Inda koshikalimo

Ondiaboli oko ngoo i li shili?

Ondiaboli oko ngoo i li shili?

Enyamukulo lopaMbiibeli

Heeno, Ondiaboli oko i li shili. Oi li “omupangeli wounyuni ou,” oshishitwa shopamhepo oshikolokoshi nosha tukululila Kalunga ounashibofa. (Johannes 14:30; Ovaefeso 6:11, 12) Ombiibeli oya holola omaukwatya Ondiaboli okupitila momadina nosho yo momashangelo taa shikula:

  • Satana, osho sha hala okutya “Omupataneki.” — Job 1:6.

  • Ondiaboli, osho sha hala okutya “Omulundili.” — Ehololo 12:9.

  • Eyoka, edina olo la longifwa mOmbiibeli tali ti “Omupukifi.” — 2 Ovakorinto 11:3.

  • Omuhongauli. — Mateus 4:3.

  • Omunaipupulu. — Johannes 8:44.

Ondiaboli kai fi ashike owii wongaho

Ovanhu vamwe ova tala ko Satana Ondiaboli e li ashike oukwatya wongaho wowii, oo u li meni letu. Ashike mOmbiibeli omu na eenghundafana, odo da li pokati kaKalunga naSatana. Kalunga okwa wanenena, onghee ita dulu nandenande okupopya noshitukulwa showii shonhumba shi li meni laye. (Deuteronomion 32:4; Job 2:1-6) Sha faafana, Satana okwa li a yeleka Jesus, oo a li ehe na oulunde washa. (Mateus 4:8-10; 1 Johannes 3:5) Onghee hano, Ombiibeli otai ulike kutya Ondiaboli oko i li shili, ndele kai fi ashike owii wongaho.

Mbela oshi na oku tu kumwifa eshi ovanhu vahapu inava itavela kutya Ondiaboli oko i li shili? Hasho nandenande. Ombiibeli oya ti kutya Satana oha longifa eemwiyo, opo a wanife po omalalakano aye. (2 Ovatessaloniki 2:9, 10) Omwiyo umwe womeemwiyo daye da kula, okutwikifa ovanhu va itavele kutya ke ko shili. — 2 Ovakorinto 4:4.

Omitotolombo dimwe di na sha nOndiaboli

Omutotolombo: Edina limwe lOndiaboli o-Lucifer.

Oushili: Oshitya shOshiheberi osho mEembiibeli dimwe sha tolokwa “Lucifer” otashi ti, “onyofi yongula.” (Jesaja 14:12) Oshikalimo shovelishe oyo otashi ulike kutya outumbulilo oo owa yukifwa kepata, ile komusholondodo weehamba daBabilon, odo Kalunga a li a ninipika omolwounhwa wado. (Jesaja 14:4, 13-20) Outumbulilo “onyofi yongula,” owa li wa longifwa tau sheke eehamba daBabilon konima eshi da umbwa ko koshipundi.

Omutotolombo: Satana oha longele Kalunga e li “omupanguli munene.”

Oushili: Ondiaboli oi li omutondi waKalunga, ndele kai fi omupiya waye. Satana Ondiaboli oha pataneke noha hokololifa ovo hava longele Kalunga. — 1 Petrus 5:8; Ehololo 12:10.