Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 18

Oshixwa sheno sha tema

Oshixwa sheno sha tema

Moses okwa kala muMidian oule womido 40. Okwa hombola nokwa li e na ounona. Efiku limwe fimbo a li ta lifa eedi popepi nomhunda yaSinai, okwa li a mona oshinima shikumwifi. Okwa li a mona oshixwa sheno tashi pi ndele itashi lungwina po. Eshi a ehena popepi nasho a tale kutya oshike tashi ningwa po, okwa li a uda ondaka tai di moshixwa tai ti: ‘Moses! Ino ehena oku. Dula ko eenghaku doye, osheshi onhele apa u li ofika oiyapuki.’ Jehova oye a li ta popi okupitila momweengeli.

Moses okwa li a tila, nomolwaasho okwa li a uvika oshipala shaye. Ondaka oyo oya ti: ‘Ame onda mona okuhepekwa kwOvaisrael. Ohandi ke va mangulula mo muEgipti noku va twala kedu liwa. Oove to ka kwatela komesho oshiwana shange okudja muEgipti.’ Oshinima osho kasha li tuu sha kumwifa Moses!

Moses okwa li a pula a ti: ‘Ohandi ka nyamukula ngahelipi ngeenge oshiwana osha pula nge kutya olyelye a tuma nge?’ Kalunga okwa li e mu nyamukula a ti: ‘Va lombwela kutya Jehova, Kalunga kaAbraham, Kalunga kaIsak naKalunga kaJakob, oye a tuma nge.’ Opo nee Moses okwa li a pula ta ti: ‘Ngeenge oshiwana osha kala inashi pwilikina nge?’ Jehova okwa li a pa Moses oumbangi kutya ote ke mu kwafela. Okwa li e mu lombwela a ekele odibo yaye pedu, ndele tai shituka eyoka. Eshi Moses a kuma eyoka komushila, ola li vali la shituka odibo. Jehova okwa li e mu lombwela a ti: ‘Ngeenge owa longo oikumwifilonga oyo, otashi ka ulika kutya aame nde ku tuma.’

Moses okwa ti: ‘Ame nghi shii okupopya.’ Jehova okwa li e mu udanekela a ti: ‘Ohandi ke ku lombwela osho to ka popya, nohandi ka tuma omumwaxo Aron e ku kwafele.’ Molwaashi Moses okwa li e shii kutya Jehova oku li pamwe naye, okwa kufa omukulukadi waye novanamati vaye ndele tava i kuEgipti.

“Inamu kala noshisho mu tye ngahelipi ile mu popye shike, osheshi onye tamu pewa efimbo tuu olo odo mu noku di popya.” — Mateus 10:19