Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli otai hongo lela shike?

 ETUKULWA 16

Kala omudiinini kelongelokalunga lashili

Kala omudiinini kelongelokalunga lashili
  • Ombibeli otai hongo shike shi na sha nokulongifa oihongwafano?

  • Ovakriste ohava tale ko ngahelipi omafiku omafudo opalongelokalunga?

  • Ongahelipi to dulu okuyelifila vamwe eitavelo loye nope he na oku va handukifa?

1, 2. Epulo lilipi u na okulipula pauhandimwe konima yokufiya po elongelokalunga loipupulu, nomolwashike to diladila kutya osha fimana okulipula epulo olo?

NATU tye nee ngeno owa mona kutya omunhu wonhumba okwa tula oudiyo momufima woye womeva meholeko, neemwenyo paife odi li moshiponga. Oto ka ninga po shike? Osha yela kutya oto ka katuka onghatu diva opo u xupe omufima umwe womeva oo inaa nyika oshiponga. Ndele nande ongaho, ou na natango okulipula konima yaasho epulo la fimana kutya: ‘Mbela inandi kala handi nu omeva oo a tulwa oudiyo?’

2 Onghalo ya fa oyo ohai holoka po shi na sha nomalongelokalunga oipupulu. Ombibeli otai hongo kutya omalongelokalunga a tya ngaho okwa nyatekwa komahongo nosho yo keenghedi inadi koshoka. (2 Ovakorinto 6:17) Omolwaasho sha fimana kwoove okudja mo ‘muBabilon shinene,’ ouhamba wounyuni womalongelokalunga oipupulu. (Ehololo 18:2, 4) Mbela osho wa ninga? Ngeenge osho, ou shii okupandulwa. Ndele omwa kwatelwa shihapu shi he fi ashike okufiya po elongelokalunga loipupulu. Konima yaasho, lipula kutya: ‘Mbela ope na sha osho handi ningi natango osho shi na ekwatafano nelongelokalunga loipupulu?’ Tala koihopaenenwa imwe.

 OKWIILIKANA OIHONGWAFANO NOVAKULU VONALE

3. (a) Ombibeli otai ti ngahelipi shi na sha nokulongifa oihongwafano, nomolwashike etaleko laKalunga tashi dulika li kale lidjuu kuvamwe okutambula ko? (b) Ou na okuninga po shike noshinima keshe osho u na, osho shi na ekwatafano nelongelokalunga loipupulu?

3 Vamwe ova kala ve na oihongwafano ile oinima yopalongelokalunga momaumbo avo oule womido. Mbela naave ou na oinima ya tya ngaho? Ngeenge osho, otashi dulika u kale u wete itashi shiiva ile sha puka okwiilikana kuKalunga nope he na oinima ya tya ngaho i wetike. Otashi dulika nokuli u hole neenghono oinima ya tya ngaho. Ndele Kalunga oye ta ufa nghee e na okulongelwa, nOmbibeli otai hongo kutya ina hala tu longife oihongwafano. (Exodus 20:4, 5; Epsalme 115:4-8; Jesaja 42:8; 1 Johannes 5:21) Onghee hano, oto dulu okuulika oudiinini woye kelongelokalunga lashili mokuhanauna po oshinima keshe osho u na, osho shi na ekwatafano nelongelokalunga loipupulu. Doshili, kala ho i tale ko ngaashi Jehova he i tale ko — i li “oixuna.” — Deuteronomion 27:15.

4. (a) Otu shi shii ngahelipi kutya okwiilikana ovakulu vonale kaku na ekwafo la sha? (b) Omolwashike Jehova a li a dilika oshiwana shaye shi ha nyanekele nande omonghedi yonhumba?

4 Okwiilikana ovakulu vonale nako oku li momalongelokalunga oipupulu mahapu. Fimbo va li inave lihonga oshili yOmbibeli,  vamwe ova li va itavela kutya oonakufya ove na omwenyo nove li monhele omo hamu kala oishitwa yopamhepo nonokutya otava dulu okukwafela ovanamwenyo ile oku va etela oshiponga. Otashi dulika pamwe kwa li ho ningi eenghendabala da mana mo opo u hafife ooxokulululwa ovo va fya. Ndele ngaashi we lihonga mEtukulwa eti-6 lembo eli, oonakufya kave na apa ve li ve shii sha. Onghee hano, eenghendabala dokupopya navo itadi kwafa sha. Etumwalaka keshe olo tali monika la fa la dja kunakufya omuholike ola dja filufilu keendemoni. Onghee hano, Jehova okwa li a dilika Ovaisrael va ha kendabale okupopya noonakufya nova ha nyanekele nande omonghedi yonhumba. — Deuteronomion 18:10-12.

5. Oshike to dulu okuninga po ngeenge okulongifa oihongwafano ile okwiilikana ovakulu vonale oya li nale oshitukulwa shelongelokalunga loye?

5 Ngeenge okulongifa oihongwafano ile okwiilikana ovakulu vonale oya li onghedi yelongelokalunga loye lonale, oshike to dulu okuninga po? Lesha nokudilonga omishangwa dOmbibeli odo tadi ku ulikile nghee Kalunga ha tale ko oinima oyo. Ilikana kuJehova efiku keshe shi na sha nehalo loye lokukala omudiinini kelongelokalunga lashili, noku mu pula yo e ku kwafele u diladile ngaashi ye ha diladila. — Jesaja 55:9.

OKRISMESA KAYA LI HAI DANWA KOVAKRISTE VONALE

6, 7. (a) Okrismesa ohai danwa taku tiwa kutya oi li shike, novashikuli vaJesus vomefelemudo lotete mbela ova li have i dana? (b) Okudana omafiku omadalo okwa li ku na ekwatafano nashike pefimbo lovahongwa vaJesus vonale?

6 Onghedi yomunhu yokulongela Kalunga otai dulu okunyatekwa komalongelokalunga oipupulu ngeenge tashi uya pomafiku omafudo oo haa danwa apeshe. Pashihopaenenwa, diladila shi na sha nOkrismesa. Okrismesa ohai danwa taku tiwa kutya edalo laJesus Kristus, nelongelokalunga keshe konyala olo hali ti olopaKriste ohali i dana. Ndele kape na euliko kutya ovahongwa vaJesus vomefelemudo lotete ova li hava dana efiku lefudo la tya ngaho. Embo Sacred Origins of Profound Things otali ti: “Oule womafelemido avali konima yokudalwa kwaKristus, kapa li oo a li e shii lelalela kutya okwa dalwa naini, novanhu vahapu kava li ve na nasho.”

 7 Nokuli nonande ngeno ovahongwa vaJesus ova li ve shii efiku lokondadalunde lokudalwa kwaye, ngeno inave li dana. Omolwashike mbela? Ngaashi o-The World Book Encyclopedia tai ti, omolwaashi Ovakriste vonale “ova li va tala ko okudana edalo laumwe ku li onghedindjikilile yoshipaani.” Omadano omafiku omadalo oo a tumbulwa mOmbibeli oyoo ashike ovapangeli vavali ovo va li ihava longele Jehova. (Genesis 40:20; Markus 6:21) Omafiku omadalo okwa li yo haa danwa omolwokufimaneka oikalunga yoshipaani. Pashihopaenenwa, mo 24 Mei, Ovaroma ova li hava dana edalo loshikalungakainhu shedina Diana. Mefiku la landula ko, ova li hava dana edalo loshikalunga shavo shetango, Apollo. Hano, okudana omafiku omadalo okwa li ku na ekwatafano nomalongelokalunga oshipaani, ndele hanOukriste.

8. Yelifa kutya ekwatafano lilipi li li pokati kokudana omafiku omadalo nosho yo oidila.

8 Ope na etomheno limwe natango kutya omolwashike Ovakriste vomefelemudo lotete va li ihava dana edalo laJesus. Ovahongwa vaye otashi dulika va li ve shii kutya omadano omafiku omadalo okwa li e na ekwatafano noidila. Pashihopaenenwa, Ovagreka nOvaroma vahapu vomefimbo lonale ova li va itavela kutya omunhu keshe ngeenge ta dalwa okwa li hapa kala oshishitwa shopamhepo nohashi mu amene monghalamwenyo yaye aishe. Embo The Lore of Birthdays ola ti: “Oshishitwa osho shopamhepo ohashi kala shi na ekwatafano lopaumhulile mefiku ledalo loshikalunga osho omo omunhu oo a dalwa.” Jehova ita ka hafifwa nandenande kedano keshe olo tali kwatakanifa Jesus noidila. (Jesaja 65:11, 12) Hano osha enda ngahelipi opo ovanhu vahapu va kale hava dana Okrismesa?

OUDILO WOKRISMESA

9. Osha enda ngahelipi opo 25 Desemba a kale a talika ko e li efiku lokudana edalo laJesus?

9 Ovanhu ova hovela okudana edalo laJesus mo 25 Desemba, konima eshi pa pita omido omafele mahapu okudja eshi Jesus a li kombada yedu. Ndele olo halo la li efiku lokudalwa kwaJesus, molwaashi osha yela kutya Jesus okwa dalwa muOktoba. * Hano  omolwashike kwa hoololwa 25 Desemba? Vamwe ovo konima yefimbo va li tave liti kutya ove li Ovakriste, otashi dulika va li “va hoolola efiku olo li kale hali danwa oshita noshivilo shoshipaani shOvaroma shokudana ‘edalo letango enaenghono.’” (The New Encyclopædia Britannica) Pokufu kwokoilongo oyo ya ama kOushilo woPokati nosho yo yokuEuropa, eshi eenhe detango hadi kala di na eenghono dinini lela, ovapaani ova li hava dana oivilo opo ngeno vati odjo oyo youpyu nouyelele i alukile mondjila yayo yopopepi. Mo 25 Desemba olo efiku olo kwa li la talika ko kutya omo etango hali hovele okwaaluka. Mokukendabala okulidilululifa ovapaani, ovawiliki vomalongelokalunga ova tambula ko oshivilo osho nokukendabala oku shi ninga sha fa “shopaKriste.” *

10. Momafimbo onale, omolwashike ovanhu vamwe va li ihava dana Okrismesa?

10 Oushili oo kutya Okrismesa oya dilila movapaani owa kala u shiivike okudja nale. Molwaashi Okrismesa oi na oudilo u he li pamishangwa, edano layo ola li la shilikwa muEngland nosho yo moilongo imwe oyo ya li tai kolonyekwa kOvaamerika mefelemudo eti-17. Nokuli nakeshe oo a li ina ya koilonga mefiku lOkrismesa okwa li ha futifwa shi li ehandukilo. Ndele konima yefimbo lixupi, edano olo kwa li hali danwa nale ola ka tambulwa ko vali ndele tali wedelwa vali eenghedi dimwe dipe. Okrismesa oya ka ninga vali efiku lefudo olo la fimana, naasho osho shi li ngaho moilongo ihapu. Ndele molwaashi Okrismesa oi na ekwatafano nomalongelokalunga oipupulu, ovo va hala okuhafifa Kalunga ihave i dana noihava dana  yo omafiku makwo omafudo oo e na oudilo u na sha nelongelokalunga loshipaani. *

MBELA OUDILO WOMAFIKU OMAFUDO OU NA NGOO ESHI TAU TI SHILI?

11. Omolwashike ovanhu vamwe hava dana omafiku omafudo, ndele oshike shi na okukala sha fimanenena kufye?

11 Vamwe ova dimina kutya omafiku omafudo ngaashi Okrismesa okwa kanghamena koinima yoshipaani, ndele nande ongaho ove udite kutya inashi puka oku a dana. Doshili, ovanhu vahapu ihava kala tava diladila shi na sha nomalongelokalunga oipupulu ngeenge tashi uya pokudana omafiku omafudo. Eemhito da tya ngaho ohadi yandje yo omhito komaukwaneumbo a hafele pamwe. Mbela naave osho u udite ngaho? Ngeenge osho ngaho, otashi dulika mboli ohole yokuhola ovapambele voye oyo tai shi ningi shidjuu kwoove okuulika oudiinini woye kelongelokalunga lashili, ndele hahole yokuhola omalongelokalunga oipupulu. Kala wa shilipalekwa kutya Jehova, oo a tota po oukwaneumbo, okwa hala u kale u na ekwatafano liwa novapambele voye. (Ovaefeso 3:14, 15) Ndele oto dulu okupameka ekwatafano loye novapambele voye meenghedi odo Kalunga a hokwa. Shi na sha noshinima osho shi na okukala sha fimanenena kufye, omuyapostoli Paulus okwa shanga a ti: “Shipaashipeni eshi tashi wapalele Omwene.” — Ovaefeso 5:10.

Mbela oto ka lya okaleke oko ka dja moshala shoimbodi?

12. Yelifa, to yandje efaneko kutya omolwashike tu na okuhenuka eenghedi nosho yo omadano oo a kanghamena koinima inai koshoka.

12 Otashi dulika u kale u udite kutya oudilo womafiku omafudo inau nwefwa mo lelalela onghedi omo haa danwa kunena. Mbela oudilo womafiku oo otau ti sha ngoo shili? Heeno! Oku shi faneka: Natu tye nee ngeno owa mona okaleke ke li moshala shoimbodi. Mbela oto ke ka toola mo ndele to ka li po? Hasho nandenande! Okaleke ka tya ngaho inaka koshoka. Ngaashi okaleke oko, omafiku omafudo otashi dulika a kale taa monika mahokwifa, ndele okwa kanghamena koinima inai koshoka. Opo tu kale ovadiinini kelongelokalunga lashili, otwa pumbwa okukala tu na etaleko la fa  lomuprofeti Jesaja, oo a lombwela ovalongelikalunga vashili a ti: “Inamu kuma oshipo.” — Jesaja 52:11.

LONGIFA EENDUNGE DOKUYOOLOLA MOKUUNGAUNGA NAVAMWE

13. Omashongo elipi taa dulu okuholoka po ngeenge iho dana omafiku omafudo?

13 Otapa dulu okuholoka omashongo ngeenge owa tokola okukala iho kufa ombinga momafiku omafudo. Pashihopaenenwa, ovanailonga vakweni otashi dulika ve lipule kutya omolwashike iho kufa ombinga moinima yonhumba i na sha nomafiku omafudo koilonga yeni. Ongahelipi ngeenge owa pewa oshali yOkrismesa? Mbela osha puka oku i tambula ko? Ongahelipi ngeenge kaume koye kopahombo ke fi weitavelo loye? Oshike to dulu okuninga po opo ounona voye va ha kale ve udite va pitililwa po kusha shiwa molwaashi ihava dana omafiku omafudo?

14, 15. Oshike to dulu okuninga po ngeenge omunhu ote ku popifa shi na sha nefiku lefudo lonhumba ile ngeenge umwe okwa hala oku ku pa oshali?

14 Eendunge dokuyoolola oda pumbiwa opo u kale u shii nghee u na okuungaunga nonghalo keshe. Ngeenge omunhu ote ku popifa shi na sha nefiku lefudo lonhumba, oto dulu ashike oku mu itavela nombili. Ndele natu tye nee oto ungaunga nomunhu oo ho mono keshe efiku ile ho longo pamwe naye. Monghalo ya tya ngaho, oto dulu okutokola opo u mu yelifile nawa. Monghalo keshe, kala u na elungi. Ombibeli otai yandje omayele taa ti: “Eendjovo deni nadi kale alushe donghenda, da fingala omongwa, nye mu kale mu shi shii nhumbi mu nokunyamukula keshe umwe.” (Ovakolossi 4:6) Kala wa lungama u ha ulike okuhenefimaneko navamwe. Ponhele yaasho, yelifa omufika woye nelungi. Yelifa kutya ku li omhinge nokuyandja eeshali ile noivilo, ndele oho shi ningi pomafimbo amwe e lili.

15 Ongahelipi ngeenge umwe okwa hala oku ku pa oshali? Shihapu oshe likolelela keenghalo. Omuyandji otashi dulika a tye: “Ondi shi shii kutya iho dana omafiku omafudo, ndele onda hala oku ku pa oshali ei.” Otashi dulika u tokole kutya okutambula ko oshali meenghalo da tya ngaho inaku fa okukufa ombinga mokudana efiku lefudo. Ndele ngeenge omuyandji woshali ke shii eitavelo  loye, oto dulu oku mu lombwela kutya iho dana omafiku omafudo. Osho otashi ke mu kwafela a ude ko kutya omolwashike wa tambula oshali ndele iho yandje eeshali mefiku olo. Mepingafano naasho, otashi ka kala pandunge okuhatambula ko oshali ngeenge osha yela kutya otai yandjwa nelalakano opo omunhu a ulike kutya ku fi omudiinini keitavelo loye ile kutya oho dini eitavelo loye omolwouwa wopamaliko.

ONGAHELIPI SHI NA SHA NOILYO YOUKWANEUMBO?

16. Ongahelipi to dulu okukala nelungi ngeenge to ungaunga noinima i na sha nomafiku omafudo?

16 Ongahelipi ngeenge oilyo youkwaneumbo kai fi yeitavelo loye? Natango, kala u na elungi. Inatu pumbwa okutwa eemhata shi na sha nonghedindjikilile keshe ile omadano onhumba oo ovapambele vetu va hoolola okukufa ombinga muo. Ponhele yaasho, fimaneka oufemba wavo u na sha nokuhoolola osho va hala, ngaashi ashike naave wa hala va fimaneke oufemba woye u na sha nokuhoolola osho wa hala. (Mateus 7:12) Henuka eenghatu keshe odo tadi ku ningifa u kufe ombinga mokudana efiku lefudo. Natango, kala u na ondjele shi na sha noinima oyo i he na sha nedano lefiku lefudo. Ndele ou na alushe okukatuka monghedi oyo itai ka nyona po eliudo loye liwa. — 1 Timoteus 1:18, 19.

17. Ongahelipi to dulu okukwafela ounona voye va ha kale ve udite va pitililwa po kusha shiwa molwaashi hava mono vamwe tava dana omafiku omafudo?

17 Oshike to dulu okuninga po opo ounona voye va ha kale ve udite va pitililwa po kusha shiwa molwaashi ihava dana omafiku omafudo e he li pamishangwa? Shihapu oshe likolelela kwaasho ho ningi pomafimbo makwao omudo. Ovadali vamwe ohava kongo eemhito opo va pe ovana vavo eeshali. Imwe yomeeshali da denga mbada oyo to dulu okuyandja kovana voye oyo okulongifa efimbo okukala pamwe navo noku va pa elitulemo lopahole.

KALA METWOKUMWE NELONGELOKALUNGA LASHILI

Okukala metokumwe nelongelokalunga lashili ohaku etele omunhu ehafo lashili

18. Ongahelipi okukala pokwoongala kwopaKriste taku ku kwafele u kale omudiinini kelongelokalunga lashili?

18 Opo u hafife Kalunga, ou na okweekelashi elongelokalunga loipupulu nokukala omudiinini kelongelokalunga lashili. Osho osha kwatela mo shike? Ombibeli otai ti kutya: “Tu filafaneni  oshisho fye tu twafane omukumo mohole nomoilonga iwa. Tu ha efe [po okwoongala pamwe, OB-1986], ngaashi vamwe ve li po hava ningi, ndelenee tu kumaidafaneni, unene eshi tamu mono efiku olo tali ehene popepi.” (Ovaheberi 10:24, 25) Okwoongala kwopaKriste oku li eemhito dihafifa kwoove dokulongela Kalunga monghedi oyo a hokwa. (Epsalme 22:23; 122:1) Pokwoongala kwa tya ngaho, ohapa kala omhito ‘yokutwaafana omukumo,’ mokati kOvakriste ovadiinini. — Ovaroma 1:12, OB-1986.

19. Omolwashike sha fimana okupopya navamwe shi na sha noinima oyo we lihonga mOmbibeli?

19 Onghedi imwe omo to dulu okuulika oudiinini woye kelongelokalunga lashili oyo okupopya navamwe shi na sha noinima oyo we lihonga mokukonakona Ombibeli nEendombwedi daJehova. Ovanhu vahapu otava ‘keme nokunyika oluhodi’ shili omolwoukolokoshi oo tau longwa mounyuni kunena. (Hesekiel 9:4) Otashi dulika u shii ovanhu vamwe ovo ve udite ngaho. Omolwashike ito popi navo shi na sha neteelelo lonakwiiwa olo le likolelela kOmbibeli? Eshi to endafana nOvakriste vashili nokupopya navamwe shi na sha noshili yOmbibeli ikumwifi oyo we lihonga, oto papala eshi ohokwe keshe i na sha neenghedindjikilile domalongelokalunga oipupulu oyo tashi dulika wa kala u na tai ende tai kana po kanini nakanini. Kala wa shilipalekwa kutya oto ka kala wa hafa neenghono noto ka mona omanangeko noupuna mahapu ngeenge owa kala omudiinini kelongelokalunga lashili. — Malakia 3:10.

^ okat. 9 O-Saturnalia nayo oya dana onghandangala mokuhoololwa kwo 25 Desemba. Oshivilo osho shokufimaneka oshikalunga shOvaroma shounamapya osha li hashi ningwa mo 17-24 Desemba. Poshivilo sho-Saturnalia, ovanhu ova li hava ningi oitendele nokushambukwa nokupaafana eeshali.

^ okat. 10 Omolwouyelele u na sha nanghee Ovakriste vashili hava tale ko omafiku omafudo makwao oo haa danwa moilongo ihapu, tala Oshiwedelwako pepandja 222-223.