Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli otai hongo lela shike?

Eninginifo loye nekwatafano loye naKalunga

Eninginifo loye nekwatafano loye naKalunga

 ETUKULWA 18

  • Eninginifo lopaKriste ohali ningwa monghedi ya tya ngahelipi?

  • Eenghatu dilipi wa pumbwa okukatuka opo u kale wa wana okuninginifwa?

  • Omunhu ohe liyapulile Kalunga ngahelipi?

  • Etomheno la fimanenena li na sha nokuninginifwa olilipi?

1. Omolwashike elenga lomombala lokuEtiopia la li la pula li ninginifwe?

‘TALA, omeva oo aa, oshike tashi kelele nge ndi ha ninginifwe?’ Epulo olo ola li la pulwa kelenga lomombala lokuEtiopia  mefelemudo lotete. Omukriste wedina Filippus okwa li e mu ulikila kutya Jesus oye a li Messias omuudanekwa. Molwaashi omulumenhu oo Omuetiopia okwa li e linyengifwa neenghono kwaasho e lihonga mOmishangwa, okwa katuka eenghatu. Okwa li e shi ulika kutya okwa hala okuninginifwa. — Oilonga 8:26-36, yelekanifa NW.

2. Omolwashike u na okudiladila wa mana mo shi na sha neninginifo?

2 Ngeenge owa konakona noukeka omatukulwa a tetekela embo eli pamwe naumwe womEendombwedi daJehova, otashi dulika u kale u udite wa hala okupula kutya: ‘Oshike tashi kelele nge ndi ha ninginifwe?’ Fiyo opapa, owe lihonga shi na sha neudaneko lOmbibeli lomwenyo waalushe mOparadisa. (Lukas 23:43; Ehololo 21:3, 4) Owe lihonga yo shi na sha nonghalo yolela yoonakufya nosho yo eteelelo lenyumuko. (Omuudifi 9:5; Johannes 5:28, 29) Otashi dulika ho endafana nEendombwedi daJehova pokwoongala kwado, nowa mona kutya odi li melongelokalunga lashili. (Johannes 13:35) Oshinima osho sha fimanenena oshosho kutya, otashi dulika wa kulika ekwatafano lopofingo naJehova Kalunga.

3. (a) Jesus okwa yandja elombwelo lilipi kovashikuli vaye? (b) Okuninginifwa momeva ohaku ningwa ngahelipi?

3 Ongahelipi to dulu okuulika kutya owa hala okulongela Kalunga? Jesus okwa lombwela ovashikuli vaye a ti: ‘Indeni ka ningeni ovanhu aveshe ovalongwa vange, noku va ninginifa.’ (Mateus 28:19, yelekanifa NW.) Jesus okwa tula po oshihopaenenwa okupitila mokuninginifwa kwaye momeva. Ka li a shashwa nomeva ile a tilwa omeva kombada yomutwe. (Mateus 3:16, NW) Oshitya shOshigreka osho sha tolokwa “okuninginifwa” otashi ti okutula koshi yomeva. Onghee hano, eninginifo lopaKriste otali ti okutula olutu lomunhu alishe filufilu koshi yomeva.

4. Eninginifo lomomeva otali ulike shike?

4 Eninginifo lomomeva oli li oshiteelelwa kwaaveshe ovo va hala okukala ve na ekwatafano naJehova Kalunga. Okuninginifwa moipafi ohaku ulike kutya owa hala okulongela Kalunga. Ohaku ulike kutya owa hafa okulonga ehalo laJehova.  (Epsalme 40:8, 9) Ndele opo u kale wa wana okuninginifwa, ou na okukatuka eenghatu donhumba.

OWA PUMBWA ESHIIVO NEITAVELO

5. (a) Onghatu yotete ilipi u na okukatuka opo u kale wa wana okuninginifwa? (b) Omolwashike okwoongala kwopaKriste kwa fimana?

5 Owa hovela nale okukatuka onghatu yotete. Ngahelipi mbela? Omokumona eshiivo lokushiiva Jehova Kalunga nosho yo Jesus Kristus, tashi dulika okupitila mokukala nelandulafano lokukonakona Ombibeli. (Johannes 17:3) Ndele ope na natango shihapu okulihonga. Ovakriste ova hala ‘okuyadifwa neshiivo lokushiiva ehalo laKalunga.’ (Ovakolossi 1:9) Okukala pokwoongala kwEendombwedi daJehova otaku ku kwafele neenghono shi na sha naasho. Osha fimana okukala pokwoongala kwa tya ngaho. (Ovaheberi 10:24, 25) Okukala pokwoongala nope he na okufaula otaku ke ku kwafela u mone eshiivo lihapu lokushiiva Kalunga.

Okumona eshiivo lashili lEendjovo daKalunga oshi li onghatu ya fimana opo omunhu a kale a wana okuninginifwa

6. Ou na okukala u na eshiivo lOmbibeli li fike peni opo u kale wa wana okuninginifwa?

6 Doshili, ino pumbwa okushiiva keshe shimwe mOmbibeli opo u kale wa wana okuninginifwa. Elenga lomombala lokuEtiopia ola li li na eshiivo lonhumba, ndele ola li la pumbwa okukwafelwa opo li ude ko oitukulwa yonhumba yOmishangwa. (Oilonga 8:30, 31) Sha faafana, naave owa pumbwa okulihonga shihapu natango. Doshili, ito ka efa nandenande okulihonga kombinga yaKalunga. (Omuudifi 3:11) Ndele fimbo ino ninginifwa, owa pumbwa okushiiva omahovelohongo Ombibeli noku a tambula ko. (Ovaheberi 5:12) Omahongo a tya ngaho okwa kwatela mo oshili i na sha nonghalo yoonakufya nosho yo efimano ledina laKalunga nOuhamba waye.

7. Okukonakona Ombibeli oku na oku ku nwefa mo ngahelipi?

7 Ndele inashi wana ashike okukala neshiivo, molwaashi “kape na ou ta dulu okuwapalela Kalunga, ngenge kape neitavelo.” (Ovaheberi 11:6) Ombibeli otai tu lombwele kutya eshi ovanhu vamwe vomoshilando Korinto shonale va li va uda etumwalaka olo la li la udifwa kOvakriste, ova “itavela, ndele tava  ninginifwa.” (Oilonga 18:8, NW) Sha faafana, okukonakona Ombibeli oku na oku ku kwafela u kale u na eitavelo kutya oi li Eendjovo daKalunga da nwefwa mo. Ekonakonombibeli oli na yo oku ku kwafela u kale u na eitavelo momaudaneko aKalunga nosho yo meenghono dokuxupifa deyambo laJesus. — Josua 23:14; Oilonga 4:12; 2 Timoteus 3:16, 17.

LOMBWELA VAMWE OSHILI YOMBIBELI

8. Oshike tashi ke ku linyengifa opo u lombwele vamwe osho we lihonga?

8 Eshi eitavelo tali kulu momutima woye, oto ka kala wa hala okulombwela vamwe kombinga yaasho we lihonga. (Jeremia 20:9) Oto ke linyengifwa neenghono u lombwele vamwe kombinga yaKalunga nosho yo yomalalakano aye. — 2 Ovakorinto 4:13.

Eitavelo oli na oku ku linyengifa u lombwele vamwe osho wa itavela

9, 10. (a) Oolyelye to dulu okuhovela okulombwela oshili yOmbibeli? (b) Ou na okuninga po shike ngeenge owa hala okukufa ombinga moilonga yokuudifa ya unganekwa yEendombwedi daJehova?

9 Oto dulu okuhovela okulombwela vamwe oshili yOmbibeli, mokupopya nelungi novapambele voye, ookaume koye, ovashiinda shoye nosho yo ovalongi pamwe naave. Konima yefimbo, oto ka kala wa hala okukufa ombinga moilonga yokuudifa ya unganekwa yEendombwedi daJehova. Pomhito oyo, kala wa manguluka okukundafana oshinima osho nOndombwedi oyo tai konakona naave Ombibeli. Ngeenge oto ulike kutya owa wana okukufa ombinga moukalele womoipafi, otapa ka ningwa omalongekido opo ove nosho yo oo hamu konakona naye mu shakene novakulunhuongalo vavali.

10 Osho otashi ke ku kwafela u shiive nawa ovakulunhuongalo Ovakriste vamwe, ovo hava lifa oufita waKalunga. (Oilonga 20:28; 1 Petrus 5:2, 3) Ngeenge ovakulunhuongalo ovo ova mono kutya ou udite ko omahovelohongo Ombibeli nowe a itavela nonokutya ou li metwokumwe nomafinamhango aKalunga nosho yo kutya owa hala shili okukala umwe womEendombwedi daJehova, otave ke ku shiivifila kutya owa wana okukufa ombinga moukalele womoipafi u li omuudifi wonghundana iwa ina ninginifwa.

11. Omalunduluko elipi vamwe tashi dulika va kale va pumbwa okuninga opo va kale va wana okukufa ombinga moukalele womoipafi?

 11 Ile otashi dulika u kale wa pumbwa okuninga omalunduluko onhumba monghedi yoye yokukalamwenyo nosho yo meenghedindjikilile donhumba, opo u kale wa wana okukufa ombinga moukalele womoipafi. Omalunduluko oo otashi dulika a kale a kwatela mo omanyono onhumba oo wa kala to ningi meholeko. Onghee hano, fimbo ino pula u ninge omuudifi ina ninginifwa, ou na okweefa po omanyono a kwata moiti ngaashi, oluhaelo, oukolwe nosho yo okulongifa oingangamifi. — 1 Ovakorinto 6:9, 10; Ovagalati 5:19-21.

ELIDILULULO NELIALULUKO

12. Omolwashike elidilululo la pumbiwa?

12 Ou na yo okukatuka eenghatu dimwe vali opo u kale wa wana okuninginifwa. Omuyapostoli Petrus okwa ti: “Lidilululeni, nye mu lialuluke, omatimba eni opo a dimwe po.” (Oilonga 3:19) Okulidilulula oko okukala u udite nai shili omolwoshinima osho wa ninga. Elidilululo ola fimana filufilu, unene tuu ngeenge omunhu okwa li e na onghedi yokukalamwenyo inai koshoka paenghedi, ndele ola pumbiwa yo nokuli nonande omunhu okwa kala e na onghedi yokukalamwenyo ya koshoka paenghedi. Omolwashike mbela? Omolwaashi ovanhu aveshe ohava nyono nova pumbwa okudiminwa po kuKalunga. (Ovaroma 3:23; 5:12) Fimbo ino konakona Ombibeli, kwa li u shii ehalo laKalunga. Hano ongahelipi wa li to dulu okukala metwokumwe filufilu nehalo laye? Onghee hano, owa pumbwa okulidilulula.

13. Elialuluko oshike?

13 Konima eshi we lidilulula, ou na ‘okulialuluka.’ Ou na okuninga shihapu shi he fi ashike okukala u udite nai kwaasho wa ninga. Owa pumbwa okweefa po onghedi yoye yonale yokukalamwenyo nokukala wa tokola toko kutya oto ka kala to longo eshi sha yuka. Elidilululo nelialuluko oi li eenghatu odo u na okukatuka fimbo ino ninginifwa.

 OU NA OKULIYAPULILA KALUNGA

14. Onghatu ya fimana ilipi u na okukatuka fimbo ino ninginifwa?

14 Ope na vali onghatu imwe ya fimana oyo u na okukatuka fimbo ino ninginifwa. Ou na okuliyapulila Jehova Kalunga.

Mbela owe liyapulila Kalunga okupitila meilikano?

15, 16. Otashi ti shike okuliyapulila Kalunga, noshike hashi linyengifa omunhu e shi ninge?

15 Ngeenge to liyapulile Jehova Kalunga meilikano tali di komutima, oho mu udanekele kutya owa hala oku mu longela oye aeke fiyo alushe. Ndele omolwashike wa hala okuninga omupiya waKalunga? Natu tye nee ngeno omulumenhu okwa hovela okweendela omukainhu. Apa ngoo pe fike okulihonga kombinga yomukainhu oo nokumona kutya oku na omaukwatya mawa, opo ngoo tapa kala pe fike okukala ta nanenwa kuye. Mokweendela ko kwefimbo, ota ka kala e na ehalo okupula omukainhu oo va hombole. Doshili, okuhombola otaku pula omunhu a tambule ko oinakuwanifwa ya wedwa po. Ndele ohole otai ke linyengifa omulumenhu oo a katuke onghatu oyo ya fimana.

16 Ngeenge owa shiiva Jehova nokukala u mu hole, oho linyengifwa u mu longele filufilu. Keshe oo a hala okulandula Omona waKalunga, Jesus Kristus, oku na ‘okulixupula ye mwene.’ (Mateus 16:24) Ohatu lixupula fye vene mokuhaefa omahalo etu nosho yo omalalakano etu a ye moshipala okudulika kwetu filufilu kuKalunga. Ndele fimbo ino ninginifwa, ou na okukala wa tokola okupitifa komesho okulonga ehalo laJehova Kalunga monghalamwenyo yoye. — 1 Petrus 4:2.

FINDA OUMBADA WOKUTILA OKUNYONA

17. Omolwashike vamwe hava kala va tila okuliyapulila Kalunga?

17 Vamwe ohava kala va tila okuliyapulila Jehova molwaashi va tila okukatuka onghatu oyo ya kwata moiti. Otashi dulika va kale va tila okulihokolola kuKalunga ve li Ovakriste ve mu liyapulila. Molwaashi ova tila kutya otashi dulika va nyone ndele tava nyemateke Jehova, ohava diladila kutya oshixwe po ve he mu liyapulile.

18. Oshike tashi dulu oku ku linyengifa u liyapulile Jehova?

18 Eshi ohole yoye yokuhola Jehova tai ende tai kulu,  oto ke linyengifwa u mu liyapulile nokukendabala ngaashi to dulu opo u kale metwokumwe neliyapulo loye. (Omuudifi 5:3) Konima eshi we liyapula, oto ka kala shili wa hala ‘okweenda to wapalele Kalunga noku mu hafifa mwaaishe.’ (Ovakolossi 1:10) Molwaashi ou hole Kalunga, ito ka diladila nande kutya oshidjuu okulonga ehalo laye. Osha yela kutya oto ka twa kumwe nomuyapostoli Johannes, oo a shanga a ti: “Ohole yokuhola Kalunga oyo tuu ei nokutya, tu diinine oipango yaye. Noipango yaye kai fi idjuu.” — 1 Johannes 5:3.

19. Omolwashike ino pumbwa okukala wa tila okuliyapulila Kalunga?

19 Ino pumbwa okukala wa wanenena opo u liyapulile Kalunga. Jehova oku shii omangabeko oye noita ka teelela nande u ninge shihapu shi dule pwaasho to dulu okuninga. (Epsalme  103:14) Okwa hala u pondole note ke ku yambidida noku ku kwafela. (Jesaja 41:10) Oto dulu okukala noushili kutya ngeenge owe lineekela Jehova nomutima woye aushe, ota “ka lalakanifa omalila oye.” — Omayeletumbulo 3:5, 6.

ULIKA KUTYA OWE LIYAPULILA KALUNGA MOKUNINGINIFWA

20. Omolwashike okuliyapulila Jehova ku he na okukala oshiholekwa?

20 Okudiladila shi na sha noinima oyo opo twa kundafana naku ku kwafele u liyapulile Jehova okupitila meilikano. Keshe umwe oo e hole Kalunga shili oku na yo ‘okuhepaulula  moipafi yeendombwedi dihapu.’ (1 Timoteus 6:12) Ongahelipi to dulu oku shi ninga?

Eninginifo otali ti okufya shi na sha nonghedi yetu yokukalamwenyo yonale nokunyumuka opo tu longe ehalo laKalunga

21, 22. Ongahelipi to dulu ‘okuhepaulula moipafi’ eitavelo loye?

21 Shiivifila omuunganeki wolutu lovakulunhuongalo weongalo leni kutya owa hala okuninginifwa. Ota ka ninga omalongekido opo ovakulunhuongalo vamwe ve ku pule omapulo onhumba oo a kwatela mo omahovelohongo Ombibeli. Ngeenge ovakulunhuongalo ovo ova mono kutya owa wana, otave ke ku lombwela kutya oto dulu oku ka ninginifwa poshoongalele tashi landula. * Oshipopiwa tashi kundafana eityo leninginifo ohashi yandjwa alushe peemhito da tya ngaho. Opo nee omupopi oha shivi ovaninginifwa aveshe va nyamukule omapulo avali a yela nawa, shi li onghedi imwe ‘yokuhepaulula nokanya moipafi’ eitavelo lavo.

22 Eninginifo olo ashike tali ku didilikifa moipafi kutya owe liyapulila Kalunga nonokutya paife owa ninga umwe womEendombwedi daJehova. Ovaninginifwa ohava ninginifwa filufilu koshi yomeva okuulika moipafi kutya ove liyapulila Jehova.

EITYO LOKUNINGINIFWA KWOYE

23. Osha hala okutya shike okuninginifwa “medina laXe nolOmona nolOmhepo Iyapuki”?

23 Jesus okwa ti kutya ovahongwa vaye ove na okuninginifwa “medina laXe nolOmona nolOmhepo Iyapuki.” (Mateus 28:19) Osho osha hala okutya omuninginifwa oku na yo okudimina eenghonopangelo daJehova Kalunga nosho yo daJesus Kristus. (Epsalme 83:19; Mateus 28:18) Oku na yo okudimina oilonga yomhepo iyapuki yaKalunga ile eenghono daye tadi longo. — Ovagalati 5:22; 2 Petrus 1:21.

24, 25. (a) Eninginifo otali faneke shike? (b) Epulo lilipi la pumbwa okunyamukulwa?

24 Ndelenee okuninginifwa kaku fi ashike okutulwa koshi yomeva. Oku na eityo la fimanenena. Okuya koshi yomeva otaku faneke kutya owa fya shi na sha nonghedi yoye yokukalamwenyo  yonale. Okukufwa ko koshi yomeva otashi ti kutya paife owa nyumuka opo u longe ehalo laKalunga. Dimbuluka yo kutya owe liyapulila Jehova Kalunga, ndele hailonga yonhumba ile eifano lonhumba ile ovanhu vonhumba ile ehangano lonhumba. Eliyapulo neninginifo loye oi li ehovelo loukaume wopofingo naKalunga, sha hala okutya eendafano liwa naye. — Epsalme 25:14.

25 Okuninginifwa itaku shilipaleke kutya oto ka xupifwa. Omuyapostoli Paulus okwa shanga a ti: “Longeni shili nokutila nokukakama mu xupifwe.” (Ovafilippi 2:12) Eninginifo oli li ashike ehovelo. Epulo la fimana ololo kutya: Ongahelipi hatu dulu okulikaleka mohole yaKalunga? Etukulwa letu laxuuninwa otali ke tu pa enyamukulo.

^ okat. 21 Eninginifo ohali ningwa alushe poyoongalele yokomudo inini naai ya kula, oyo hai ningwa kEendombwedi daJehova.