Inda koshikalimo

Ombiibeli otai ti ngahelipi kombinga yokulikufa edimo?

Ombiibeli otai ti ngahelipi kombinga yokulikufa edimo?

Enyamukulo lopaMbiibeli

Ombiibeli inai longifa oshitya “okulikufa edimo” tai ulike kokukufa mo okaana oko inaka dalwa. Ndele eevelishe dihapu dOmbiibeli oda popya nghee Kalunga a tala ko omunhu, mwa kwatelwa nokuli nomwenyo wokaana oko inaka dalwa.

Omwenyo ou li oshali ya dja kuKalunga. (Genesis 9:6; Epsalme 36:9) Kalunga okwa tala ko omwenyo womunhu keshe u na ondilo, mwa kwatelwa nokuli neemwenyo dounona ovo ve li natango moshidalelo. Onghee hano, ngeenge omunhu okwa dipaa okaana oko ke li medimo owina, kungaho okwa talika ko e li omudipai.

MOmhango oyo Kalunga a li a pa Ovaisrael okwa ti: “Novalumenhu ngeenge tava dengafana ndele tava ngwadjula omukainhu omufimba ndele ta wifa edimo, ndelenee kape noshiponga shimwe, onaku mu ngwadjula e nokufutifwa komulumenhu womukainhu, ngaashi a hala oye e nokufuta, novatokoli ngaashi tave mu tokolele. Ndelenee ngeenge omukainhu okwa fi, hano omwenyo nau yandjelwe omwenyo mukwao.” — Exodus 21:22, 23. *

 Omwenyo womunhu ohau hovele peni?

Okudja pefimbapalo Kalunga okwe shi tala ko shi li omwenyo. Kalunga okwa popya mEendjovo daye Ombiibeli, kutya okaana ina ka dalwa oke li omunhu ina tongoka. Natu taleni koihopaenenwa imwe oyo tai ulike kutya Kalunga okwa tala ko omwenyo wokaana oko ke li moshidalelo wa faafana nomwenyo womunhu oo dalwa nale.

  • Ohamba David oya nwefwa mo i popye shi na sha naKalunga ya ti: “Omesho oye okwa li taa shipununa nge, fimbo nda li engwili inandi tongoka.” (Epsalme 139:16) Kalunga okwa li a tala ko David e li omunhu nokuli nofimbo ina dalwa.

  • Shikwao vali, Kalunga okwa li e shii kutya ota ka pa omuprofeti Jeremia oshinakuwanifwa she likalekelwa ofimbo nokuli Jeremia ina dalwa. Kalunga okwe mu lombwela ta ti: “Ame onde ku hoolola nokuli fimbo inandi ku shitila medimo lanyoko, nonde ku yapula, fimbo ino dja mo medimo lanyoko, ndele nde ku ninga omuxunganeki woiwana.” — Jeremia 1:5.

  • Omushangi wOmbiibeli Lukas, oo a li ondokotola, okwa longifa oshitya shOshigreka sha faafana eshi a li ta popi kombinga yokaana oko ke li medimo nosho okaana oko opo ka dalwa. — Lukas 1:41; 2:12, 16.

 Mbela Kalunga oha dimine po ngoo omunhu oo e likufa edimo?

Ovanhu ovo ve likufa omadimo otava dulu okudiminwa po kuKalunga. Ngeenge ova shiiva etaleko laKalunga li na sha nomwenyo, inava pumbwa okukala ve udite ondjo. Ombiibeli oya ti: “Omwene Oye omunefilonghenda nomunanghenda . . . ngaashi oushilo nouninginino u lili kokule, osho Ye ha ehenifa omanyono etu kokule nafye.” (Epsalme 103:8-12) Jehova oha dimine po omanyono aeshe aavo ve livela ombedi, mwa kwatelwa nokulikufa omadimo. — Epsalme 86:5.

 Mbela okulikufa edimo osha puka ngeenge omwenyo waina ile wokaana ou li moshiponga?

Okutala kwaasho Ombiibeli ya popya shi na sha nomwenyo wokaana oko inaka dalwa, omunhu ita dulu ashike okutokola okulikufa edimo molwaashi tashi dulika omwenyo waina ile wokaana u li moshiponga.

Ongahelipi shi na sha nonghalo ya kwata moiti pefimbo ledalo ngeenge otashi pula okuhoolola okuxupifa omwenyo waina ile wokaana? Monghalo ya tya ngaho, osho oshi li etokolo lopaumwene okuhoolola kutya omwenyo ulipi po ta ka xupifa.

^ okat. 3 Omatoloko amwe Ombiibeli okwa popya shi na sha nomhango oyo ya li ya pewa Ovaisrael, kutya ina yokaana oye a li a fimanenena shi dulife okaana oko ke li medimo. Ashike Omishangwa dOshiheberi otadi ulike koshiponga osho sha ningilwa ina yokaana ile okaana oko ke li medimo.