Inda koshikalimo

EKWAFO KOMAUKWANEUMBO

Ongahelipi ngeenge okaana kange ohaka shindwa?

Ongahelipi ngeenge okaana kange ohaka shindwa?

Ongahelipi ngeenge okamonamati koye ohaka shindwa kofikola? Oshike u na okuninga po? Mbela oto ka komangela ofikola i handukile ou e ka shinda? Ile oto ke ka honga ka kale haka shunine owii ou e ka shinda? Ofimbo ino ninga etokolo, tala ouyelele u na sha nokushindwa. *

 Oshike nda pumbwa okushiiva kombinga yokushindwa?

Okushinda oshike? Okushinda oshinima tashi twikile tashi ningwa nelalakano loku ku udifa nai palutu ile pamaliudo. Onghee hano, okushinda haalushe kwa kwatela mo omatukano ile omahepeko.

Omolwashike sha fimana okushiiva kutya okushinda okwa kwatela mo shike? Ovanhu vamwe ohava longifa outumbulilo “okushinda” tava ulike ashike koinima ya nafangwa oyo ya holoka po. Omolwaashi ngeenge ovakulunhu ova kala have lidopo mukeshe osho okaana kavo ka ningwa, itave ka kwafele ka kale ke shii okupongolola po omaupyakadi, ounongo oo ka pumbwa eshi taka ende taka kulu.

Efinamhango lopaMbiibeli: “Ino endelela okulihandukifa nomwenyo woye.” — Omuudifi 7:9.

Oushili oyoo kutya: Nonande ope na eenghalo dimwe omo wa pumbwa okukatuka onghatu, eenghalo dimwe di efela momake okaana koye opo ke lihonge nghee ke na okukandula po oupyakadi nokuungaunga novanhu. — Ovakolossi 3:13.

Oshike u na okuninga po ngeenge okaana koye otaka hepekwa?

 Openi handi dulu okukwafela?

  • Pwilikina nelididimiko kokaana koye. Kendabala okuuda ko kutya 1) oshike sha ningwa po (2) nosho yo kutya omolwashike taka shindilwa. Ino fika pexulifodiladilo ofimbo ino uda ouyelele we lixwa po. Lipula kutya: ‘Mbela ondi na ngoo ouyelele we lixwa po?’ Opo u mone ouyelele we lixwa po, otashi dulika wa pumbwa oku ka popya nomuhongi wokaana koye ile novadali vokaana aka ka shinda koye.

    Efinamhango lopaMbiibeli: “Ou ta nyamukula fimbo ina uda ko, osho oulai waye ndele tashi mu fifa ohoni.” — Omayeletumbulo 18:13.

  • Ngeenge okaana koye ohaka shindwa, ka kwafela ka mone kutya onghedi omu hake linyenge ile haka popi otai dulu okuxwepopaleka ile okunaipika onghalo. Pashihopaenenwa, Ombiibeli oya ti: “Enyamukulo litalala tali kandula po oupyuhandu, ndelenee ondjovo ikukutu tai tukulula ehandu.” (Omayeletumbulo 15:1) Oshoshili kutya ngeenge owa shunifa owii, otashi ka ningifa naku ku shinda a kale he ku shindi unene.

    Efinamhango lopaMbiibeli: “Inamu alulilafana owii netukano.” — 1 Petrus 3:9.

  • Kwafela okaana koye ka mone kutya ngeenge iho shunine naku ku shinda owii itashi ti ove evaya. Ponhele yaasho, ka kwafela ka mone kutya okanaendunge molwaashi itaka efa naku ka shinda oye e ka pangele. Monghedi ya tya ngaho, otaka dulu okufinda ovo have ka shindi nopehe na okulwa.

    Osho osha fimana unene ngeenge okaana koye ohaka shindwa okupitila momakwatafano okointaneta. Ngeenge okaana koye ohaka handuka ngeenge taka shindwa okupitila momakwatafano okointaneta, otashi ka ningifa naku ka shinda a twikile oku shi ninga, naasho otashi dulika shi ka ningife okaana koye nako ka kale haka shindi vamwe. Onghedi ya denga mbada yokuungaunga nonghalo oyo okuhanyamukula ou te ka shindi, na nakushinda otaka mona kutya onghedi yaye itai pondola notashi dulika a ka efe oku ka shinda.

    Efinamhango lopaMbiibeli: “Ngeenge kape noikuni, omundilo tau dimi po.” — Omayeletumbulo 26:20.

  • Omafimbo amwe, okaana koye oka pumbwa okuhenuka okukala peenhele ile novanhu ovo hava shindi. Pashihopaenenwa, ngeenge okaana koye oka mono kutya oku ka finda oko ku na omunhu ile ovanhu ovo have ka shindi, oshiwa kaye nondjila imwe.

    Efinamhango lopaMbiibeli: “Omunaendunge ota tale oshiponga ndele ta hondama, ndelenee ovashima tava ehene ko ndele tava hangika koshiponga.” — Omayeletumbulo 22:3.

Otashi dulika wa pumbwa oku ka popya nomuhongi wokaana koye ile novadali vokaana aka ka shinda koye

Ninga ngaha: Kwafela okaana koye ka kale haka diladila kouwa nowii ofimbo inaka katuka onghatu. Pashihopaenenwa:

  • Oshike tashi dulika shi ka ningwe po ngeenge onde lidimbike nakushinda?

  • Ongahelipi ngeenge onde mu lombwele a efe okushinda nge?

  • Ongahelipi ngeenge onda lopota naku shinda nge kofikola?

  • Ongahelipi ngeenge onda ungaunga naye monghedi youkaume?

Kwafela okaana koye ka mone nghee taka dulu okukandula po oupyakadi oo kutya nee ohaka shindwa komunhu komudidi ile okupitila kointaneta. Ka shilipaleka kutya oto ke ka yambidida.

Efinamhango lopaMbiibeli: “Kaume oku na ohole alushe, nomumwaina ta dalwa, a kwafe moluhepo.” — Omayeletumbulo 17:17.

^ par. 3 Nonande oshitukulwa eshi osha yukifa elitulemo kounona voumati, omafinamhango otaa longo yo nokoukadona.