Job 22:1-30
22 Elifas, Omuteman, okwa nyamukula, a ti:
2 “Omunhu ota dulu ngoo okukala e na oshilonga kuKalunga?
Keshe oo e na eendunge ota dulu ngoo okuningila Kalunga ouwa washa?
3 Mbela Omunaenghono adishe oku na ko ngoo nasha,* eshi u li omuyuki,Ile mbela oha mono mo sha, eshi u li omudiinini?
4 Mbela ote ku handukile,Noku ku tokola, molwaashi ho mu fimaneke?
5 Mbela hamolwaashi oukolokoshi woye wa hapupala neenghono,Nomapuko oye oo ehe na efiku a xule?
6 Oho kwata ko oinima yovamwanyoko ombabyona nopehe na etomheno,Noho nyeke ko oikutu yovanhu, noku va fiya hamunghele.*
7 Iho yandje omeva kwaao a loloka,Naao a fya ondjala, oho mu anyene oikulya.
8 Edu olomunaenghono,Naao a fimanekwa ota kala mulo.
9 Ashike ove oho lekele ovafiyekadi eenyala dongaho,Noho teyaula omaoko ounona, ovo vehe na ooxe.*
10 Nomolwaasho wa dingililwa keemwiyo,*Noho kwatwa ombadilila komahaluhalu tae ku tilifa;
11 Nomolwaasho kwalaula fokofoko, nouhe wete ko,Noto ningine koshi yomeva efundja.
12 Mbela Kalunga ke li meulu mokule?
Tala yo nghee eenyofi adishe di li moule.
13 Ashike ove owa ti: ‘Kalunga oku shii naanaa shike?
Mbela ota dulu ngoo okutokola mokati komulaulu fokofoko?
14 Oilemo oye mu vikilila, opo aha dule okumona ko,Eshi ta ende kombada* yeulu.’
15 Mbela oto shikula eendjila donale,Odo da endwa kovalumenhu ovakolokoshi,
16 Ovalumenhu ovo va vakulwa po,* ofimbo efimbo lavo inali fika,Ovo ekanghameno lavo la kombololwa po kefundja?
17 Ova li tava ti kuKalunga kashili: ‘Tu efa!’
Nonokutya ‘Omunaenghono adishe ote tu ningi shike?’
18 Ashike oye ngoo ta yadifa omaumbo avo noinima iwa.
(Omadiladilo oo mai oku li nge kokule.)
19 Ovayuki otave shi mono, ndele tava hafe,Naao ehe na ondjo, ote va sheke, ta ti:
20 ‘Ovapataneki vetu ova hanaunwa po,Nomundilo otau lungwinifa po oinima yavo, oyo ya fyaala po.’
21 Mu shiiva, noto ka kala u na ombili;Opo nee oto ka mona oinima iwa.
22 Tambula ko omhango yomokanya kaye,Nokudiinina omalombwelo aye momutima woye.
23 Ngeenge owa alukile kOmunaenghono adishe, oto ka xupifwa;Ngeenge owa kufa mo okuhenouyuki metwali loye,
24 Ngeenge owa ekeleshi oshingoli* shoye mondwi,Noshingoli shokuOfir momakololo omamanya,*
25 Opo nee Omunaenghono adishe ota ka ninga oshingoli* shoye,Nota ka kala oshisilveri shoye sha hoololekeka.
26 Opo nee oto ka kala wa hafa omolwOmunaenghono adishe,Noto ka yelula oshipala shoye kuKalunga.
27 Oto ke mu indila, note ke ku uda;Noto ka wanifa po omaudaneko oye.
28 Oto ka pondola mukeshe osho wa tokola okuninga,Nouyelele otau ka minikila mondjila yoye.
29 Osheshi ove ngeenge owa popi nelinenepeko, oto ka fifwa ohoni,Ashike ye ota xupifa omulininipiki.*
30 Ye ota xupifa ovo vehe na ondjo;Onghee ngeenge omake oye okwa yela, oto ka xupifwa shili.”
Eshangelo lopedu
^ Ile “Mbela ohashi hafifa Omunaenghono adishe.”
^ Eln., “dula mo oikutu yaavo ve li hamunghele.”
^ Ile “eefiye.”
^ Eln., “eemwiyo doudila.”
^ Ile “kongonga.”
^ Ile “ovo eemwenyo davo da tetelwa.”
^ Ile “oitandu yoshingoli.”
^ Ile “momalufilu.”
^ Ile “oitandu yoshingoli.”
^ Ile “oo e na omesho a tala pedu.”
