Inda koshikalimo

EKWAFO KOUKWANEUMBO

Nghee to dulu okupangela ehandu loye

Nghee to dulu okupangela ehandu loye

Kaume koye kopahombo otashi dulika a popya ile a ninga sha osho she ku handukifa, ashike otashi dulika u kendabale u holeke ehandu loye. Ashike kaume koye kopahombo otashi dulika e shi didilike nokukendabala oku ku pula. Naasho otashi dulika shi ku kenyeneke. Ongahelipi to dulu okupangela ehandu loye monghalo ya tya ngaho?

 Osho u na okushiiva

  • Ehandu otali dulu okunyona po oukolele woye. Ovakonakoni ova ulika kutya omunhu oo iha dulu okupangela ehandu laye oha kwatwa diva kohonde ya londa, oudu womutima, epolimano nosho yo ouvela womedimo. Ehandu ohali eta yo omaupyakadi ngaashi, okuhakofa nawa, okukala u na oisho ihapu, oupyakadi woshipa nosho yo oudu wombada. Ombiibeli oi na etomheno liwa eshi ya ti: “Efa ehandu, . . . opo uha longe owii.” — Epsalme 37:8.

  • Okuholeka ehandu nako okwa nyika oshiponga. Ngeenge otwa twikile nokukala twa handuka, osha fa ashike omukifi oo tau nghundipaleke olutu okudja meni. Pashihopaenenwa, otashi dulika u kulike oikala yokukembaula kaume koye kopahombo. Oikala ya tya ngaho otai dulu okunaipaleka onghalo nokweeta omaupyakadi a kwata moiti mohombo yeni.

 Osho to dulu okuninga

  • Kala ho tale komaukwatya mawa akaume koye kopahombo. Didilika omaukwatya atatu oo u hole mukaume koye kopahombo. Moshikando tashi uya ngeenge okwe ku handukifa, diladila kombinga yomaukwatya aye mawa. Osho otashi ke ku kwafela u pangele ehandu loye.

    Efinamhango lopaMbiibeli: “Kaleni mu shii okupandula.” — Ovakolossi 3:15.

  •  Kulika oukwatya wokudimina po. Tete, kendabala okutala ko oinima ngaashi kaume koye kopahombo he i tale ko. Otashi ke ku kwafela u kale u na oukwao wananghali ile tu tye ‘okufilafana onghenda.’ (1 Petrus 3:8) Shikwao vali, lipula kutya, ‘Mbela onda handuka unene noitandi dulu oku mu dimina po?’

    Efinamhango lopaMbiibeli: “Nefimano laye olo okudima po etauluko” Omayeletumbulo 19:11.

  •  Holola omaliudo oye to shi ningi nonghenda nosho yo nelungi. Longifa outumbulilo “Ame.” Pashihopaenenwa, ponhele yokutya, “Iho ningi nawa eshi iho dengele nge u lombwele nge apa u li,” tya, “Ngeenge kwa toka, ohandi kala nda limbililwa ngeenge ou Ii ngoo meameno.” Okuholola omaliudo nengungumano otashi ke ku kwafela u pangele ehandu loye.

    Efinamhango lopaMbiibeli: “Eendjovo deni nadi kale alushe donghenda, da fingala omongwa.” — Ovakolossi 4:6.

  •  Kala ho pwilikine nelitulemo. Konima eshi wa holola omaliudo oye, efa yo kaume koye kopahombo a holole omaliudo aye nopehe na oku mu kwata melaka. Ngeenge a mane okupopya, endulula oinima oyo a popya u tale ngeenge ou udite ngoo osho a ti. Okupwilikina nelitulemo otaku dulu oku ku kwafela u pangele ehandu loye.

    Efinamhango lopaMbiibeli: ‘Eendelela okupwilikina nokuliteelela mokupopya.’ — Jakob 1:19.