Inda koshikalimo

Eendombwedi daJehova

Hoolola elaka Oshikwanyama

Mbela edu otali ka hanaunwa po?

Mbela edu otali ka hanaunwa po?

Enyamukulo lopaMbiibeli

Ahowe, opulaneta yedu kai na efiku i hanaunwe po, i pye po momundilo ile i pingenwe po. Ombiibeli otai hongo kutya Kalunga okwa shita edu li kale ovanhu fiyo alushe.

  • “Ovayuki, vo otava ka fyuulula oshilongo, ndele tava kala mo alushe.” — Epsalme 37:29.

  • ‘Kalunga okwa shitila edu keengudi dalo, lo liha tengauke nande fiyo alushe.’ — Epsalme 104:5.

  • “Edu tali kala po fiyo alushe.” — Omuudifi 1:4.

  • “Ou a ma edu ndele te li wapaleke; okwe li pameka, . . . ine li shita li kale ombuwa, ndelenee okwe li ma li kalwe.” — Jesaja 45:18.

Mbela ovanhu otava ka nyona edu?

Kalunga ita ka efa ovanhu va nyone po edu filufilu okupitila menyateko lomudingonoko ile oku li hanauna po noilwifo yoita ile noinima ikwao imwe. Ponhele yaasho, ota ka ‘nyonauna po ovo hava nyono edu.’ (Ehololo 11:18) Osho ote ke shi ninga ngahelipi?

Kalunga ota ka pingena po omapangelo opanhu, oo inaa dula okwaamena edu, nOuhamba womeulu wa wanenena. (Daniel 2:44; Mateus 6:9, 10) Ouhamba oo otau ka kala meke lOmona waye, Jesus Kristus. (Jesaja 9:6, 7) Eshi Jesus a li kombada yedu, okwa li ha longifa eenghono daye pashikumwifilonga a pangele onghalo yomhepo. (Markus 4:35-41) Jesus, e li Ohamba yOuhamba waKalunga, ota ka pangela edu nonghalo yomhepo. Ota ka shitulula oinima kombada yedu, te i ningi i kale ya faafana naayo ya li moshikunino shaEden. — Mateus 19:28; Lukas 23:43.

Hano Ombiibeli itai hongo kutya edu otali hanaunwa po nomundilo?

Ahowe, hasho tai hongo ngaho. Omutotolombo wa tya ngaho owa holoka po molwaashi ovanhu va uda ko pambabo 2 Petrus 3:7, oo a ti: “Eulu lopaife nedu eli ola tuvikililwa omundilo.” Natu ka taleni koitwa ivali ya fimana oyo tai ke tu kwafela tu ude ko eityo lomautumbulilo oo:

  1. Ombiibeli ohai longifa outumbulilo “eulu,” ‘edu’ nosho yo “omundilo” momaityo a yoolokafana. Pashihopaenenwa, Genesis 11:1 ota ti: “Mounyuni aushe omwa li elaka limwe.” Apa, outumbulilo “ounyuni” ile “edu,” pa-New World Translation, otau ulike kovanhu.

  2. Eevelishe odo da pamba 2 Petrus 3:7 otadi tu kwafele tu ude ko eityo leulu, edu nosho omundilo oo wa tumbulwa momushangwa oo. Ovelishe 5 no 6 oda popya kombinga yEyelu laNoa. Meevelishe odo omwa popiwa kutya ounyuni wonale owa li wa hanaunwa po, ashike edu inali hanaunwa po. Ponhele yaasho, eyelu ola hanauna po ovanhu ovakolokoshi ovo tava popiwa pafaneko ve li “edu.” (Genesis 6:​11) Eyelu ola li yo la hanauna po “eulu” meityo olo kutya ovanhu ovo va li tava pangele kombada yedu. Osho osha hala kutya ovanhu ovakolokoshi ovo va li va hanaunwa po, ndele hadu. Noa noukwaneumbo waye ova li va xupa pehanauno lounyuni oo, nokonima yEyelu, ova ka kombada yedu. — Genesis 8:15-18.

Sha faafana nomeva Eyelu, ehanauno ile “omundilo,” oo wa popiwa mu 2 Petrus 3:7, otau ka hanauna po ovakolokoshi, ndele itau ka hanauna po edu. Kalunga okwa udaneka “eulu lipe nedu lipe omo tamu ka kala ouyuki.” (2 Petrus 3:13) ‘Edu lipe’ ile oulikumwe mupe wovanhu, otau ka pangelwa ‘keulu lipe,’ ile tu tye kOuhamba waKalunga. Ouhamba oo otau ka ninga edu oparadisa, omo tamu ka kala ombili. — Ehololo 21:1-4.