Inda koshikalimo

Oolyelye va li ovatongolume?

Oolyelye va li ovatongolume?

Enyamukulo lopaMbiibeli

Ovatongolume ova li ovanhu ovakwanyanya novanaenghono, ve na omalutu ehe fi opaushitwe va dalwa kovaengeli ovakolokoshi ovo va li va ya momilele novakainhu pefimbo laNoa. *

Ehokololo lOmbiibeli otali ti kutya ‘ovana ovamati vaKalunga ova mona ovana oukadona vovanhu vawa.’ (Genesis 6:2) “Ovana ovamati vaKalunga” ovo, ova li oishitwa yopamhepo nova tukululila Kalunga ounashibofa eshi va “fiya po omitumba davo” domeulu, ndele tave lilundululile momalutu opanhu ‘nokulikufila ovakainhu aveshe ava va hala.’ — Judas 6; Genesis 6:2.

Oshidjemo, ounona ovo va ka dalwa kava li ve na omalutu opaushitwe. (Genesis 6:4) Ovatongolume ova li ovakwanyanya nova li va yadifa edu noukolokoshi. (Genesis 6:13) Ombiibeli otai va ifana kutya “ovanaenghono vomounyuni wonale, ovalumenhu va tumbala.” (Genesis 6:4) Ova fiya ko elongifo leenghono nosho yo omatilifo. — Genesis 6:5; Numeri 13:33. *

Omitotolombo di na sha novatongolume

Omutotolombo: Ovatongolume oko ve li fiyo okunena.

Oshili: Jehova okwa li a eta eyelu li hanaune po ounyuni aushe woukolokoshi. Ovatongolume ova li va hanaunwa po pamwe novanhu aveshe ovakolokoshi. Mepingafano naasho, Noa noukwaneumbo waye ovo ashike va li va xupa molwaashi ovo aveke va li va hokiwa kuJehova. — Genesis 6:9; 7:12, 13, 23; 2 Petrus 2:5.

Omutotolombo: Ovatongolume ova li ve na ooxe vopanhu.

Oshili: Ooxe vavo ohava ifanwa “ovana ovamati vaKalunga.” (Genesis 6:2) Ombiibeli ohai longifa outumbulilo wa faafana ngeenge tai popi ovaengeli. (Job 1:6; 2:1; 38:7) Ovaengeli ove na eenghono dokulundulukila momalutu opanhu. (Genesis 19:1-5; Josua 5:13-15) Omuyapostoli Petrus okwa popya kombinga ‘yeemhepo di li modolongo, ovo tuu ovo va li inava dulika, onhalanheni yaKalunga eshi ye va teelela pomafiku enya aNoa.’ (1 Petrus 3:19, 20) Omushangi wOmbiibeli Judas naye okwa popya kutya ovaengeli vamwe “inava diinina oulenga wavo, ndele va fiya po omitumba davo vene.” — Judas 6.

Omutotolombo: Ovatongolume, ovaengeli va dja meulu.

Oshili: Genesis 6:4 ota ulike kutya Ovatongolume kava li ovaengeli, ndele oludalo lovaengeli ovakolokoshi ovo va li va ya momilele novakainhu. Konima eshi ovangeli ve “likufila ovakainhu aveshe ava va hala,” Jehova okwa ti ota ka katuka onghatu momukokomoko womido 120 a hanaune po ounyuni wovahenakalunga. (Genesis 6: 1-3) Ehokololo ola twikila ko kutya “mefimbo linya,” ovaengeli ovo, ova twikila ‘okuya momilele novana oukadona vovanhu’ ndele tava dala ovana “ovanaenghono vomounyuni wonale,” Ovatongolume. — Genesis 6:4.

^ okat. 1 Oshitya shOshiheberi osho sha tolokwa “Ovatongolume,” otashi ti “Ovawifi.” O-Wilson’s Old Testament Word Studies otai ti oshitya osho ohashi ifanwa “ovo hava denge vakwao imwe nopedu.”

^ okat. 3 Numeri 13:33 okwa tofa eendjovo deendadi dOvaisrael odo da mona ovanhu vanene, ovo ve va dimbulukifa ovatongolume, ovo va hangika va fya omafelemido a ka lupuka. — Genesis 7:21-23.