Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Oukwaneumbo weni otau dulu okukala wa hafa

 OSHITUKULWA 4

Nghee mu na okuungaunga noimaliwa

Nghee mu na okuungaunga noimaliwa

“Eenghundafana tadi pameke eemhangela.” — Omayeletumbulo 20:18

Atusheni otwa pumbwa oimaliwa opo tu dule okulanda oipumbiwa yomaukwaneumbo etu. (Omayeletumbulo 30:8) Shimwe vali, ‘oimaliwa oi li epopilo,’ ile tu tye, eameno. (Omuudifi 7:12) Mu li ovalihomboli, otashi dulika shi kale shidjuu okukundafana kombinga yoimaliwa, ashike inamu efa oimaliwa i etife omaupyakadi mohombo yeni. (Ovaefeso 4:32) Omu na okukala mwe lineekelafana nokulongela kumwe ngeenge tamu tokola kutya omu na okulongifa ngahelipi oimaliwa.

 1 KUNDAFANENI NGHEE MU NA OKU I LONGIFA

OSHO OMBIBELI TAI TI: “Ngenge oku na ou womunye a hala okutunga ongulushungo, ita kala omutumba manga ngeno, ndele ta valula [oitungifo], ngenge oku na oimaliwa oku i wanifa.” (Lukas 14:28) Osha fimana okukundafana kutya otamu ka longifa ngahelipi oimaliwa yeni. (Amos 3:3) Taleni kutya omwa pumbwa okulanda shike nongeenge otamu shi wanifa ngoo. (Omayeletumbulo 31:16) Ndele okukala mu na oimaliwa ya wana okulanda oshinima inashi hala kutya omu na ashike oku shi landa. Henukeni okukala mu na eendjo. Landeni ashike oshinima osho tamu dulu okufuta. — Omayeletumbulo 21:5; 22:7.

OSHO TO DULU OKUNINGA:

  • Ngeenge pexulilo lomwedi omwe ke lihanga mu na oimaliwa ya xupa po, kundafaneni kutya otamu ke i longifa ngahelipi

  • Ngeenge ihamu xupifa po sha, ningeni eemhangela dokondadalunde di na sha nanghee tamu dulu okuninipika oinima oyo hamu futu nokulanda. Pashihopaenenwa, otamu dulu okukala hamu teleke kunye vene ponhele yoku ka lya keenhele domalandifilo

 2 KUNDAFANENI MWA MANGULUKA NOTAMU POPI OSHILI

OSHO OMBIBELI TAI TI: “[Ohatu] diinine eshi shiwa hakoshipala shOmwene ashike, ndelenee koshipala shovanhu yo.” (2 Ovakorinto 8:21) Lombwela kaume koye kutya oho kwata oimaliwa i fike peni nowa longifa i fike peni nopehe na oku mu holeka sha.

Alushe kala ho kundafana nakaume koye kopahombo fimbo ino ninga omatokolo a kwata moiti e na sha noimaliwa. (Omayeletumbulo 13:10) Okukala hamu kundafana kombinga yoimaliwa otaku ka kaleka po ombili mohombo yeni. Oyuuyemo oyo ho mono i tala ko kutya oyoukwaneumbo weni, ndele kai fi yoye oove auke. — 1 Timoteus 5:8.

OSHO TO DULU OKUNINGA:

  • Kundafaneni kutya keshe umwe ota dulu okulongifa oshimaliwa shi fike peni nopehe na okushiivifila mukwao

  • Inamu teelela pa holoke oupyakadi opo mu kundafane nawa kombinga yoimaliwa