Job 8:1-22
8 Opo nee Bildad, Omusuhi, okwa nyamukula, a ti:
2 “Fiyo onaini to kala nokupopya oinima ya tya ngaho?
Eendjovo dokanya koye odo omhepo inene.
3 Mbela Kalunga ota ka pengifa ngoo ouyuki,Ile mbela Omunaenghono adishe ota pengifa osho sha yuka?
4 Ngeenge ovana voye ova nyona kuye,Ote ke va efa va handukilwe omolwounashibofa wavo;*
5 Ndele ngeenge owe lineekela ashike muKalunga,Nowa pula efilonghenda kOmunaenghono adishe,
6 Nongeenge owa koshoka nou li shili omuyuki,Ota ka yandja elitulemo kwoove,*Note ke ku shunifa ponhele yoye.
7 Nonande ehovelo loye ola li linini,Onakwiiwa yoye otai ka kala inene.
8 Alikana, pula epupi lonale,Ndele to yandje elitulemo koinima, oyo ooxe va mona.
9 Osheshi fye otwa dalwa ashike onghela, nokatu na eshi tu shii,Molwaashi omafiku etu kombada yedu oo omudidimbe.
10 Mbela itave ke ku hongaNoku ku lombwela osho ve shii?*
11 Mbela omwiidi womanenge otau dulu tuu okukulila opo pehe na omakungulukilo omeva?
Mbela olumbungu otali dulu ngoo okukulila opo pehe na omeva?
12 Ofimbo tai tutuma, noinai kola natango,Otai kukuta tete koimeno ikwao.
13 Ei oidjemo* yaaveshe, ovo va dimbwa Kalunga,Osheshi eteelelo laavo vehe na Kalunga* otali xulu po,
14 Ovo ve na elineekelo longaho,Naavo elineekelo lavo lahamakasha, ngaashi ongodi* yeluviluvi.
15 Ota ka yaamena keumbo laye, ashike itali ka kala la fikama;Ota ka kendabala oku li kwatela po, ndele itali kalelele.
16 Ye oshimeno shi na omeva, eshi etango tali minikile,Noitai yaye oya tandavela moshikunino.
17 Omidi daye ode lidingila monduba yomamanya;Ota kongo eumbo mokati komamanya.*
18 Ashike ngeenge okwa dudwa po* ponhele yaye,Onhele oyo otai ke mu likala notai ka tya, ‘Inandi ku mona nande onale.’
19 Heeno, osho ta ka kana po ngaho;*Opo nee vamwe otava ka dja mondwi.
20 Oshoshili Kalunga ita ka efa po ovo tava kanyatele oudiinini;*Noita ka yambidida* ovakolokoshi.
21 Molwaashi ota ka yadifa okanya koye nokuyola,Nosho yo omilungu doye nehafo linene.
22 Ovo tave ku tondo, otava ka fifwa ohoni,Netwali lovakolokoshi itali ka kala po vali.”
Eshangelo lopedu
^ Eln., “Ote ke va tumina momake aavo va tukula oshibofa.”
^ Ile “Ota ka fikama e ku popile.”
^ Eln., “Nokupitifa mo eendjovo momitima davo?”
^ Eln., “Eendjila osho di li.”
^ Ile “lovashunimonima.”
^ Eln., “eumbo.”
^ Ile “Ota kongo eumbo lomamanya.”
^ Ile “okwa ponwa po.”
^ Ile “ondjila yaye osho tai ka hengumuka po ngaho.”
^ Ile “vehe na etimba.”
^ Eln., “Noita ka kwata eke.”
