Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 68

Elisabet ta mono okaana

Elisabet ta mono okaana

Omido di dule 400 okudja eshi ekuma laJerusalem la tungululwa, omupristeri wedina Sakaria nomukulukadi waye Elisabet, ova li hava kala moshilando shi li popepi. Ova kala va hombola oule womido ndele kava li ve na ounona. Efiku limwe fimbo Sakaria a li ta xwike oitwimino mouyapuki wotembeli, okwa li a holokelwa komweengeli Gabriel. Sakaria okwa li a tila, ndele Gabriel ta ti: ‘Ino tila. Onde ku etela onghundana iwa ya dja kuJehova. Omukulukadi woye Elisabet ota ka dala okaana okamati nedina lako otali ka kala Johannes. Jehova okwa hoolola Johannes a ka longe oshilonga she likalekelwa.’ Sakaria okwa pula a ti: ‘Ongahelipi handi dulu okukala ndi na oushili mwaasho to popi? Ame nomukulukadi wange otwa kulupa nokumona ounona.’ Gabriel okwa ti: ‘Onda tumwa kuKalunga ndi ku lombwele onghundana oyo iwa. Ndele molwaashi ino itavela osho nda popya, ito ka popya fiyo okaana ka dalwa.’

Sakaria okwa kala oule wefimbo mouyapuki shi dulife shito. Nomolwaasho eshi a ya pondje, ovanhu ovo va li va teelela pondje ova li va hala okushiiva kutya oshike sha ningwa po. Sakaria ka li ta popi, okwa li ashike ta udike neenyala. Opo nee ovanhu ova li va didilika kutya Sakaria okwa pewa etumwalaka la dja kuKalunga.

Konima yefimbo, Elisabet okwa li a ninga eteelelo ndele ta dala okaana okamati, ngaashi ashike omweengeli a li a popya. Ookahewa novapambele vaye ova li ve uya okutala okaana nova li va hafa. Elisabet okwe va lombwela a ti: ‘Edina lako oJohannes.’ Ove mu nyamukula va ti: ‘Mepata leni kamu na omunhu e na edina olo. Ka luka Sakaria, ka ninge mbushe yaxe.’ Ashike Sakaria okwa shanga ta ti: ‘Edina lako oJohannes.’ Okudja opo, Sakaria okwa li a hovela vali okupopya. Onghundana i na sha nokaana oya li ya tandavela muJudea ashishe, novanhu ova li tave lipula tava ti: ‘Mbela okaana oko otaka ka kala ka tya ngahelipi ngeenge ka kulu?’

Opo nee Sakaria okwa li a tililwa omhepo iyapuki, ndele ta xunganeke ta ti: ‘Jehova na hambelelwe. Okwa udanekela Abraham kutya ota ka tuma omuxupifi, Messias, e tu xupife. Johannes ota ka ninga omuprofeti, nota ka longekidila Messias ondjila.’

 Omupambele waElisabet, Maria, naye okwa li yo a ningilwa oshinima she likalekelwa. Metukulwa tali landula, ohatu ka mona kutya oshike sha li sha ningwa po.

“Ovanhu ohava nyengwa, ndele Kalunga iha nyengwa kusha.” — Mateus 19:26