Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 80

Jesus ta hoolola ovayapostoli omulongo navavali

Jesus ta hoolola ovayapostoli omulongo navavali

Konima eshi Jesus a kala ta udifa oule wodula netata lwaapo, okwa li e na okuninga etokolo la fimana. Okwa li ta ka hoolola oolyelye va longe pamwe naye? Ota ka deula oolyelye va kale tava pashukile eongalo lopaKriste? Jesus okwa li a pumbwa ewiliko laJehova opo a ninge etokolo olo. Opo nee okwa li a ya komhunda oye aeke, ndele ta ilikana oufiku aushe. Ongula eshi kwa sha, Jesus okwa ifana ovahongwa vaye vamwe ndele ta hoolola ovayapostoli vaye 12. Mbela omadina avo elipi to dimbuluka? Omadina avo okwa li: Petrus, Andreas, Jakob, Johannes, Filippus, Bartolomeus, Tomas, Mateus, Jakob omona waAlfeus, Tadeus, Simon naJudas Iskariot.

Andreas, Petrus, Filippus, Jakob

Ovayapostoli omulongo navavali ova li ve na okweenda pamwe naJesus. Konima eshi e va deula, okwa li e va tuma va ka udife kuvo vene. Jehova okwa li e va pa eenghono dokuta mo eendemoni nokuvelula ovanaudu.

Johannes, Mateus, Bartolomeus, Tomas

Jesus okwa ifana ovayapostoli omulongo navavali ookaume kaye nokwa li e ve lineekela. Ovafarisai ova li tava diladila kutya ovayapostoli ovanhu vongaho noinava hongwa. Ashike Jesus okwa li e va pa edeulo  omolwoilonga yavo. Ova li tava ka kala naJesus pomafimbo a fimanenena monghalamwenyo yaye, ngaashi fimbo ina fya naashi a nyumuka. Ngaashi Jesus, vahapu vomovayapostoli vaye omulongo navavali ova dja muGalilea. Vamwe vomuvo ova li va hombola.

Jakob omona waAlfeus, Judas Iskariot, Tadeus, Simon

Ovayapostoli kava li va wanenena nova li hava ningi omapuko. Omafimbo amwe ova li hava popi nopehe na okudiladila nokuninga omatokolo ehe li pandunge. Natango omafimbo amwe ova li hava kala vehe na elididimiko nova li nokuli hava tu eemhata kutya olyelye a fimana e dule vakwao. Ashike ova li ovanhu ve li nawa ovo ve hole Jehova. Ovayapostoli ovo ovo va li tava ka kala oilyo ya fimana yeongalo lopaKriste ngeenge Jesus a shuna meulu.

“Onde mu ifana ookaume, osheshi ashishe eshi nde shi uda muTate, onde shi mu shiivifila.” — Johannes 15:15