Inda koshikalimo

Ombiibeli oya popya shike kombinga yeetattoo?

Ombiibeli oya popya shike kombinga yeetattoo?

Enyamukulo lopaMbiibeli

Ombiibeli oya popya ashike lumwe kombinga yeetatu, ile okulishanga kolutu muLeviticus 19:28, ya ti: “Inamu ninga omafano moshipa sheni.” Kalunga okwa li a pa oshiwana shaIsrael oshipango osho, opo shi kale sha yooloka ko koiwana oyo ye va dingilila, oyo ya li hai lishange omadina komalutu, ile omadidiliko oikalunga yavo. (Deuteronomion 14:2) Nonande Omhango oyo oya li ya pewa Ovaisrael, efinamhango oko ka kanghamena omhango oyo otali dulu oku kwafela Ovakriste.

Mbela Omukriste ota dulu okukala e na eetatu, ile okushangwa noku fanekwa kolutu?

Eevelishe dOmbiibeli tadi shikula otadi tu kwafele tu tomhafane moshinima osho:

  • ‘Ovakainhu nava kale ve na ondjele.’ (1 Timoteus 2:9) Efinamhango olo otali longo kovakainhu nokovalumenhu. Otwa pumbwa okukala twa fimaneka omaliudo ovanhu vakwetu noinatu hala okukala hatu yukifa elitulemo kufye.

  • Vamwe ova hala okuulika kutya ovo oolyelye, ile okukala ve li kuvo vene, va manguluka, ofimbo vamwe ovo ve na eetatu va hala okuulika kutya ove na oufemba wokuningila olutu lavo osho va hala. Onghee hano, Ombiibeli oya ladipika Ovakriste tai ti: “Yandjeni omalutu eni onga eyambo liyapuki, li na omwenyo nola hokiwa kuKalunga, eshi tamu mu longele oilonga iyapuki nokukala tamu diladila pandunge.” (Ovaroma 12:1) “Diladila pandunge,” u likonakone kutya omolwashike wa halela eetatu. Ngeenge owe di hala molwaashi ashike to hopaenene eemhunga, ile okuulika kutya ove owongudu yonhumba, ile yongadi, dimbuluka kutya otashi dulika omadiladilo oye a ka lunduluke, ashike eetatu otadi kala kolutu woye fiyofiyo. Okukonakona omalinyengotomheno oye otashi ku kwafele u ninge etokolo li li mondjila. — Omayeletumbulo 4:7.

  • Ombiibeli oya ti: “Eemhangela dovadiinini tadi eta ouwa auke. Ndelenee omweendeleli keshe te likongele eemhumbwe.” (Omayeletumbulo 21:5) Luhapu ovanhu ohave liningi eetatu inava diladila nawa, ndele ohadi dulu oku ku ningifa uha kale u na ekwatafano lovanhu nokuhamona oilonga. Ashike ohashi vele neenghono okukufa ko eetatu odo kolutu loye. Ovanawino nosho yo ovo hava longo kongeshefa yokukufa ko eetatu ova popya kutya ovanhu vahapu ovo va li ve na eetatu lwanima ohava ka popya kutya ngeno kave liningile eetatu.