Job 15:1-35
15 Elifas, Omuteman, okwa nyamukula, a ti:
2 “Mbela omunhu e na eendunge ota ka nyamukula nomatomhafano ongaho,*Ile ota ka yadifa edimo laye nomhepo yokoushilo?
3 Okuyandja epukululo to popi eendjovo dongaho kaku na ekwafo lasha,Nokupopya oko akuke kaku na ouwa washa.
4 Osheshi owa kanifa etilokalunga,Noku na vali ohokwe mokulongela Kalunga.
5 Osheshi enyono loye olo tali ku ningifa u popye osho to popi,*Nowa hoolola eendjovo doukengeleledi.
6 Okanya koye mwene oko take ku tokola, ndele haame;Omilungu doye otadi ku hokololifa.
7 Mbela oove omunhu wotetetete okudalwa,Ile mbela oove wa dalwa tete, ofimbo oikulundudu inai shitwa?
8 Mbela oho pwilikine koiholekwa yaKalunga,Ile oto ngungunine ounongo oo u na?
9 Oshike osho u shii, osho tuhe shii?
Oshike osho u udite ko, tuhe shi udite ko?
10 Ovo ve na eenghwakutoka nosho yo ovakulunhu, aveshe ove li mokati ketu,Ovalumenhu va kula neenghono ve dule xo.
11 Omahekeleko aKalunga inae ku wanena,Ile eendjovo odo wa lombwelwa monghedi iwa?
12 Omolwashike omutima woye tau ku twalaatwala,Nomolwashike omesho oye e yadi ehandu?
13 Osheshi owa handukila Kalunga ye mwene,Nowa efa eendjovo odo di pite mo mokanya koye.
14 Omunhu wongaho oye shike, opo a kale a koshoka,Ile keshe oo a dalwa komukainhu, opo a kale omuyuki?
15 Tala, ine lineekela nokuli novayapuki vaye,Nokuli neulu inali koshoka momesho aye.
16 Ongahelipi shi na sha nomunhu oo mutondifa nokwa nyonauka,Omunhu oo ta nu okuhenouyuki ngaashi omeva!
17 Ohandi ku lombwele; pwilikina kwaame.
Ohandi ku hokololele osho nda mona,
18 Osho ovalumenhu ovanaendunge va lombwela ooxe,Oinima oyo inava holeka.
19 Ovo ashike va pewa edu,Nokape na omunailongo a enda mokati kavo.
20 Omunhu omukolokoshi oha mono oixuna omafiku aye aeshe,Omido adishe oda tuvikililwa omukwanyanya.
21 Momatwi aye omu na omawi taa tilifa;Pefimbo lombili, ongudu yovanyeki ohai mu ponokele.
22 Ina itavela kutya oku na efiku a ka dje mo momilaulu;Okwe likalekelelwa eongamukonda.
23 Oha kala ta elaela ta kongo oikulya,* kutya oi li peni?
Oku shi shii kutya efiku lomilaulu oli li popepi.
24 Oudjuu nouyehame otai twikile oku mu tilifa;Ohai mu wilile po ngaashi ohamba ye lilongekida okuponoka.
25 Osheshi oha yelulile Kalunga eke laye,Noha kendabala okutukululila oshibofa* Omunaenghono adishe.
26 Oha ningile Kalunga omanganga moku mu ponokelaNoshikelelifo shaye sha kula nosha kola;*
27 Oshipala shaye osha ondoka,Neenho daye odi yadi oinghene;
28 Oha di moilando, oyo tai ka hanaunwa po,Momaumbo omo itamu ka kala nande oumwe,Oo taa ka ninga onduba yomamanya.
29 Ita ka punapala, nomaliko aye, oo e li likolela, itaa ka hapupala,Ile noiniwe yaye itai ke lihanena moshilongo.
30 Ita ka dja mo momilaulu;Omalaka omundilo otaa kukutike okatai kaye, oko ka twapuka;*Ota hanaunwa po komufudo womokanya kaKalunga.*
31 Ine lifufya, noine lineekela mwaasho shihe na oshilonga,Molwaashi osho ta mono, ponhele yaasho sha kana, kashi na ongushu.
32 Otashi ka ningwa fimbo efiku laye inali fika,Noitai yaye itai ka hapa.
33 Ota ka kala ngaashi omundjebele tau ufa ko omandjebele ao inaa pya,Nongaashi olumono tali yaumukifa ko eenhemo dalo.
34 Osheshi oshoongalele shovahenakalunga* itashi pondola sha,Nomundilo otau lungwinifa po omatwali aavo ve hole ombubo.
35 Ove na oufimba woupyakadi, nohava dala osho shii,Noshidalelo shavo ohashi di oukengeleledi.”
Eshangelo lopedu
^ Ile “neshiivo longaho.”
^ Ile “enyono loye ohali deula okanya koye.”
^ Eln., “omungome.”
^ Ile “okukala omhinge.”
^ Eln., “Pokati koshikelelifo shaye sha pama.”
^ Sha hala okutya, eteelelo lokumona osho sha kana.
^ Eln., “kaye.”
^ Ile “shovashunimonima.”
