Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli otai hongo lela shike?

OSHIWEDELWAKO

Ouvalelo wOmwene—edano olo tali fimanekifa Kalunga

Ouvalelo wOmwene—edano olo tali fimanekifa Kalunga

OVAKRISTE ova lombwelwa va kale hava dana Edimbuluko lefyo laKristus. Edano olo ohali ifanwa yo “Ouvalelo wOmwene.” (1 Ovakorinto 11:20, OB-1986) Mbela oshike shididilikwedi kombinga yao? Onaini nongahelipi u na okudanwa?

Jesus Kristus okwa dika po edano olo oufiku wOpaasa yOshijuda mo 33 O.P. Opaasa oya li edano hali danwa ashike lumwe momudo, mefiku eti-14 lohani Nisan yOshijuda. Opo Ovajuda va valule efiku olo, ova li hava teelele efiku lonhumba pefimbo loitemadula olo oufiku nomutenya hau kala u na oule u fike pamwe. Olo olo efiku olo haku kala ku na eevili 12 lwaapo omutenya nosho yo eevili 12 oufiku. Omwedi Nisan owa li hau hovele ngeenge ohani ya ningi ipe konima yefiku olo oufiku nomutenya hau kala u na oule u fike pamwe. Opaasa oya li hai danwa konima yomafiku 14, eshi etango la ningina.

Jesus okwa dana oshivilo shOpaasa novayapostoli vaye, ndele ta lekele Judas Iskariot, opo nee okwa dika po Ouvalelo wOmwene. Ouvalelo oo, owa pingena po Opaasa yOshijuda, onghee hano ou na ashike okudanwa lumwe aluke momudo.

 Evangeli laMateus otali hokolola tali ti: “Jesus okwa kufa omungome, ndee ta hambelele, ndee te u pambula, ndele te u pe ovalongwa vaye ndee ta ti: Tambuleni, lyeni; eshi olutu lange. Opo Ye okwa kufa eholo, ndee ta pandula, ndee te li va [pe], ndee ta ti: Nweni mo amushe; osheshi olo ohonde yange, ohonde yehangano, tai tilwashi [omolwavahapu] oyokudima po omatimba.” — Mateus 26:26-28.

Vamwe ova itavela kutya Jesus okwa li a lundululila omungome mombelela yaye yo venevene nomaviinyu mohonde yaye. Ndelenee eshi Jesus a li ta yandje omungome oo, olutu laye ola li le lixwa po. Mbela ovayapostoli vaJesus ova li va lya shili ombelela yaye yo venevene nokunwa ohonde yaye? Hasho, omolwaashi osho okwa li tashi ka tya okulya ombelela yomunhu notashi nyono omhango yaKalunga. (Genesis 9:3, 4; Leviticus 17:10) PaLukas 22:20, Jesus okwa ti: “Eholo eli olo ehangano lipe omohonde yange tai tilwashi molweni.” Mbela eholo olo ola li la ninga lelalela “ehangano lipe”? Osho kasha li tashi shiiva, molwaashi ehangano oli li eudafanotwokumwe, ndele kali fi oshinima osho hashi dulu okukumwa.

Onghee hano, omungome nomaviinyu oi li ashike omadidiliko. Omungome otau faneke olutu laKristus la wanenena. Jesus okwa longifa oshipambu shomungome osho sha li sha xupa po pouvalelo wOpaasa. Omungome owa li wa telekwa inau tulwa onhafi ile efulika. (Exodus 12:8) Ombibeli ohai longifa luhapu onhafi i li edidiliko loulunde ile enyonauko. Hano omungome otau faneke olutu laJesus la wanenena, olo a yamba po. Kala li li na oulunde nandenande. — Mateus 16:11, 12; 1 Ovakorinto 5:6, 7; 1 Petrus 2:22; 1 Johannes 2:1, 2.

Omaviinyu matilyana otaa faneke ohonde yaJesus. Ohonde oyo otai kwashilipaleke ehangano lipe. Jesus okwa ti kutya ohonde yaye oya li ya tilwashi ‘omolwokudima po omatimba.’ Kungaha, ovanhu otava dulu okukala va koshoka momesho aKalunga notava dulu okuya mehangano lipe naYe. (Ovaheberi 9:14; 10:16, 17) Ehangano ile eudafano olo, otali shi ningi tashi shiiva kOvakriste ovadiinini 144 000 va ye meulu. Otava ka kala eehamba novapristeri meulu, omolwomanangeko noupuna ovanhu kombada yedu. — Genesis 22:18; Jeremia 31:31-33; 1 Petrus 2:9; Ehololo 5:9, 10; 14:1-3.

Oolyelye ve na okukufa ombinga momadidiliko oo e na sha nEdimbuluko? Osha yela kutya, ovovo ashike ve li oshitukulwa  shehangano lipe ve na okulya omungome nokunwa omaviinyu, sha hala okutya, ovo ve na eteelelo lokuya meulu. Omhepo iyapuki yaKalunga ohai yandje oumbangi kovanhu va tya ngaho kutya ova hoololwa va ka kale eehamba domeulu. (Ovaroma 8:16) Ove li yo mehangano lOuhamba naJesus. — Lukas 22:29.

Ongahelipi shi na sha naavo ve na eteelelo loku ka kala nomwenyo fiyo alushe mOparadisa kombada yedu? Ohava dulika kelombwelo laJesus nohava kala pOuvalelo wOmwene, ndele ohave uya ashike ngaashi ovatali nefimaneko, ndele kave fi ovakufimbinga. Eendombwedi daJehova ohadi dana Ouvalelo wOmwene lumwe aluke momudo mo 14 aNisan, konima eshi etango la ningina. Nonande ovanhu ashike omayovi manini mounyuni aushe ve na eteelelo lokuya meulu, edano olo ola fimanenena kOvakriste aveshe. Olo omhito oyo aveshe tava dulu okudiladila kohole inene yaJehova Kalunga nosho yo yaJesus Kristus. — Johannes 3:16.