Genesis 9:1-29
9 Kalunga okwa nangeka noupuna Noa novanamati vaye, ndele te va lombwele ta ti: “Dalafaneni mu hapupale, nye mu yadife edu.
2 Oinamwenyo aishe yokombada yedu, oikwamavava aishe, oyo tai tuka mewangadjo, eeshi domefuta noinima aishe, oyo tai linyenge kombada yedu, otai kala hai mu tila nokuhaluka. Aishe oya yandjwa momake eni.*
3 Oinamwenyo aishe oyo tai linyenge nai ninge eendja deni. Onde i mu pa aishe, ngaashi nde mu pa oimeno italala.
4 Ombelela i na ohonde inamu i lya, osheshi ohonde oyo omwenyo.
5 Natango, keshe ou ta tileshi ohonde, ohandi ke i mu pula. Ngeenge oshinamwenyo, oshi na okufya. Ngeenge omunhu, oku na okuyandja omwenyo waye, osheshi okwa dipaa omunhu mukwao.
6 Keshe ou ta tileshi ohonde yomunhu, naye ohonde yaye oi na okutika, molwaashi omunhu okwa shitwa oshifeka shaKalunga.
7 Dalafaneni mu hapupale; twikileni okuhapupala, nye mu yadife edu alishe.”
8 Kalunga okwa lombwela yo Noa novanamati vaye, a ti:
9 “Ohandi ningi ehangano nanye nosho yo noludalo leni,
10 nakeshe osho shi li pamwe nanye shi na omwenyo, oudila, oinamwenyo naaishe oyo i na omwenyo kombada yedu, oinamufudo aishe, oyo ya dja monguluwato, sha hala okutya keshe ashike osho shi na omwenyo kombada yedu.
11 Ohandi ningi ehangano nanye: Itandi ka hanauna po vali oinamufudo* aishe neyelu, noitandi ka hanauna po vali edu neyelu.”
12 Kalunga okwa tya vali: “Ohandi tula po edidiliko li na sha nehangano olo handi ningi nanye nosho yo noinamufudo aishe, oyo i li pamwe nanye, notali kala po fiyo okomapupi aeshe okomesho.
13 Ohandi tula keulu outa wodula, notau kala edidiliko li na sha nehangano olo nda ninga nakeshe osho shi li kombada yedu.
14 Ngeenge onda eta oilemo keulu, outa wodula otau ka holoka shili moilemo.
15 Ohandi ka dimbuluka shili ehangano, olo nda ninga nanye, nosho yo noinamufudo yomaludi aeshe. Itandi ka hanauna po vali oinamufudo* aishe neyelu.
16 Outa wodula otau ka holoka moilemo, nohandi ke u mona, ndele handi dimbuluka ehangano laalushe olo nda ninga noinamufudo* yomaludi aeshe, oyo i li kombada yedu.”
17 Kalunga okwa endulula osho a lombwela Noa, a ti: “Ohandi tula po edidiliko li na sha nehangano olo handi ningi nanye nosho yo noinamufudo aishe, oyo i li kombada yedu.”
18 Ovanamati vaNoa, ovo va dja monguluwato, ovo Sem, Ham naJafet. Lwanima, Ham okwa ka dala Kaanan.
19 Ovo ova li ovanamati vatatu vaNoa, novanhu aveshe ova dja muvo nove lihanena kombada yedu.
20 Noa okwa li a ninga omunamapya, nokwa li a twika oshikunino shomandjebele.
21 Eshi a nwa omaviinyu, okwa li a kolwa, ndele te lidula oikutu yaye metwali.
22 Ham, xe yaKaanan, okwa li a mona xe e li hamunghele, ndele ta lombwele ovamwaina ovo va li pondje.
23 Sem naJafet ova kufa oshikutu, ndele tave shi tula komapepe avo nova ya mo tava ende shamunimanima. Opo nee ova tuvikila xe va pilamena ko, nokava li va mona xe, eshi e li hamunghele.
24 Eshi Noa a penduka a kololokwa, okwa uda osho omonamati waye, oo munini, a ninga,
25 ndele ta ti:
“Kaanan na fingwe.
Na ninge omupiya wovapiya vavamwaina.”
26 Okwa tya vali:
“Jehova, Kalunga kaSem, na tangwe,
Kaanan na ninge omupiya waSem.
27 Kalunga na pe Jafet oshitukulwa sha kula,
Na kale momatwali aSem.
Kaanan na ninge yo omupiya waJafet.”
28 Noa okwa kala nomwenyo eedula 350, okudja pEyelu.
29 Eedula adishe kumwe, odo Noa a kala nomwenyo, oda li 950, ndele ta fi.
