”

Eshangelo lopedu

Eln., “muha punduke.”
Ile “kave na eitavelo li na oilonga.”
Movelishe 13 no-14, Jesus ota popi kombinga yomhepo iyapuki i li omukwafeli monghedi yenhupeko.