Ehololo laJohannes 22:1-21

  • Omulonga womeva omwenyo (1-5)

  • Exulifo (6-21)

    • ‘Ila u nwe omeva omwenyo oshali’ (17)

    • “Omwene Jesus, ila” (20)

22  Omweengeli okwa ulikila nge omulonga womeva omwenyo, mayela a fa okawe, taa kunguluka taa di kolukalwapangelo laKalunga nolOdjona  notaa tavakana pokati kepandavanda la kula. Momunghulo womulonga oo omwa li omiti domwenyo hadi imi oiimati lwoikando 12 momudo, sha hala okutya, hadi imi omwedi keshe. Omafo ado otaa velula oiwana.  Oshilando itashi ka fingwa vali. Ndele otamu ka kala olukalwapangelo laKalunga nolOdjona, novapiya vaKalunga otave ke mu longela oilonga iyapuki.  Otava ka mona oshipala shaye, nedina laye otali ka shangwa meembaba doipala yavo.  Itamu ka kala vali oufiku, noitava ka pumbwa ouyelele wolamba ile wetango, molwaashi Jehova Kalunga ote ke va minikila, notava ka pangela ve li eehamba fiyo alushe.  Omweengeli okwa lombwela nge ta ti: “Eendjovo odo odoshili nodi shii okulineekelwa. Jehova Kalunga, oo a nwefa mo ovaprofeti, okwa tuma omweengeli waye a ulikile ovapiya vaye oinima oyo tai ka ningwa diva.  Tala, ohandi uya diva. Keshe ou ta diinine eendjovo dopaxunganeko odo di li membo eli ota kala a hafa.”  Ame Johannes, aame nda uda nonda mona oinima oyo. Eshi nde i uda nonde i mona, onda twa eengolo, ndele handi linyongamene peemhadi domweengeli oo a li te i ulikile nge.  Ndele okwa tya kwaame: “Oto ningi ngahelipi? Ino linyongamena nge. Linyongamena Kalunga! Ame naame omupiya ngaashi ove nongaashi ovamwaxo ovaprofeti, naavo hava diinine eendjovo odo di li membo eli.” 10  Okwa lombwela nge yo ta ti: “Eendjovo dopaxunganeko odo di li membo eli, ino di kaleka oshiholekwa molwaashi eufwafimbo oli li popepi. 11  Omuhenouyuki keshe na twikile okulonga okuhenouyuki, nakeshe ou e na elihumbato inali koshoka na twikile noilonga yaye inai koshoka. Ndele omuyuki na twikile okulonga ouyuki, nomuyapuki na twikile okulonga oilonga iyapuki. 12  “‘Tala, ohandi uya diva, nohandi ka pa keshe umwe ondjabi she likolelela koilonga yaye. 13  Aame Alfa naOmega,* aame ndotete nondaxuuninwa, ehovelo nexulilo. 14  Ovo va kosha oikutu yavo otava kala va hafa, molwaashi otava dulu okulya komuti womwenyo notava dulu okupita moivelo va ye moshilando. 15  Pondje yoshilando ope na eembwa,* ovo hava kufa ombinga moumhulile, ovahaeli,* ovadipai, ovalongeli voikalunga naaveshe ovo ve hole oipupulu nohave i popi.’ 16  “‘Ame Jesus, onda tuma omweengeli wange e mu hepaululile kombinga yoinima oyo omolwouwa womaongalo. Ame omudi noludalo laDavid, nondi li onyofi yokeengula tai minikile.’” 17  Omhepo nomuhombolwa otava ti: “Ila!” Keshe ou te shi udu na tye, “Ila!” Nakeshe ou a fya enota ne uye; keshe ou a hala ne uye a nwe omeva omwenyo oshali. 18  “Ame ohandi lombwele keshe umwe oo ta udu eendjovo dopaxunganeko odo di li membo eli, tadi ti: Keshe ou ta weda mo sha moinima aishe oyo ya shangwa, Kalunga naye ote mu wedele ko komahandukilo oo a shangwa membo eli. 19  Keshe oo ta kufa mo sha meendjovo domembo eli lopaxunganeko, Kalunga ite ke mu pitika a mone oinima iwa oyo ya shangwa mo. Sha hala okutya, ite ke mu pitika a lye oiimati komuti womwenyo nokuya moshilando shiyapuki. 20  “Ou a popya oinima oyo okwa ti: ‘Ohandi uya diva.’” “Amen, Omwene Jesus, ila.” 21  Efilonghenda lOmwene Jesus nali kale pamwe novayapuki.

Eshangelo lopedu

Oitya oyo oi lile po ondada yotete noyaxuuninwa moalfabeta yOshigreka.
Sha hala okutya, ovo hava longo oilonga itondifa koshipala shaKalunga.
Tala omafatululo oitya, “Oluhaelo.”