Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Oukwaneumbo weni otau dulu okukala wa hafa

 OSHITUKULWA 7

Nghee mu na okuhonga okaana keni

Nghee mu na okuhonga okaana keni

‘Neendjovo edi ame handi ku lombwela nena, nadi kale momutima woye, ndele ove u no ku i findila movana voye.’ — Deuteronomion 6:6, 7

Eshi Jehova a tota po elongekido loukwaneumbo, okwa pa ovadali oshinakuwanifwa shokutekula ounona. (Ovakolossi 3:20) U li omudali, oove u na oshinakuwanifwa shokuhonga okaana koye ka kale ke hole Jehova noka ka ninge omukulunhu omunaendunge. (2 Timoteus 1:5; 3:15) Owa pumbwa yo okushiiva kutya oshike shi li momutima wokamwoye. Ashike osha fimanenena oku ka tulila po oshihopaenenwa. Oto ka dula ashike okuhonga nawa okaana koye Eendjovo daJehova ngeenge owe di tuvikila momutima woye. — Epsalme 40:9.

 1 SHI NINGA SHIPU KOUNONA VOYE OKUPOPYA NAAVE

OSHO OMBIBELI TAI TI: ‘Kala ho endelele okupwilikina, noho liteelele mokupopya.’ (Jakob 1:19) Kwafela ounona voye va kale ve udite kutya otava dulu okupopya naave va manguluka. Nava kale ve shi shii kutya owe lilongekida okupwilikina ngeenge tava popi. Kala omunambili opo shi kale shipu kuvo okupopya omaliudo avo. (Jakob 3:18) Ngeenge ove shii kutya oto ke va ngwenyaukila ile to va tokola, itava ka kala lela ve ku mangulukila. Kala ho lididimikile ounona voye noku va lombwela alushe kutya ou va hole. — Mateus 3:17; 1 Ovakorinto 8:1.

OSHO TO DULU OKUNINGA:

  • Kala we lilongekida okupwilikina ngeenge ounona va hala okupopya naave

  • Kala ho kundafana navo pandjikilile ndele hangeenge ashike pa holoka omaupyakadi

2 KENDABALA OKUUDA KO KUTYA OVA HALA LELA OKUTYA SHIKE

OSHO OMBIBELI TAI TI: “Ou ta diinine ondjovo, ote ke limonena ouwa.” (Omayeletumbulo 16:20) Omafimbo amwe, owa pumbwa okudiladila moule opo u ude ko filufilu omaliudo ounona ponhele ashike yokudiladila kwaasho tava popi. Luhapu ovanyasha ohava popi tava wedele ile va popye oshinima ndele hasho lela va hala okutya. “Ou ta nyamukula fimbo ina uda ko, osho oulai waye.” (Omayeletumbulo 18:13) Ino tetwa ko kehandu. — Omayeletumbulo 19:11.

OSHO TO DULU OKUNINGA:

  • Kendabala uha kwate ounona melaka ile u handuke diva, kashi na nee mbudi kutya otava popi shike

  • Dimbuluka kutya eshi wa li u fike puvo owa li ho kala u udite ngahelipi noshike sha li sha fimana kwoove

 3 LONGELENI KUMWE

OSHO OMBIBELI TAI TI: “Omumwange, pwilikina outekuduliko waxo, ndele ino ekelashi elongo lanyoko.” (Omayeletumbulo 1:8) Jehova okwa pa omushamane nomukulukadi oshinakuwanifwa shokutekula ovana vavo. Omu na okuhonga ovana voye va kale ve mu fimaneka nokudulika kunye. (Ovaefeso 6:1-3) Ounona otava dulu oku shi mona mo ngeenge ovadali vavo ‘ihava udafana.’ (1 Ovakorinto 1:10) Ngeenge itamu tu kumwe moshinima shonhumba, inamu shi holola moipafi younona molwaashi otashi ningifa ounona vaha kale vali ve mu fimaneka.

OSHO TO DULU OKUNINGA:

  • Kundafaneni nokutwa kumwe shi na sha nanghee tamu ka pa ounona veni outekuduliko

  • Ngeenge itamu tu kumwe mokutekula ounona, kendabala okuuda ko etaleko lakaume koye kopahombo

 4 LITULILENI PO ELALAKANO

OSHO OMBIBELI TAI TI: “Omona woye omumati, mu ikifa ondjila yaye ya yuka.” (Omayeletumbulo 22:6) Opo mu pondole mokuhonga ovana veni omu na okulonga noudiinini. Omu na okulitulila po elalakano langhee mu na okutekula ounona veni, olo la kwatela mo oku va pa outekuduliko. (Epsalme 127:4; Omayeletumbulo 29:17) Okuyandja outekuduliko inashi hala ashike kutya okupa ounona ehandukilo, ndele okwa kwatela mo oku va kwafela va ude ko kutya omolwashike we va tulila po eemhango donhumba. (Omayeletumbulo 28:7) Va honga yo va kale ve hole Eendjovo daJehova nokukala ve shii okudidilika mo omafinamhango ado. (Epsalme 1:2) Osho otashi ke va kwafela va ka kale ve na eliudo la deulwa nawa. — Ovaheberi 5:14.

OSHO TO DULU OKUNINGA:

  • Honga ounona voye va kale va tala ko Kalunga e li Omunhu wolela oo tava dulu okukala ve lineekela

  • Va kwafela va kale ve shii oinima oyo tai dulu okunwefa mo nai elihumbato lavo noku i henuka, ngaashi oyo hai kala kointaneta. Va honga nghee ve na okuhenuka ovo hava hepeke ounona pamilele

“Omona woye omumati mu ikifa ondjila yaye ya yuka”