Inda koshikalimo

Ongahelipi handi dulu okuninga omatokolo e li mondjila?

Ongahelipi handi dulu okuninga omatokolo e li mondjila?

Ombiibeli oya ti

Ombiibeli ohai tu pe omayele a denga mbada, ngeenge tashi uya pokuninga omatokolo. Otai dulu oku tu kwafela tu ‘lihapupalifile ounongo nokulikongela omayele.’ (Omayeletumbulo 4:5) Omafimbo amwe ohai tu lombwele kutya otu na okukatuka ngahelipi. Ashike omafimbo amwe ohai tu pe omayele oo tae ke tu kwafela tu ninge omatokolo e li mondjila.

Moshitukulwa eshi

 Oinima oyo tai dulu oku ku kwafela u ninge etokolo li li mondjila

  • Ino endelela okuninga etokolo. Ombiibeli oya ti: “Omunamayele ta diinine eenghatu daye.” (Omayeletumbulo 14:15) Ngeenge owa endelele okuninga omatokolo, otashi dulika u ha didilike mo ouyelele oo u na oshilonga. Diladila noukeka kombinga yomahoololo oo u na. — 1 Ovatessalonika 5:21.

  • Ino ninga omatokolo e likolelela ashike komaliudo oye. Ombiibeli otai tu londwele kutya ita tu dulu okulineekela alushe omutima wetu. (Omayeletumbulo 28:26; Jeremia 17:9) Pashihopaenenwa, ita tu dulu okuninga omatokolo e li mondjila, ngeenge twa handuka, twa polimana, twa teka omukumo, tuhe na elididimiko, ile twa loloka. — Omayeletumbulo 24:10; 29:22.

  • Ilikana u pewe ounongo. (Jakob 1:5) Kalunga okwa halelela okunyamukula omailikano a tya ngaho. Oku li Xe oo ha file oshisho ounona vaye nokwa hala va ninge omatokolo e li mondjila. “Omwene ta yandje ounongo, mokanya kaye tamu di eshiivo neendunge.” * (Omayeletumbulo 2:6) Oha yandje ounongo oo, unene tuu okudja meendjovo daye, Ombiibeli. — 2 Timoteus 3:16, 17.

  • Ninga omapekapeko. Opo u ninge etokolo li li mondjila, owa pumbwa ouyelele u shii okulineekelwa. Ngaashi Ombiibeli tai ti, “omunongo na pwilikine opo a hapupalife eendunge.” (Omayeletumbulo 1:5) Openi to dulu okuhanga ouyelele u li paushili u shii okulineekelwa?

    Tete, tala kutya Ombiibeli otai ti ngahelipi kombinga yaasho to lipula nasho. Molwaashi omushiti wetu oku shii osho shiwa kufye, eendjovo daye odi na omayele e shii okulineekelwa. (Epsalme 25:12) Omafimbo amwe, Ombiibeli oya popya kondadalunde kutya otu na okuninga shike, molupe leemhango, ile oipango. (Jesaja 48:17, 18) Ashike moinima imwe ihapu Ombiibeli inai popya kondadalunde. Ponhele yaasho, oya yandja ewiliko molupe lomafinamhango. Omafinamhango otaa dulu oku tu kwafela tu ninge omatokolo e li mondjila nonande okwa yooloka ko komatokolo a vamwe. Opo u mone omayele Ombiibeli e li paushili, ninga omapekapeko moikundafanwa, ile oishangomwa yopaMbiibeli, ngaashi oyo i li ko-website yetu oshali. *

    Opo u ninge omatokolo amwe, owa pumbwa okukonakona nawa odjo youyelele i shii okulineekelwa. Pashihopaenenwa, ofimbo ino landa sha, unene tuu ngeenge oshi na ondilo, otashi ka kala pandunge u ninge omapekapeko kombinga yoshinima osho, kombinga yomunduluki washo nosho yo kutya oshike tashi ka ningwa po, ngeenge oshinima osho osha teka, ile wa hala oku shi shunifa. Oto ka shilipaleka yo ngeenge oshinima osho osho naanaa wa pumbwa.

    Ombiibeli oya ti: “Apa pehe nomapukululo, eemhangela tadi nyonauka.” (Omayeletumbulo 15:22) Ofimbo ino ninga etokolo, popya naao eshi okulineekelwa. Pashihopaenenwa, otashi ka kala shi li pandunge, u popye nandokotola ofimbo ino ninga etokolo li nasha nounamiti. (Mateus 9:12) Omafimbo amwe, oto dulu okupopya nomunhu oo a li monghalo ya fa yoye. Kaleka momadiladilo kutya oove u na okuninga omatokolo, ndele havanhu ovo wa konga ouyelele kuvo. — Ovagalati 6:4, 5.

  • Tala ashishe osho sha kwatelwa mo. She likolelela kouyelele oo u na po, oto dulu okushanga omusholondodo womahoololo oo u na nosho yo ouwa nowii ao. Diladila noukeka koilanduliko aishe oyo to ka mona, ngeenge wa ningi etokolo lonhumba. (Deuteronomion 32:29) Pashihopaenenwa, etokolo loye otali ke ku kuma ngahelipi, oukwaneumbo woye nosho yo vamwe? (Omayeletumbulo 22:3; Ovaroma 14:19) Ngeenge owa nyamukula omapulo oo nokudiladila komafinamhango Ombiibeli, otashi ke ku kwafela u ninge etokolo li li pandunge nolopahole.

  • Ninga etokolo. Omafimbo amwe, otashi dulika tu ongaonge okuninga omatokolo molwaashi tu wete inatu wanenwa kouyelele oo tu na po. Ashike ngeenge otwa henuka okuninga omatokolo, ohatu ka kanifa eemhito, ile tu ke lihange tu li meenghalo dii. Oku shi popya noitya imwe, okuhaninga etokolo osha faafana nokuninga etokolo lihe li pandunge. Opo tu shi ude ko, Ombiibeli oya faafanifa onghalo oyo nounamapya, oya ti: “Ou ha tale omhepo, ita ka kuna nande; ndele ou ha tale oilemo, ita ka teya nande.” — Omuudifi 11:4.

Dimbuluka kutya nokuli netokolo olo wa ninga u wete li li nawa otashi dulika liha kale la denga mbada. Luhapu ngeenge hatu hoolola sha, otu na okuyamba po sha shimwe. Otashi dulika pu holoke sha osho twa li inatu teelela. (Omuudifi 9:11) Onghee longifa ouyelele oo u na po, opo u dule okuninga omatokolo oo to ka pondola.

 Mbela nandi lundulule etokolo olo nda li nda ninga nale?

Hamatokolo aeshe taa kalelele. Eenghalo ota di dulu okulunduluka, ile otashi dulika wa mona kutya etokolo olo wa ninga oli na oilanduliko oyo wa li ino teelela. Onghee otashi dulika shi Ii pandunge u talulule onghalo, opo u ninge etokolo limwe vali olo tali ka eta oidjemo iwa.

Ashike omatokolo amwe kae na okulundululwa. (Epsalme 15:4) Pashihopaenenwa, Kalunga okwa teelela ovalihomboli va kaleke po eano lavo lohombo. * (Malakia 2:16; Mateus 19:6) Ngeenge mohombo omwa holoka omaupyakadi, ovalihomboli ove na okuninga ngaashi tava dulu, opo va kandule po omaupyakadi oo, ndele haku teya ohombo.

 Ongahelipi ngeenge onda ninga etokolo lii olo itandi dulu okulundulula?

Pomhito imwe, atushe ohatu ningi omatokolo mai, ile ehe li pandunge. (Jakob 3:2) Otashi dulika tu lipe oushima, ile tu kale tu udite ondjo, naasho oshi li paushitwe. (Epsalme 69:5) Omafimbo amwe, ngeenge otwa kala tu udite ngaho ohashi tu kwafele, opo tuha endulule epuko olo! (Omayeletumbulo 14:9) Ashike, Ombiibeli oye tu londwela tuha kale tu udite ondjo sha pitilila, molwaashi otashi dulu oku tu teya omukumo noitatu ka dula okudiladila pandunge. (2 Ovakorinto 2:7) * Ombiibeli oya ti: “Omwene Oye omunefilonghenda nomunanghenda.” (Epsalme 103:8-13) Onghee kendabala okulihonga ketokolo olo wa ninga lii olo ito dulu okulundulula, ndele to ningi ngaashi to dulu, opo u xwepopaleke onghalo.

^ okat. 4 Edina laKalunga oJehova ngaashi sha popiwa mOmbiibeli. — Epsalme 83:18, NW.

^ okat. 6 Oto dulu yo okukonga ko jw.org, to longifa oshitya, ile outumbulilo oo wa pamba etokolo loye. Ko-website oko oku na omayele a kanghamena kOmbiibeli e na sha noinima ihapu. Oto dulu yoo okukonga oitya kondadalunde ngeenge owa yi ko Bible Words Index mo-New World Translation of the Holy Scriptures.

^ okat. 13 Kalunga okwa hala ovalihomboli va kale pamwe fiyo alushe. Okwa pitika eteyohombo nosho yo okuhombolulula, ile okuhombolululwa ngeenge ashike kaume kopahombo umwe okwa i moluhaelo. (Mateus 19:9) Ngeenge owa taalela omaupyakadi mohombo yoye, Ombiibeli otai dulu oku ku kwafela, opo u ungaunge nao pandunge nopahole.

^ okat. 14 Opo u mone ouyelele muhapu, tala oshitukulwa I Feel Guilty — Can the Bible Help Me Find Relief?