Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli otai hongo lela shike?

 ETUKULWA 12

Onghedi yokukalamwenyo oyo tai hafifa Kalunga

Onghedi yokukalamwenyo oyo tai hafifa Kalunga
  • Ongahelipi to dulu okuninga kaume kaKalunga?

  • Owa kwatelwa mo ngahelipi momhata oyo Satana a etifa po?

  • Elihumbato lilipi tali nyemateke Jehova?

  • Ongahelipi to dulu okukala nonghedi yokukalamwenyo oyo tai hafifa Kalunga?

1, 2. Yandja oihopaenenwa yonhumba i na sha novanhu ovo Jehova a li a tala ko ve li ookaume kaye kopofingo.

NATU tye nee ngeno oto hoolola omunhu a kale kaume koye, ngeno oto ka hoolola omunhu a tya ngahelipi a kale kaume koye? Osha yela kutya ngeno oto ka kala wa hala okukala nakaume oo e na etaleko la fa loye, e hole osho u hole noha kala pamifikamhango da fa doye. Otashi dulika yo to ka nanenwa kwaao e na omaukwatya mawa, ngaashi ouyuki nolune.

2 Momukokomoko wondjokonona yovanhu, Kalunga okwa kala ha hoolola ovanhu vonhumba va kale ookaume kaye kopofingo. Pashihopaenenwa, Jehova okwa ifana Abraham kaume kaye. (Jesaja 41:8; Jakob 2:23) Okwa popya shi na sha naDavid kutya “omulumenhu nde mu hokwa komutima wange,” molwaashi David okwa li e na omaukwatya oo Jehova e hole. (Oilonga 13:22) Jehova okwa li yo a tala ko omuprofeti Daniel e li omunhu “muwa unene.” — Daniel 9:23.

3. Omolwashike Jehova ha hoolola ovanhu vonhumba va kale ookaume kaye?

3 Omolwashike Jehova kwa li a tala ko Abraham, David nosho yo Daniel ve li ookaume kaye? Okwa li a lombwela Abraham a ti: “Ove wa uda ondaka yange.” (Genesis 22:18) Onghee hano, Jehova oha ehene popepi naavo hava longo nelininipiko osho ta pula  va ninge. Okwa li a lombwela Ovaisrael a ti: “Dulikeni kondaka yange, opo nee handi ka kala Kalunga keni, ndele nye otamu ka ninga ovanhu vange.” (Jeremia 7:23) Ngeenge owa kala ho dulika kuJehova, naave oto dulu okuninga kaume kaye.

JEHOVA OHA PAMEKE OOKAUME KAYE

4, 5. Jehova oha longifa ngahelipi eenghono daye okupameka ovapiya vaye?

4 Diladila komauwa oo haa di mokukala kaume kaKalunga. Ombibeli otai ti kutya Jehova ota kongo eemhito “opo a kwafe neenghono ovo have liameke kuye nomutima aushe.” (2 Omafimbo 16:9) Ongahelipi Jehova ta dulu okulongifa eenghono daye oku ku pameka? Onghedi imwe oyo ta dulu oku shi ninga oya popiwa mEpsalme 32:8, omo hatu lesha taku ti: “[Ame Jehova] onda hala ndi ku longe, ndi ku udikile ondjila, ei u nokweenda nayo; onda hala ndi ku twe omayele; eisho lange tali ku pashukile.”

5 Eendjovo odo di na sha nefiloshisho laJehova itadi kumu tuu omutima! Ote ku pe ewiliko olo wa pumbwa noku ku pashukila eshi to litula moilonga. Kalunga okwa hala oku ku kwafela u lididimikile omayeleko nomupondo. (Epsalme 55:23) Onghee hano, ngeenge oto longele Jehova nomutima aushe, oto dulu okukala nelineekelo ngaashi omupsalme oo a ti: “Alushe ohandi kwatele Omwene koshipala shange; eshi Ye e li kolulyo lange, ihandi tengauka.” (Epsalme 16:8; 63:9) Heeno, Jehova ota dulu oku ku kwafela u kale nonghedi yokukalamwenyo oyo tai mu hafifa. Ndele ngaashi u shi shii, ope na omutondi waKalunga oo a hala oku ku kelela u he shi ninge.

OMHATA OYO YA ETIFWA PO KU-SATANA

6. Satana okwa twa omhata ilipi shi na sha novanhu?

6 Etukulwa eti-11 lembo eli otali yelifa nghee Satana Ondiaboli a li a shonga ounamapangelo waKalunga. Satana okwa lundila Kalunga kutya omunaipupulu nonokutya ka li omuyuki eshi ina efa Adam naEva va tokole kuvo vene osho shi li mondjila naasho sha puka. Konima eshi Adam naEva va nyona nedu la hovela okuyadifwa oludalo lavo, Satana okwa tula momalimbililo omalinyengotomheno ovanhu aveshe. Satana okwa li lelalela a  hala okutya: “Ovanhu ihava longele Kalunga molwaashi ve mu hole. Ngeenge onda pewa omhito, ohandi dulu okwaamuna ko keshe umwe kuKalunga.” Ehokololo lomulumenhu wedina Job otali ulike kutya osho osho Satana a li a itavela. Job okwa li lyelye nokwa li a kwatelwa ngahelipi momhata oyo Satana a etifa po?

7, 8. (a) Oshike sha li sha ningifa Job a kale a tongomana mokati kovanhu vopefimbo laye? (b) Ongahelipi Satana a li a tula omalinyengotomheno aJob momalimbililo?

7 Job okwa li ko omido 3 600 da pita. Okwa li omulumenhu muwa, omolwaasho Jehova okwa popya shi na sha naye a ti: “Kombada yedu kaku na nande umwe ngaashi ye: omulumenhu e he noshipo, nomuyuki ndee ta tila Kalunga ndee ta kukuma owii.” (Job 1:8) Job okwa li a hokiwa kuKalunga.

8 Satana okwa li a tula momalimbililo omalinyengotomheno aJob e na sha nokulongela Kalunga. Ondiaboli oya ti kuJehova: “Ove mwene, ndi shii, [wa amena Job] keembinga adishe neumbo laye naaishe e i kwete. Ove wa nangeka noupuna oilonga yomake aye noimuna yaye ya hapupala neenghono moshilongo. Ndelenee nana eke loye u kume aishe e i kwete: ye ote ke ku liteeka shili moipafi yoye.” — Job 1:10, 11.

9. Jehova okwe linyenga ngahelipi komhata oyo Satana a etifa po nomolwashike?

9 Kungaha, Satana okwa twa omhata kutya Job okwa li ashike ta longele Kalunga omolwouwa oo Kalunga te mu ningile. Ondiaboli oya ti yo kutya ngeenge Job okwa yelekwa, ote ke liteeka po Kalunga. Jehova okwe linyenga ngahelipi komhata yaSatana? Molwaashi omhata oyo oya li ya kwatela mo omalinyengotomheno aJob, Jehova okwa efa Satana a yeleke Job. Kungaha, oushili kutya Job okwa li e hole Kalunga ile hasho owa li tau ka yela mo nawa.

JOB OKWA LI A YELEKWA

10. Omayeleko elipi a li a hanga Job, nokwe linyenga ngahelipi?

10 Konima yefimbo, Satana okwa ka yeleka Job meenghedi di lili noku lili. Oimuna imwe yaJob oya li ya vakwa po naimwe oya li ya dipawa. Ovapiya vaye vahapu ova li va dipawa. Osho osha li sha etifa oudjuu wopamaxupilo. Natango, opa li pa holoka oshiponga eshi ovana vaJob omulongo va li va fila moshikungulu.  Ndele nonande opa li pa ningwa oiningwanima oyo inyanyalifa, “Job ina nyona sha ndele ina popya sha shokupa Kalunga oushima.” — Job 1:22.

11. (a) Satana okwa li a lundila Job olutivali a ti ngahelipi, na Jehova okwe linyenga ngahelipi? (b) Job okwa li e linyenga ngahelipi komukifi waye uyahama?

11 Satana ka li a sholola. Okwa li a diladila kutya nonande Job okwa li a dula okulididimikila okukanifa oiniwe yaye, okufilwa ovapiya vaye nosho yo ounona vaye, okwa li te ke liteeka Kalunga ngeenge okwa kwatwa komukifi. Jehova okwa efa Satana a etele Job omukifi unyanyalifi nouyahameka. Ndele naasho kasha li sha kanififa Job eitavelo muKalunga. Ponhele yaasho, okwa popya a tokola toko a ti: “Fiyo handi ka fuda mo omufudo wange, itandi ekeleshi po ouyuki wange.” — Job 27:5.

Job okwa li a pewa ondjabi omolwoudiinini waye

12. Job okwa li e linyenga ngahelipi komhata oyo Ondiaboli ya etifa po?

12 Job ka li e shii kutya Satana oye a li a etifa omaudjuu aye. Molwaashi Job ka li e shii kutya opa li omhata oyo ya etifwa po kOndiaboli i na sha nounamapangelo waJehova, okwa li ta diladila kutya Kalunga oye a li a etifa omaupyakadi aye. (Job 6:4; 16:11-14) Ndele nande ongaho, okwa li a kanyatela oudiinini waye kuJehova. Epopyo laSatana kutya Job okwa li ta longele Kalunga omolwomatomheno okulihola mwene inali nyanekwa tuu pomutenya koudiinini waJob kutya kala li loshili!

13. Oshike sha ningwa po omolwoudiinini waJob kuKalunga?

13 Oudiinini waJob owa li wa pa Jehova omhito a yandje enyamukulo la yela li na sha nomhata oyo Satana a etifa po tai ulike odino. Job okwa li shili kaume kaJehova, na Jehova okwe mu pa ondjabi omolwoudiinini waye. — Job 42:12-17.

NGHEE WA KWATELWA MOMHATA OYO

14, 15. Omolwashike hatu dulu okutya kutya eshongo laSatana olo a shonga nalo Job ola kwatela mo ovanhu aveshe?

14 Omhata youdiinini kuKalunga oyo ya etifwa po kuSatana kaya li i na sha naJob aeke. Naave owa kwatelwa mo. Osho osha ulikwa nawa mOmayeletumbulo 27:11, omo Eendjovo daJehova tadi ti: “[Kala] u neendunge, omumwange, hafifa omutima wange, opo nee handi dulu okunyamukula [ou ta lundile nge, NW].” Eendjovo odo da shangwa pwa pita omido omafele  konima yefyo laJob, otadi ulike kutya Satana ota lundile natango Kalunga nosho yo ovapiya vaYe. Ngeenge ohatu kala nonghedi yokukalamwenyo oyo tai hafifa Jehova, ohatu kwafele mokuyandja enyamukulo komalundilo aSatana, nomonghedi oyo ohatu hafifa omutima waJehova. Mbela ou udite ngahelipi shi na sha naasho? Mbela itashi ka kala shiwa neenghono okukala u na ombinga mokunyamukula omapopyo oipupulu Ondiaboli, nokuli nonande otashi pula okuninga omalunduluko onhumba monghalamwenyo yoye?

15 Didilika kutya Satana okwa ti: ‘Omunhu keshe osho e shi na, te shi yandjele omwenyo waye.’ (Job 2:4) Mokupopya shi na sha ‘nomunhu keshe,’ Satana okwe shi yelifa nawa kutya ka li ashike a shonga Job ndele ovanhu aveshe. Osho oshitwa sha fimanenena. Satana okwa tula momalimbililo oudiinini woye kuKalunga. Ondiaboli oya hala oku ku ningifa u kale ito dulika kuKalunga nou efe po onghedi yokukalamwenyo i li pauyuki ngeenge to hangwa komaudjuu. Satana otashi dulika a kendabale oku shi ninga monghedi ilipi?

16. (a) Omeenghedi dilipi Satana ta kendabala okwaamuna ko ovanhu kuKalunga? (b) Ongahelipi Ondiaboli tai dulu okulongifa eenghedi odo oku ku amuna ko kuKalunga?

16 Ngaashi sha kundafanwa mEtukulwa eti-10, Satana oha longifa eenghedi di lili noku lili okukendabala okwaamuna ko ovanhu kuKalunga. Peemhito dimwe, oha ponokele “ngaashi onghoshi hai kumbu, nota kongo ou te mu xwake po.” (1 Petrus 5:8) Kungaha, enwefemo laSatana otashi dulika li monike ngeenge ookaume koye, ovapambele voye ile vamwe ve lili tava pataneke eenghendabala doye dokukonakona Ombibeli nokutula moilonga osho to lihongo. * (Johannes 15:19, 20) Peemhito dimwe vali, Satana ohe “lifefa omwengeli wouyelele.” (2 Ovakorinto 11:14) Ondiaboli otai dulu okulongifa eenghedi domonanguwi opo i ku pukife noku ku koka mo monghedi yokukalamwenyo  yopakalunga. Otai dulu yo okulongifa etekomukumo, tashi dulika i ku ningife u kale u udite kutya ito dulu okuhafifa Kalunga. (Omayeletumbulo 24:10) Kutya nee Satana ote lifefa ‘onghoshi tai kumbu’ ile ote lifefa “omwengeli wouyelele,” omhata yaye oyo ashike oyo kutya: Ngeenge owa shakeneke omayeleko, oto ka efa po okulongela Kalunga. Ongahelipi to dulu okunyamukula eshongo laye nokukala omudiinini kuKalunga ngaashi Job a ninga?

DULIKA KOIPANGO YAJEHOVA

17. Etomheno la fimanenena lokudulika koipango yaJehova olilipi?

17 Oto dulu okunyamukula eshongo laSatana mokukala nonghedi yokukalamwenyo oyo tai hafifa Kalunga. Osho osha kwatela mo shike? Ombibeli otai nyamukula tai ti: “Ove hola Omwene Kalunga koye nomutima woye aushe nomwenyo woye aushe neenghono doye adishe.” (Deuteronomion 6:5) Eshi ohole yoye yokuhola Kalunga tai ningi yomoule, oto ka kala wa halelela okuninga osho ta pula kwoove. Omuyapostoli Johannes okwa shanga a ti: “Ohole yokuhola Kalunga oyo tuu ei nokutya, tu diinine oipango yaye.” Ngeenge ou hole Jehova nomutima woye aushe, oto ka mona kutya ‘oipango yaye kai fi idjuu.’ — 1 Johannes 5:3.

18, 19. (a) Oipango yaJehova imwe oilipi po? (Tala oshimhungu pepandja 122.) (b) Otu shi shii ngahelipi kutya Kalunga ite tu pula shihapu?

18 Oipango yaJehova oilipi? Imwe yomuyo oya kwatela mo elihumbato olo tu na okuhenuka. Pashihopaenenwa, tala  oshimhungu pepandja 122, shi na oshipalanyole “Henuka osho Jehova e tonde.” Oto ka mona mo omusholondodo woinima oyo ya kwatelwa melihumbato olo la tokolwa filufilu kOmbibeli. Potete, eenghedi dimwe odo di li momusholondodo oo otashi dulika di kale da fa di he fi dii unene. Ndele konima yokudilonga komishangwa odo da yandjwa, oto ka mona kutya eemhango daJehova odi li pandunge. Okuninga omalunduluko melihumbato loye otashi dulika ku kale eshongo linene olo ino shakeneka nande onale. Ndele okukala nonghedi yokukalamwenyo oyo tai hafifa Kalunga otaku eta embilipalelwo nehafo linene. (Jesaja 48:17, 18) Doshili, oto dulu okukala nonghalamwenyo ya tya ngaho. Otu shi shii ngahelipi?

 19 Jehova ihe tu pula shihapu osho itatu dulu okuninga. (Deuteronomion 30:11-14) Oku shii okudula kwetu nosho yo omangabeko etu e tu dule. (Epsalme 103:14) Kakele kaasho, Jehova ota dulu oku tu pameka tu dulike kuye. Omuyapostoli Paulus okwa shanga a ti: “Kalunga Oye omudiinini, ite mu efa mu yelekwe nomayeleko e dule eenghono deni, ndele mumwe neyeleko ota longele yo omhito yokupita mo, opo mu dule oku li humbata.” (1 Ovakorinto 10:13) Opo Jehova e ku kwafele u lididimike, ota dulu nokuli oku ku pa “eenghono di dule odo dopaushitwe.” (2 Ovakorinto 4:7, NW) Konima yokulididimikila omayeleko mahapu, Paulus okwa li a dula okutya: “Aishe ohandi i dulu [omolwaau, NW] ta pameke nge.” — Ovafilippi 4:13.

 KULIKA OMAUKWATYA OPAKALUNGA

20. Omaukwatya opakalunga elipi u na okukulika, nomolwashike a fimana?

20 Doshili, okuhafifa Jehova okwa kwatela mo shihapu shi he fi ashike okuhenuka okuninga oinima oyo e tonde. Owa pumbwa yo okukala u hole osho e hole. (Ovaroma 12:9) Mbela iho kala u udite wa nanenwa kwaavo ve na etaleko la fa loye, ve hole osho u hole nohava kala pamifikamhango da fa doye? Jehova osho yo ha kala e udite ngaho. Onghee hano, lihonga okukala u hole oinima oyo Jehova e hole. Imwe yomuyo oya hokololwa mEpsalme 15:1-5, omo hatu lesha shi na sha naavo Kalunga a tala ko ve li  ookaume kaye. Ookaume kaJehova ohava ulike “oiimati yOmhepo” oyo tai popiwa kOmbibeli. Oya kwatela mo omaukwatya ngaashi “ohole, ehafo, ombili, onheni, oukaume, ouwa, oudiinini, engungumano, elididimiko.” — Ovagalati 5:22.

21. Oshike tashi ke ku kwafela u kulike omaukwatya opakalunga?

21 Okulesha nokukonakona Ombibeli ondjikilile otaku ke ku kwafela u kulike omaukwatya opakalunga. Okulihonga osho Kalunga ta pula otaku ke ku kwafela yo u twife kumwe omadiladilo oye nomadiladilo aye. (Jesaja 30:20, 21) Apa ngoo pe fike okupameka ohole yoye yokuhola Jehova, opo ngoo tapa kala pe fike okukala kwoye wa hala okukala nonghedi yokukalamwenyo oyo tai mu hafifa.

22. Oto ka pondola okuninga shike ngeenge owa kala nonghedi yokukalamwenyo oyo tai hafifa Kalunga?

22 Owa pumbwa okuninga eenghendabala opo u kale nonghedi yokukalamwenyo oyo tai hafifa Jehova. Ombibeli otai faafanifa okulundulula onghalamwenyo yoye nokulidula ounhu woye mukulu nokudjala ounhu mupe. (Ovakolossi 3:9, 10) Ndele shi na sha noipango yaJehova, omupsalme okwa shanga a ti: “Moku [i] diinina, otamu di ondjabi inene.” (Epsalme 19:12) Naave oto ka mona kutya okukala nonghedi yokukalamwenyo oyo tai hafifa Kalunga oshi na ondjabi inene. Mokuninga ngaho, oto ka nyamukula eshongo laSatana nokuhafifa omutima waJehova.

^ okat. 16 Osho inashi hala okutya kutya ovo tave ku pataneke otava wilikwa pauhandimwe kuSatana. Ndele Satana oye kalunga kounyuni ou, nounyuni aushe ou li mepangelo laye. (2 Ovakorinto 4:4, OB-1954; 1 Johannes 5:19) Onghee hano, ohatu dulu okuteelela kutya okukala nonghalamwenyo yopakalunga otaku ka kala onghedi inai tambulwa ko kuvahapu, navamwe otave ke ku pataneka.