Inda koshikalimo

Mbela osha fimana ngoo okukala melongelokalunga la unganekwa?

Mbela osha fimana ngoo okukala melongelokalunga la unganekwa?

Enyamukulo lopaMbiibeli

Heeno, molwaashi Kalunga okwa hala ovanhu va kale hava ongala pamwe, ngeenge tave mu longele. Ombiibeli oya ti: “Natu kaleni tu na ko nasha navakwetu nokuladipikafana, opo tu kale tu holafane nokulonga oilonga iwa; inatu efa po okwoongala pamwe.” — Ovaheberi 10:24, 25.

Jesus okwa popya kutya ovashikuli vaye ove na okukala ongudu ya unganekwa, eshi e va lombwela a ti: “Kungaho, ovanhu aveshe otava ka shiiva kutya nye ovahongwa vange ngeenge omu holafane.” (Johannes 13:35) Onghedi imwe ya fimana omo ovahongwa vaKristus tava dulu okuulika kutya ove holafane, omokukala hava endafana novaitaveli vakwao. Ove na okukala va unganekwa momaongalo, oo haa ongala pandjikilile, opo va longele Kalunga. (1 Ovakorinto 16:19) Ove li oumwainafana womounyuni aushe. — 1 Petrus 2:17.

Omunhu okwa pumbwa okuninga shihapu shihe fi ashike okukala melongelokalunga

Nonande Ombiibeli otai ulike kutya ovanhu ove na okwoongala pamwe opo va longele Kalunga, itai hongo kutya omunhu ota dulu okukala a hokiwa kuKalunga mokukala ashike e li oshilyo shelongelokalunga. Opo omunhu a kale a hokiwa kuKalunga, onghedi yaye yokulongela Kalunga oi na okunwefa mo onghalamwenyo yaye yakeshe efiku. Pashihopaenenwa, Ombiibeli oya ti: “Elongelokalunga olo la koshoka nolihe na edilo pataleko laKalunga Tate yetu oli na okufila oshisho eefiye novafiyekadi momaudjuu avo, noli na okulikaleka kokule nokuhenoukoshoki kwounyuni ou.” — Jakob 1:27.