Inda koshikalimo

Ombiibeli otai ti shike shi na sha nokuxwikwa omidimba?

Ombiibeli otai ti shike shi na sha nokuxwikwa omidimba?

Enyamukulo lopaMbiibeli

Ombiibeli inai yandja ouyelele kondadalunde u na sha nokuxwika omidimba. Kape na oshipango shopaMbiibeli shi na sha nokupaka ile nokuxwika omidimba.

MOmbiibeli omu na oihopaenenwa yovapiya ovadiinini vaKalunga ovo va paka ovafi. Pashihopaenenwa, Abraham okwa li a ninga eenghendabala opo a konge onhele i li nawa yokupaka omukulukadi waye, Sara. — Genesis 23:2-20; 49:29-32.

Ombiibeli oya tumbula yo oohandimwe ovadiinini ovo va li va xwika oimhu yoonakufya. Pashihopaenenwa, eshi ohamba yaIsrael, Saul, nosho yo ovanamati vayo vatatu va li va dipaelwa molwoodi, oimhu yavo oya kala moshitukulwa shovatondi vavo noka ya li ya ungaungiwa nayo nefimaneko. Eshi ovakwaita vaIsrael ovadiinini ve shi uda, ova li va ka tala ko oshimhu shaSaul nosho yo yovanamati vaye noku i xwika, ndele tava pake osho sha xupa po. (1 Samuel 31:8-13) Ombiibeli oya ulika kutya onghedi omo oimhu yovalumenhu ovo ya ungaungiwa nayo oya tambulwa ko. — 2 Samuel 2:4-6.

Omitotolombo di na sha nokuxwikwa omidimba

Omutotolombo: Okuxwika omudimba ihaku fimanekifa olutu.

Oshili: Ombiibeli oya ti kutya ovanhu ovo va fya ohava shuna mondwi yedu, naasho ohashi ningwa eshi oshimhu tashi olo. (Genesis 3:19) Okuxwika omudimba ohaku endelelifa olutu li ninge omute ile ondwi.

Omutotolombo: Pefimbo lOmbiibeli, ovanhu ovo va li inava hokiwa kuKalunga ovo ashike va li hava xwikwa po ngeenge va fi.

Oshili: Oimhu yovanhu ovo va li vehe fi ovadiinini, ngaashi Akan nosho yo oukwaneumbo waye, oya li ya xwikwa. (Josua 7:25) Ashike osho kasha li omhango. (Deuteronomion 21:22, 23) Ngaashi sha tumbulwa metetekelo, oimhu yovanhu vamwe ovadiinini, ngaashi shomonamati wohamba Saul, Jonatan, oya li ya xwikwa po.

Omutotolombo: Okuxwika omudimba ohaku imbi Kalunga a ka nyumune omunhu oo.

Oshili: Kalunga ota dulu okunyumuna ovafi kashi nee mbudi kutya ova pakwa, ova xwikwa po, ova fila mefuta ile ova lika po koifitukuti. (Ehololo 20:13) Omunaenghono adishe ota dulu okushitila omunhu olutu lipe. — 1 Ovakorinto 15:35, 38.