Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Ombibeli otai hongo lela shike?

 ETUKULWA 9

Mbela otu li ‘momafiku axuuninwa’?

Mbela otu li ‘momafiku axuuninwa’?
  • Oiningwanima ilipi tai ningwa pefimbo letu ya xunganekwa mOmbibeli?

  • Eendjovo daKalunga oda ti ngahelipi shi na sha noikala yovanhu ‘momafiku axuuninwa’?

  • Oinima ilipi tai tu omukumo ya xunganekwa kOmbibeli shi na sha ‘nomafiku axuuninwa’?

1. Openi hatu dulu okulihonga shi na sha nonakwiiwa?

MBELA owa tala nale eenghundana ko-TV ile wa pwilikina eenghundana koradio ndele to lipula kutya: ‘Ounyuni ou owa yuka peni?’ Oinima inyikifa oluhodi otai ningwa ombadilila noinai teelelwa nomolwaasho kape na omunhu oo ta dulu okutengeneka osho tashi ka ningwa monakwiiwa, nokuli nande omefiku tali landula. (Jakob 4:14) Ndele Jehova oku shii osho tashi ka ningwa monakwiiwa. (Jesaja 46:10) Eendjovo daye, Ombibeli, oda xunganeka nalenale oinima ii oyo tai ningwa mefimbo letu nosho yo oinima iwa oyo tai ka ningwa monakwiiwa i li popepi.

2, 3. Epulo lilipi ovahongwa va li va pula Jesus, nokwa li a nyamukula ngahelipi?

2 Jesus Kristus okwa popya shi na sha nOuhamba waKalunga, oo tau ka xulifa po oukolokoshi nokuninga edu oparadisa. (Lukas 4:43) Ovanhu ova li va hala okushiiva kutya Ouhamba owa li tau ke uya naini. Ovahongwa vaJesus ova li nokuli ve mu pula va ti: ‘Oshike tashi ka kala edidiliko lokukala po kwoye nolefimbo lexulilo longhalelo yoinima?’ (Mateus 24:3, NW) Mokunyamukula, Jesus okwe va lombwela kutya oJehova Kalunga aeke e shii kondadalunde kutya exulilo longhalelo  ei yoinima otali ke uya naini. (Mateus 24:36) Ndele Jesus okwa xunganeka oinima oyo ya li tai ka ningwa fimbo Ouhamba inau etela ovanhu ombili neameno lashili. Osho a xunganeka otashi ningwa kunena!

3 Fimbo inatu konakona oumbangi kutya otu li ‘pefimbo lexulilo longhalelo yoinima,’ natu konakoneni pauxupi shi na sha noita oyo inai monika nande okomunhu wonhumba. Oya lwilwa meulu, ndele oilanduliko yayo otai tu ku mu.

OITA OYO YA LUWA MEULU

4, 5. (a) Oshike sha ningwa meulu diva eshi Jesus a nangekwa po e li Ohamba? (b) PaHololo 12:12, oshike sha li tashi ka etifwa koita oyo ya luwa meulu?

4 Etukulwa la tetekela lembo eli ola yelifa kutya Jesus Kristus okwa ninga Ohamba meulu momudo 1914. (Daniel 7:13, 14) Diva eshi Jesus a pewa eenghono dOuhamba okwa katuka onghatu. Ombibeli otai ti: “Meulu omwa tukuluka olwoodi; Mikael [edina limwe laJesus] novaengeli vaye va lwifa ongadu [Satana Ondiaboli]. Nongadu novaengeli vaye ova lwa yo.” * Satana novaengeli vaye ovanawii, eendemoni, ova findwa moita oyo ndele tava umbwa mo meulu, va umbilwa kombada yedu. Ovanamati vaKalunga vopamhepo ovadiinini ova li va hafa eshi Satana neendemoni daye va tewa mo meulu. Ndele ovanhu kava li tava ka kala ve na ehafo la tya ngaho. Ponhele yaasho, Ombibeli oya xunganeka ya ti: “Woo, edu . . . , osheshi ondiaboli ya kulukila kunye nehandu linene, osheshi i shi shii i nokafimbo kaxupi kongaho.” — Ehololo 12:7, 9, 12.

5 Didilika oshidjemo shoita oyo ya luwa meulu. Omolwehandu laye, Satana okwa li ta ka etela ovo ve li kombada yedu omaupyakadi. Ngaashi to ke shi mona, otu li mefimbo olo lomaupyakadi paife. Ndele itali ka kwata olule — otali ka kala ashike ‘okafimbo kaxupi kongaho.’ Na Satana oku shi shii nokuli. Ombibeli otai ulike kefimbo olo kutya oli li ‘omafiku axuuninwa.’ (2 Timoteus 3:1) Inatu hafa tuu eshi mafiku  Kalunga ta ka xulifa po enwefemo lOndiaboli kombada yedu alishe! Natu konakoneni imwe yomoinima oyo ya xunganekwa mOmbibeli, oyo tai ningwa paife. Osho otashi ulike kutya otu li momafiku axuuninwa nosho yo kutya Ouhamba waKalunga mafiku otau ka etela ovo ve hole Jehova omanangeko noupuna taa kalelele. Tete, natu konakoneni oiningwanima ine i na sha nedidiliko olo Jesus a ti kutya olo tali ka didilikifa efimbo olo tu li mulo.

OININGWANIMA INENE I NA SHA NOMAFIKU AXUUNINWA

6, 7. Ongahelipi eendjovo daJesus di na sha noita nosho yo ondjala tadi wanifwa kunena?

6 ‘Oiwana otai fikamene oiwana, noshilongo otashi fikamene oshilongo.’ (Mateus 24:7) Ovanhu omamiliyona ova dipawa moita mefelemudo la pita. Omunandjokonona umwe Omubritania okwa shanga a ti: “Mefelemudo eti-20, omo mwa dipawa ovanhu vahapu unene mondjokonona ya shangwa. . . . Ola li efelemudo omo mwa kala tamu luwa oita konyala efimbo alishe nopa kala ashike eemhito dinini eshi pa ha li oita.” Olopota ya dja kehangano olo hali konakona oiningwanima yomounyuni oya ti: “Omuvalu wovanhu ovo va ninga oihakanwa yoita mefelemudo [eti-20] ou fike pomuvalu wovanhu ovo va fya moita okudja mefelemudo lotete AD fiyo omo 1899, wa hapupalifwa lutatu.” Ovanhu ve dule pomamiliyona  100 ova fya omolwoita okudja mo 1914. Nonande otu shii oluhodi olo hali kala po omolwokufilwa umwe womovaholike moita, itatu dulu okuuda ko oluhodi nouyahame oo ovanhu omamiliyona mahapu ovo va filwa ovaholike vavo ve udite.

7 ‘Ondjala tai uya.’ (Mateus 24:7) Ovanongononi otava ti kutya okulongwa kwoikulya okwa hapupala neenghono moule womido 30 da pita. Ndele nande ongaho, ondjala otai twikile molwaashi ovanhu vahapu kave na oimaliwa ya wana yokulanda oikulya ile omapya omo tava dulu okukuna oikunomwa. Moilongo oyo tai putuka, ovanhu ve dule pemiliyona eyovi ohava xupu ashike modola imwe ya-U.S. mefiku ile koshimaliwa shinini shi dule opo. Vahapu vomuvo ova konaukilwa kondjala. Ehangano lOukalinawa mOunyuni ola tengeneka kutya omanyutu oo unene haa dipaa ounona vomomamiliyona e dule pwaatano ovo hava fi omudo keshe.

8, 9. Oshike tashi ulike kutya omaxunganeko aJesus e na sha nomakakamo edu nosho yo omikifi dolutapo otaa wanifwa?

8 ‘Otapa ka kala keenhele neenhele omakakamo madjuu edu.’ (Lukas 21:11) Ehangano lonhumba lovanongononi voko-U.S., ola ti kutya okudja mo 1990 omo amuke, oupokati womakakamo edu 17 omudo keshe okwa kala e na eenghono okuteyaula po omatungo nokutendeka edu. Hanga omudo keshe opa holoka omakakamo edu manene nokwa  hanauna po filufilu omatungo. Odjo imwe yeenghundana oya ti: “Omakakamo edu okwa twaalela eemwenyo dovanhu omayovi omafele moule womido 100 da pita nexumokomesho olo la ningwa po moungoba ola ninipika ashike kanini omuvalu wovanhu ovo hava fi momakakamo edu.”

9 ‘Otapa ka kala oudu wolutapo.’ (Lukas 21:11) Nonande opa ningwa omaxumokomesho e na sha nounamiti, omikifi odo da kala ko nale naado opo de uya, otadi hepeke ovanhu. Olopota imwe otai ti kutya omikifi 20 da shiivika nawa — mwa kwatelwa o-TB, omalaria nosho yo oshimela — oda hapupala moule womido omulongo, nadimwe otadi nyengana okuhakulwa. Doshili, opa holoka omikifi 30 lwaapo dipe. Dimwe domudo kadi na natango epango nohadi dipaa ovanhu.

OIKALA YOVANHU MOMAFIKU AXUUNINWA

10. Oikala ilipi oyo ya xunganekwa mu 2 Timoteus 3:1-5 u wete kunena movanhu?

10 Kakele kokupopya shi na sha noiningwanima younyuni, Ombibeli oya xunganeka kutya omafiku axuuninwa otaa ka didilikwa yo omolwelunduluko moikala yovanhu. Omuyapostoli Paulus okwa hokolola osho ovanhu vahapu tava ka kala. MuTimoteus omutivali 3:1-5, ohatu lesha mo taku ti: “[Momafiku] axuuninwa otape ke uya omafimbo madjuu.” Paulus okwa tumbula imwe  yomoikala yovanhu, a ti kutya otava ka kala:

  • Ve lihole vo vene

  • Ovanalwisho voimaliwa

  • Ve he neduliko kovakulunhu

  • Ve he na eitavelo

  • Ve he nohole

  • Ovahenalidiliko

  • Ovakwanyanya

  • Ohole yavo yokuhola ouhalu mwii i dule ei yokuhola Kalunga

  • Ve na emoniko longaho letilokalunga, ndelenee tava shilike eenghono dalo

11. Epsalme 92:7 otali hokolola shike osho tashi ka ningilwa ovakolokoshi?

11 Mbela ovanhu momudingonoko weni osho ve li ngaho? Kape na omalimbililo kutya osho ve li ngaho. Keshe pamwe ope na ovanhu ovo ve na oikala ii. Osho otashi ulike kutya Kalunga ota ka katuka onghatu mafiku, molwaashi Ombibeli otai ti: “Ovahenakalunga nande nava kale moulinawa va fa omwiidi mutalala, ovakolokoshi nande nava xupe nawa, aveshe otava ka dimwa po filu.” — Epsalme 92:7, OB-1986.

OININGWANIMA IHAFIFA

12, 13. Ongahelipi ‘eshiivo lashili’ la hapupala ‘pefimbo eli lexulilo’?

12 Omafiku axuuninwa oku yadi shili omaupyakadi, ngaashi naanaa Ombibeli  ya xunganeka. Ndelenee mounyuni ou u yadi omaupyakadi omu na oiningwanima ihafifa mokati kovalongeli vaJehova.

13 Embo lOmbibeli laDaniel ola xunganeka kutya: ‘Eshiivo lashili otali ka hapupala.’ Osho otashi ka ningwa naini? ‘Opefimbo lexulilo.’ (Daniel 12:4, yelekanifa NW.) Unene tuu okudja mo 1914, Jehova okwa kwafela ovo ve na ehalo shili oku mu longela va mone eudeko lomoule lokuuda ko Ombibeli. Ova uda ko nawa oshili ya fimana i na sha nedina laKalunga nomalalakano aye, ekuliloyambo laJesus Kristus, onghalo yoonakufya nosho yo enyumuko. Kakele kaasho, ovalongeli vaJehova ove lihonga nghee ve na okukala nonghedi yokukalamwenyo oyo tai va etele ouwa notai mu fimanekifa. Ova mona yo eudeko la yela li na sha nonghandangala oyo tai danwa kOuhamba waKalunga nosho yo nghee tau ka yukifa oinima kombada yedu. Ohava longifa ngahelipi eshiivo olo? Epulo olo otali tu eta pexunganeko limwe natango olo tali wanifwa momafiku aa axuuninwa.

“Evangeli eli louhamba otali udifilwa ounyuni aushe.”—Mateus 24:14

14. Onghundana iwa yOuhamba otai udifwa shi fike peni kunena, noolyelye tave i udifa?

14 Jesus Kristus okwa popya mexunganeko laye li na sha ‘nefimbo lexulilo longhalelo yoinima,’ a ti: ‘Evangeli eli louhamba otali udifilwa ounyuni aushe.’ (Mateus 24:3, 14, yelekanifa NW.) Evangeli ile onghundana iwa yOuhamba i na sha nokutya Ouhamba oshike, osho tau ka ninga nosho yo kutya ongahelipi hatu dulu okumona omanangeko noupuna ao, otai udifwa mounyuni aushe, moilongo i dule 230; momalaka e dule 400. Eendombwedi daJehova omamiliyona otadi udifa onghundana iwa yOuhamba nouladi. Oda dja ‘moiwana aishe nomomaludi aeshe nomovanhu aveshe nomomalaka aeshe.’ (Ehololo 7:9) Eendombwedi ohadi ningi omakonakonombibeli opeumbo oshali pamwe nomamiliyona ovanhu ovo va hala okushiiva kutya Ombibeli otai hongo lela shike. Kali fi tuu ewanifo likumwifa lexunganeko, unene tuu eshi Jesus a xunganeka kutya Ovakriste vashili otava ka ‘tondwa kwaaveshe’! — Lukas 21:17.

 OTO KA NINGA PO SHIKE?

15. (a) Mbela owa itavela kutya otu li momafiku axuuninwa, nomolwashike? (b) “Exulilo” otali ka tya shike kwaavo tava pataneke Jehova nosho yo kwaavo tava dulika kepangelo lOuhamba waKalunga?

15 Molwaashi omaxunganeko mahapu Ombibeli otaa wanifwa kunena, mbela ino dimina kutya otu li momafiku axuuninwa? Ngeenge onghundana iwa ya udifwa fiyo Jehova ta ti osha wana, “exulilo” otali ke uya shili. (Mateus 24:14) “Exulilo” olo efimbo olo Kalunga ta ka koshola ko oukolokoshi kombada yedu. Ndele opo Jehova a hanaune po aveshe ovo tave mu pataneke owina, ota ka longifa Jesus nosho yo ovaengeli ovanaenghono. (2 Ovatessaloniki 1:6-9) Satana neendemoni daye itava ka pukifa vali oiwana. Konima yaasho, Ouhamba waKalunga otau ka etela omanangeko noupuna ovanhu aveshe ovo tava dulika kepangelo lao liyuki. — Ehololo 20:1-3; 21:3-5.

16. Oshike tashi ka kala pandunge kwoove okuninga?

16 Molwaashi exulilo longhalelo yaSatana oli li popepi, otwa pumbwa okulipula kutya: ‘Ondi na okukala hai ningi shike?’ Oshi li pandunge okutwikila okulihonga shihapu shi na sha naJehova nosho yo osho a teelela tu ninge. (Johannes 17:3) Kala omukonakoni wOmbibeli a mana mo. Shi ninga onghedindjikilile yoye okweendafana naavo tava kendabala okulonga ehalo laJehova. (Ovaheberi 10:24, 25) Mona eshiivo lihapu olo Jehova Kalunga ta yandje kovanhu mounyuni aushe, ndele to ningi omalunduluko a pumbiwa monghalamwenyo yoye opo u kale wa hokiwa kuYe. — Jakob 4:8.

17. Omolwashike ehanauno lovakolokoshi tali ka hanga ovanhu vahapu ombadilila?

17 Jesus okwa xunganeka kutya ovanhu vahapu otave ke lipwililikila oumbangi oo kutya otu li momafiku axuuninwa. Okuhanaunwa po kwovakolokoshi otaku ke uya ombadilila noina ku teelelwa. Ngaashi omulunga he uya oufiku, ehanauno otali ka hanga ovanhu vahapu ombadilila. (1 Ovatessaloniki 5:2) Jesus okwa londwela kutya: “Ngaashi sha li pomafiku aNoa, osho tuu taku ka kala pokuuya kwOmona wOmunhu.  Osheshi ngaashi ovanhu va li pomafiku enya a tetekela eyelu; kwa li hava li nohava nu, hava hombola nohava hombolifa, fiyo efiku olo Noa a ya mo monguluwato, ndele vo inave shi shiiva, fiyo eyelu le uya nole va hanauna po aveshe; hano [osho] taku ningi yo pokuuya kwOmona wOmunhu.” — Mateus 24:37-39.

18. Elondwelo laJesus lilipi tu na okukaleka momadiladilo?

18 Onghee hano, Jesus okwa li a lombwela ovapwilikini vaye a ti: “Lipashukileni, omitima deni di ha lolokifwe koitendele nokokukolwa nokoshisho shoipalwifa, efiku olo li he mu vakele ngaashi omwiyo, osheshi olo otali hange aveshe hava kala kombada yedu alishe. Pashukeni hano omafiku aeshe nokwiilikana, mu mone eenghono okuya onhapo ei aishe tai ka ningwa, nokukala ofika koshipala shOmona wOmunhu” mwa hokiwa. (Lukas 21:34-36) Oshi li pandunge okukaleka eendjovo daJesus momadiladilo. Omolwashike mbela? Omolwaashi ovo va hokiwa kuJehova Kalunga nosho yo ‘kOmona wOmunhu,’ Jesus Kristus, ove na etimaumbwile loku ka xupa pexulilo longhalelo yoinima yaSatana nokukala nomwenyo fiyo alushe mounyuni mupe ukumwifi oo u li popepi. — Johannes 3:16; 2 Petrus 3:13.

^ okat. 4 Omolwouyelele muhapu oo tau ulike kutya Mikael olo edina limwe laJesus Kristus, tala Oshiwedelwako pepandja 218-219.

Lihonga shihapu

Ino hala ekonakonombibeli loshali?

Omolwashike u na okukonakona Ombibeli?

Ombibeli otai kwafele ovanhu omamiliyona mounyuni aushe va mone omanyamukulo omapulo oo a fimanenena monghalamwenyo. mbela ino hala okukala umwe womuvo?