Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 98

Oukriste wa tandavela moiwana ihapu

Oukriste wa tandavela moiwana ihapu

Ovayapostoli ova li va dulika kelombwelo laJesus li na sha nokuudifa onghundana iwa mounyuni aushe. Mo 47 O.P., ovamwatate muAntiokia ova li va tuma Paulus naBarnabas va ka udife. Ovaudifi ovo vavali ovaladi ova li va enda muAsia Linini alishe, keenhele ngaashi Derbe, Listra nomuIkonio.

Paulus naBarnabas ova li va udifila keshe umwe, kutya nee omukengeli ile omufyoona, okaana ile omukulunhu. Ovanhu vahapu ova li va tambula ko oshili kombinga yaKristus. Eshi Paulus naBarnabas va udifila Sirgius Paulus, omupangeli waKipro, omhule ile ondudu imwe oya li ya kendabala oku va kelela. Paulus okwa li a lombwela omhule oyo a ti: ‘Jehova oku li omhinge naave.’ Ombadilila, omhule oya li ya ninga omupofi. Eshi omupangeli Paulus a mona oshiningwanima osho okwa ninga omwiitaveli.

Paulus naBarnabas ova li va udifila keshe pamwe, momaumbo, peenhele domalandifilo, meendjila nomeeshinagoga. Eshi va velula omulumenhu oshilema muListra, ovo va mona oshikumwifilonga osho ova li ve shii ooPaulus ovo ookalunga ndele tava kendabala oku va longela. Ashike Paulus naBarnabas ove va kelela, tava ti: ‘Longeleni ashike Kalunga. Fye ovanhu ashike.’ Opo nee ope uya Ovajuda vamwe ndele tava ningifa ovanhu va ponokele Paulus. Ovanhu ova denga Paulus nomamanya, ndele tave mu kokololele kondje yoshilando noku mu fiya po tava diladila kutya okwa fya. Ashike Paulus okwa li e na omwenyo natango. Ovamwatate ova li ve uya diva oku mu kwafela ndele tave mu twala moshilando. Konima yefimbo, Paulus okwa li a shuna kuAntiokia.

Mo 49 O.P., Paulus okwa li vali a ya molweendo limwe. Konima eshi a ya a ka talele po ovamwaxe muAsia Linini, okwa li a ka udifila onghundana iwa kokule, kuEuropa. Okwa li a ya kuAtena, Efeso, Filippi, Tessalonika nosho yo  keenhele dimwe. Okwa li yo a ya molweendo pamwe naSilas, Lukas nosho yo omunyasha wedina Timoteus. Ova li va longa pamwe mokutota po omaongalo nosho yo oku a kwafela a kale a pama. Paulus okwa kala muKorinto oule wodula netata, ta pameke ovamwaxe. Okwa li a udifa, a honga nokwa shangela omaongalo mahapu eenhumwafo. Okwa li yo ha hondjo eetenda. Mokweendela ko kwefimbo, Paulus okwa li a shuna kuAntiokia.

Konima yefimbo, mo 52 O.P., Paulus okwa li a ya molweendo olutitatu, a hovela muAsia Linini. Okwa li a yuka kolundume kuFilippi ndele tai yo kuKorinto. Okwa kala omido dihapu muEfeso, ta hongo, ta velula noku kwafela eongalo. Okwa li yo ha yandje oipopiwa yomoipafi efiku keshe molupale lofikola. Ovanhu vahapu ova li va pwilikina ndele tava lundulula eenghedi davo. Hauxuuninwa, konima eshi Paulus a udifa onghundana iwa moilongo ihapu, okwa li a ya kuJerusalem.

“Indeni hano ka ningeni ovanhu aveshe ovalongwa vange.” — Mateus 28:19