Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 33

Rut naNaomi

Rut naNaomi

Pefimbo londjala muIsrael, omukainhu Omuisrael wedina Naomi okwa li a tembukila kuMoab pamwe nomushamane waye novanamati vavali. Konima yefimbo, omushamane waNaomi okwa ka fya. Ovanamati vaye ova li va hombola ovakainhu Ovamoab, Rut naOrpa. Ndele shinyikifa oluhodi, ovanamati vaNaomi navo ova ka fya.

Eshi Naomi a uda kutya muIsrael kamu na vali ondjala, okwa li a tokola a shune koshilongo shavo. Rut naOrpa ova li va ya pamwe naye, ndele fimbo va li mondjila, Naomi okwa li e va lombwela a ti: ‘Omwa li ovakulukadi ve li nawa vovana vange noitenya i na eenghedi diwa. Ndele onda hala mu hombolwe vali. Shuneni keumbo kuMoab.’ Ovakainhu ovo ove mu nyamukula va ti: ‘Fye otu ku hole, inatu hala oku ku fiya po.’ Naomi okwa li a twikila oku va lombwela va shune. Hauxuuninwa, Orpa okwa shuna, ashike Rut okwa twikila okulandula Naomi. Naomi okwa li e mu lombwela a ti: ‘Orpa ota shuna koshiwana sheni nokookalunga veni. Inda pamwe naye.’ Ashike Rut okwa ti: ‘Itandi ku fiye po. Oshiwana shoye otashi ka ninga oshiwana shange, naKalunga koye ota ka ninga Kalunga kange.’ Mbela Naomi okwa li e udite ngahelipi eshi Rut a popya eendjovo odo?

Rut naNaomi ova li va fika muIsrael pehovelo leteyo loilya oyo hai ifanwa barley. Efiku limwe Rut okwa li a ka pupudulula oilya mepya lomulumenhu wedina Boas, oo a li omona waRahab. Okwa li a uda kutya Rut Omumoab, oo a twikila okukala pamwe naNaomi noudiinini. Boas okwa li a lombwela ovanailonga vaye va fiye po oilya imwe mepya opo Rut e i pupudulule po.

 Konguloshi yefiku olo, Naomi okwa li a pula Rut a ti: ‘Owa longa mepya lalyelye nena?’ Rut okwa ti: ‘Omepya lomulumenhu wedina Boas.’ Naomi okwe mu lombwela a ti: ‘Boas omukwao womushamane wange. Twikila okulonga mepya laye pamwe novakainhu ovanyasha, ito ka ningilwa owii washa.’

Rut okwa li a twikila okupupudulula mepya laBoas fiyo eteyo la pwa. Boas okwa li a didilika kutya Rut oha longo noudiinini noku na omaukwatya mawa. Pefimbo opo, ngeenge omushamane a fi ehe na ounona, omukwapata waye umwe okwa li ha hombola po omufiyekadi waye. Onghee hano, Boas okwa hombola po Rut. Ova li va dala okaana okamati kedina Obed, oko kaka ninga xekulu yohamba David. Ookahewa kaNaomi ova li va hafa neenghono. Ova ti: ‘Tete, Jehova okwe ku pa Rut, oo a kala ta ungaunga naave nawa, ndele paife okwe ku pa okatekulu. Jehova na hambelelwe.’

“Ope nookaume ve dule ovamwaina ovalumenhu mokulineekelwa.” — Omayeletumbulo 18:24