Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Oukwaneumbo weni otau dulu okukala wa hafa

 OSHITUKULWA 5

Nghee tamu dulu okukala nombili novapambele veni

Nghee tamu dulu okukala nombili novapambele veni

“Djaleni . . . ombili, elininipiko, engungumano noutalanheni.” — Ovakolossi 3:12

Shimha ovanhu va hombola, ohava toto po oukwaneumbo wavo. Nonande ou hole nowa fimaneka ovadali voye, kaume koye kopahombo oye e na okukala omunhu a fimanenena kwoove kombada yedu. Ovapambele voye vamwe otashi dulika va mone shidjuu okutambula ko onghalo oyo. Ashike omafinamhango Ombibeli otaa dulu oku ku kwafela u kale u na ondjele, opo u dule okukaleka po ombili pokati koye novapambele eshi to longo noudiinini u kulike ekwatafano leni moukwaneumbo weni oo mupe.

 1 KALA U NA ETALEKO LIWA LI NA SHA NOVAPAMBELE VOYE

OSHO OMBIBELI TAI TI: “Fimaneka xo nanyoko.” (Ovaefeso 6:2) Kashi na nee mbudi kutya ou na omido ngapi, ou na alushe okufimaneka ovadali voye. Dimbuluka yo kutya kaume koye kopahombo naye okwa pumbwa okuyandja elitulemo kovadali vaye. “Ohole ihai fi efupa,” onghee hano, ino kwatwa kefupa eshi kaume koye kopahombo e na ekwatafano novadali vaye. — 1 Ovakorinto 13:4; Ovagalati 5:26.

OSHO TO DULU OKUNINGA:

  • Henuka okupopya omautumbulilo a hafele ngaashi, “Ovapambele voye ohava ungaunga alushe naame nodino” ile “meme woye ke hole nge”

  • Kendabala okukala u na etaleko la fa lakaume koye kopahombo

 2 VA LOMBWELENI ETALEKO LENI SHA YUKILILA, APA SHA PUMBIWA

OSHO OMBIBELI TAI TI: “Omulumenhu e nokweefa xe naina nokukanyatela komukainhu waye. Ndele vo otava ka kala onhumba imwe aike.” (Genesis 2:24) Ngeenge owa hombola, ovadali voye otashi dulika natango va kale ve udite ve na oshinakuwanifwa shoku ku tekula notashi dulika va kale va hala okulidopa mohombo yeni.

Ove nakaume koye kopahombo onye mu na okukundafana omangabeko oo mu na oku va tulila po noku va shiivifila shi na sha nao pahole. Popyeni navo mwa manguluka, tamu va lombwele sha yukilila ashike inamu shi ninga nodino. (Omayeletumbulo 15:1) Omaukwatya ngaashi elininipiko, ombili nonheni otae ke mu kwafela mu kale mu na ekwatafano liwa novapambele veni nokutwikila ‘okulididimikilafana mohole.’—Ovaefeso 4:2.

OSHO TO DULU OKUNINGA:

  • Ngeenge ou wete ovapambele va fa unene tave lidopo monghalamwenyo yeni, shi kundafana nakaume koye kopahombo pefimbo opo amushe mwa ngungumana

  • Tokoleni kutya otamu ka ungaunga ngahelipi nonghalo ya tya ngaho