Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 OSHITUKULWA 2

Ongahelipi to dulu okulihonga oshili kombinga yaKalunga?

Ongahelipi to dulu okulihonga oshili kombinga yaKalunga?

1, 2. Efaneko lilipi tali ulike omhumbwe yomufikamhango wokutokola oinima yopalongelokalunga?

ONGAHELIPI hatu dulu okushiiva Kalunga? Mbela osha pumbiwa tu konakone omahongo aeshe omalongelokalunga mahapu? Osho itashi ka shiiva. Nokuli nongeenge ohatu dulu oku shi ninga, ongahelipi hatu shiiva kutya omahongo elipi e li mondjila?

2 Doshili, molwaashi ope na omadiladilo mahapu e lili noku lili kombinga yaKalunga, otwa pumbwa omukalo wokushiiva osho shoshili, omufikamhango oo ovanhu tava dulu okudimina. Oku shi faneka: Natu tye nee ngeno ope na eemhata pomalandifilo kombinga youle woshitetela shoshiyata. Omulandifi ota ti kutya oshiyata oshi na eemeta nhatu, ndelenee omulandi ota diladila kutya oshinini. Mbela eemhata otadi dulu okukandulwa po ngahelipi? Okuyeleka oshiyata osho nometa.

3. Omolwashike Ombibeli ya shangelwa?

3 Mbela ope na ometa ile omufikamhango wokutokola oinima yopalongelokalunga? Heeno, oyo Ombibeli. Kalunga okwa shangifa Ombibeli opo ovanhu keshe pamwe va dule okulihonga oshili kombinga yaye. Eekopi omamiliyona omayovi oda li da nyanyangidwa. Oya tolokwa, mouyadi ile moitukulwa, momalaka e dule po 2 100. Konyala keshe umwe ota dulu okulesha oshili kombinga yaKalunga melaka laye mwene.

4. Ombibeli oi na omauyelele elipi?

4 Ombibeli omaano e na ondilo a dja kuKalunga. Otai yelifa oinima oyo ngeno inatu dula  nande okushiiva. Otai tu lombwele kombinga yaavo ve li monhele yopamhepo. Otai holola omadiladilo aKalunga, ounhu waye nosho yo elalakano laye. Otai popi shi na sha nanghee a ungaunga novanhu omido omayovi da pita. Otai popi oinima oyo tai ka ningwa monakwiiwa. Notai ulike nghee hatu dulu okumona ondjila oyo tai twala komwenyo waalushe.

Molwashike to dulu okwiitavela Ombibeli

5. Oshihopaenenwa shilipi tashi ulike kutya Ombibeli otai tu kumwe nounongononi?

5 Ope na omatomheno mahapu kutya omolwashike hatu dulu okwiitavela kutya Ombibeli oi li shili Eendjovo daKalunga. Etomheno limwe ololo kutya Ombibeli otai tu kumwe nounongononi. Momafimbo onale, ovanhu mounyuni aushe okwa li va diladila kutya edu ola fikama kusha. Pashihopaenenwa, muAfrika lokOuninginino, ovanhu nale ova li va itavela kutya edu ola li la yambididwa keyoka le litonya, li na omaludimbo 3 500 kombada yedu nosho yo omaludimbo 3 500 koshi yedu. Ndelenee metwokumwe nounongononi, omushangi wOmbibeli oo a shanga omido 3 500 da pita okwa shanga ta ti kutya Kalunga ota “endjelelifa edu ponhele pe he na sha.” — Job 26:7.

6. Euliko la kula lilipi tali ulike kutya Ombibeli oya dja kuKalunga?

6 Euliko la kula kutya Ombibeli oya dja shili kuKalunga olo kutya oya xunganeka alushe oshili shi na ko nasha nonakwiiwa. Mepingafano novaxunganeki vopanhu, Kalunga oku shii shili onakwiiwa; keshe osho a popya ohashi ningi alushe shoshili.

7. Omaxunganeko amwe Ombibeli elipi a wanifwa mefimbo la pita?

7 Omaxunganeko Ombibeli omafele okwa wanifwa mefimbo lonale. Pashihopaenenwa, omido 700 komesho yefimbo, Ombibeli oya popya oshili ya ti kutya Jesus ota ka dalelwa moshilando Betlehem, naashi osho sha ningwa. (Mika 5:1; Mateus 2:3-9) Kakele komaxunganeko amwe mahapu kombinga yaJesus, Ombibeli oya xunganeka yo kutya ota ka dalwa kokakadona nosho yo xuuninwa ota ka kengelelwa noisiliveli 30. Omaxunganeko oo nao okwa wanifwa. Doshili, kape na omunhu ta dulu okuxunganeka oinima oyo. — Jesaja 7:14; Sakaria 11:12, 13; Mateus 1:​22, 23; 27:3-5.

8. Omaxunganeko amwe Ombibeli elipi taa wanifwa kunena, notaa ulike shike?

8 Omaxunganeko mahapu Ombibeli otaa  wanifwa mefimbo letu. Apa ope na amwe omuo:

  • “Oshiwana noshiwana tai ka twilafana ondubo [moita], oshilongo tashi tu ondubo noshilongo shikwao, ndele tapa ka kala keenhele neenhele omakakamo madjuu edu neendjala noudu wolutapo.” — Lukas 21:10, 11.

  • ‘Oukolokoshi’ otau ka “hapupala.” — Mateus 24:12.

  • “[Momafiku] axuuninwa . . . ovanhu otava kala nokulihola vo vene, ovanalwisho voimaliwa, . . . ve he neduliko kovakulunhu, . . . ovahenalidiliko, ovakwanyanya, ovatondi vouwa, . . . ovafulalali, ohole yavo yokuhola ouhalu mwii i dule ei yokuhola Kalunga.” — 2 Timoteus 3:1-5.

Mbela ito dimine kutya oinima ei otai ningwa paife? Oushili womaxunganeko Ombibeli otau ulike kutya Ombibeli kai fi ashike embo longaho. Olo Eendjovo daKalunga da nwefwa mo. — 2 Timoteus 3:16.

Mbela Ombibeli oya lundululwa?

9, 10. Oshike tashi ulike kutya Kalunga ina pitika ovanhu va lundulule Ombibeli?

9 Natu tye nee ngeno ou li mwene wofabilika yonhumba nowa tulila po ovanailonga voye omusholondodo weemhango pekafa lomashiivifo. Ngeenge omutondi umwe okwa lundulula osho wa shanga, mbela oto ka ninga shike? Mbela ito ka wapaleka osho sha lundululwa? Monghedi ya faafana, Kalunga iha pitike ovanhu va lundulule oshili yEendjovo daye, Ombibeli.

10 Ovo va kendabala okulundulula omahongo Eendjovo daKalunga inave shi pondola. Ngeenge hatu faafanifa Ombibeli oyo tu na kunena neekopi donale dOmbibeli, oda faafana. Eshi otashi ulike kutya Ombibeli inai lundululwa nande oule womido da pita.