Job 19:1-29
19 Job okwa nyamukula, a ti:
2 “Fiyo onaini tamu kala nokuningila nai omwenyo wange,*Tamu nyanyaula nge neendjovo?
3 Omwa hanyena* nge lwoikando aishe i li omulongo;Inamu fya ohoni okuungaunga naame nonyanya.
4 Nongeenge onda ninga shili epuko,Ombedi oyange mwene.
5 Ngeenge otamu kondjifa okulinenepekela nge,Tamu ti kutya osho nda ningilwa oshi li pauyuki,
6 Opo nee shiiveni kutya Kalunga oye a pukifa nge,Noye a yula nge nonete yaye yomoukongo.
7 Tala, onda kala nokwiingida, ‘Oixuna!’ ashike inandi mona enyamukulo;Onda kala handi lilile ekwafo, ndele kape na ouyuki.
8 Okwa fitika ondjila yange nekuma lomamanya, noitandi dulu okupita po;Okwa fitika eendjila dange nomilaulu.
9 Okwa kufa nge efimano lange,Nokwa kufa ko oshikoroni komutwe wange.
10 Okwa teyaula nge keembinga adishe, fiyo nda xula po;Okwa duda mo eteelelo lange ngaashi omuti.
11 Okwa handukila nge neenghono,Nokwa tala nge ko ndi li omutondi waye.
12 Omatangakwaita aye okwe uya pamwe, nokwa kondeka nge,Nokwa onga onhanda a dingilila etwali lange.
13 Ovamwameme okwe va taataela kokule naame,Naavo ve shii nge ova dja po pwaame.
14 Ookaume kange kopofingo* ova ya,Naavo ndi shii nawa ova dimbwa nge.
15 Ovaenda vomeumbo lange novapiya vange oukadona ova tala nge ko ndi li omweendanandjila;Ondi li omunailongo momesho avo.
16 Ohandi ifana omupiya wange, ashike iha nyamukula;Ohandi mu lilile ekwafo nokanya kange a file nge onghenda.
17 Omufudo wange owa ninga oshinima shitondifa komukulukadi wange,Nondi li oshinima tashi nyika kovamwameme.*
18 Ounona vanini navo ova tonda nge nokuli;Ngeenge handi fikama, ohava sheke nge.
19 Ookaume kange aveshe vopofingo ove tonde nge,Naavo nda kala ndi hole ova pilukila nge po.
20 Omakipa ange okwa naatela koshipa shange nokombelela yange,Nonda xupa po ashike noshama shomayoo ange.
21 Filei nge onghenda, ookaume kange, filei nge onghenda,Osheshi eke laKalunga mwene ola kuma nge.
22 Omolwashike tamu hepeke nge, ngaashi Kalunga ha ningi,Tamu ponokele nge nopehe na olufuwo?*
23 Ngeno eendjovo dange oda li da shangwa,Ngeno oda li tadi dulu okushangwa membo!
24 Ngeno oda li da hokelwa memanya fiyo alusheNoshivela shokushanga nosho yo nohinga yoshivela sha hemunwa.
25 Osheshi ondi shi shii nawa kutya omuxupifi* wange oku na omwenyo;Ote ke uya lwanima, ndele ta fikama kombada yedu.*
26 Konima ngeenge oshipa shange osha hanaunwa po ngaho,Ofimbo ndi li natango mombelela yange, ohandi ka mona Kalunga,
27 Oo handi ka mona ame mwene,Oo omesho ange mwene tae ke mu mona, ndele haumwe e lili.
Ashike meni lange mwinya, ondi udite nda wililwa po.*
28 Osheshi ohamu ti, ‘Omonghedi ilipi hatu mu hepeke?’
Ofimbo odjo youpyakadi i li naame.
29 Omu na okutila eongamukonda,Osheshi eongamukonda ohali handukile ovo va nyona;Omu na okukala mu shi shii kutya oku na omutokoli.”
Eshangelo lopedu
^ Ile “nokuningila nge nai.” Tala Omafatululo oitya.
^ Ile “tuka.”
^ Ile “Ovapambele vange.”
^ Eln., “ovanamati voshidalelo shange,” sha hala okutya, oshidalelo osho sha dala nge (oshidalelo shameme).
^ Eln., “Noinamu wanenwa kombelela yange.”
^ Ile “omukulili.”
^ Eln., “kombada yondwi.”
^ Ile “Eefiyo dange itadi longo nawa.”
