Inda koshikalimo

Inda koshikalimo

Eendombwedi daJehova

Hoolola elaka Oshikwanyama

 ETUKULWA 63

Eshangelo lokekuma

Eshangelo lokekuma

Konima yefimbo, Belsassar okwa ninga ohamba yaBabilon. Oufiku umwe okwa li a shiva ovanhu eyovi ovo va fimana koshivilo. Okwa li a lombwela ovapiya vaye va ete omakopi oshingoli oo Nebukadnesar a kufa motembeli yaJehova. Belsassar novaenda vaye ova li va nwina momakopi oo nokufimaneka oikalunga yavo. Ombadilila, opa li pa holoka eke lomunhu ndele tali tameke okushanga oitya ihe uditike kekuma lonhele yokulila.

Belsassar okwa li a tila neenghono. Opo nee okwa ifana eemhule daye ndele te di udanekele ta ti: ‘Ngeenge ope na oo ta dulu okufatululila nge oitya ei, ohandi ke mu ninga omupangeli omutitatu a fimana muBabilon.’ Ova li va kendabala, ndele kape na oo a dula okufatulula oitya oyo. Ina yohamba okwe uya mo ndele ta ti: ‘Ope na omulumenhu wedina Daniel oo a li ha fatululile Nebukadnesar eendjodi. Ota dulu oku ku fatululila oitya oyo.’

Opo nee Daniel okwe uya kohamba. Belsassar okwa ti kuye: ‘Ngeenge oto dulu okulesha oitya ei noku i fatulula, ohandi ke ku pa elyenge loshingoli nohandi ke ku ninga omulumenhu omutitatu a fimanenena muBabilon.’ Opo nee Daniel okwa tya: ‘Inandi hala omaano oye, ashike ohandi ku lombwele kutya oitya ei otai ti ngahelipi. Tate woye, Nebukadnesar, okwa li e na ounhwa, na Jehova okwa li e mu lininipikifa. Ou shii keshe shimwe osho she mu ningilwa, ashike ino fimaneka Jehova eshi wa nwina omaviinyu momakopi oshingoli a dja motembeli yaYe. Onghee hano Kalunga okwa shanga oitya ei: Mene, Mene, Tekel naUfarsin. Oitya oyo otai ti Ovamedia nOvapersia otava ka finda Babilon, naave ito ka kala vali ohamba.’

Okwa li tashi monika pa fa pehe na ngeno oo ta dulu okufinda Babilon. Oshilando osho osha li sha amenwa kekuma linene nosho yo komulonga mule. Ashike oufiku oo, Ovamedia nOvapersia ova li ve shi ponokela. Kores ohamba yaPersia okwa li a panuna mo omeva momulonga opo ovakwaita va dule  okutaulula fiyo okomuvelo woshilando. Eshi va fika komuvelo, owa li wa yeuluka. Ovakwaita ova li va ponokela moshilando nova li va finda oshilando ndele tava dipaa ohamba. Opo nee Kores okwa li a ninga omupangeli waBabilon.

Konima yomudo umwe, Kores okwa li a shiivifa a ti: ‘Jehova okwa lombwela nge ndi tungulule otembeli yaye muJerusalem. Keshe oo a hala okukwafela okwa manguluka okuya.’ Ngaashi ashike Jehova a udaneka, Ovajuda vahapu ova li va shuna keumbo konima yeedula 70 okudja eshi Jerusalem sha hanaunwa po. Kores okwa shunifa omakopi oshingoli noshisilveri noilongifo oyo Nebukadnesar a li a kufa motembeli. Mbela ou wete nghee Jehova a li a longifa Kores opo a kwafele oshiwana shaYe?

“Sha teka po, sha teka po, Babilon, oshilando shinene, sha ninga onhele yokukala eendemoni.” — Ehololo 18:2