Inda koshikalimo

Inda kelandulafano etivali

Inda koshikalimo

Eendombwedi daJehova

Oshikwanyama

Ombibeli otai hongo lela shike?

OSHIWEDELWAKO

Efiku lEtokolo oshike?

Efiku lEtokolo oshike?

MBELA oto diladila kutya Efiku lEtokolo oshike? Ovanhu vahapu ohava diladila kutya omamiliyona omayovi ovanhu otava ka kala momukweyo tava i kooumwe nooumwe komesho yolukalwapangelo laKalunga. Opo nee vati keshe umwe ta tokolwa pauhandimwe. Vamwe vati otava ka pewa ondjabi yokukala moparadisa meulu, ofimbo vamwe tava ka tokolelwa okuhepekwa kwaalushe. Ndele Ombibeli otai ulike kutya Efiku lEtokolo hasho tali ka kala ngaho. Eendjovo daKalunga otadi ulike kutya itali ka kala efimbo litilifi, ndele otali ka kala efimbo leteelelo noletungululo.

MEhololo 20:11, 12, ohatu lesha mo eendjovo domuyapostoli Johannes di na sha nEfiku lEtokolo, tadi ti: “Onda mona olukalwapangelo linene litoka nomukalimutumba mulo, Oye ou edu neulu la ya onhapo oshipala shaye, ndele inaa monikila vali onhele. Ndele nda mona oonakufya, vanini novanene, ve li ofika moipafi yolukalwapangelo; nomambo a nyanunwa; nembo likwao la nyanunwa, olo lomwenyo. Noonakufya ova tokolelwa ei ya shangwa momambo pailonga yavo.” Omutokoli oo a hokololwa opo oye lyelye?

Jehova Kalunga oye Omutokoli wovanhu munenenene. Ndele ope na oo a pa a tokole ko. PaIlonga 17:31, omuyapostoli Paulus okwa ti kutya Kalunga okwa “yukifila efiku lokutokola ounyuni, eshi te u tokolifa ouyuki komulumenhu tuu oo, Ye mwene okwe  mu hoolola.” Omutokoli oo a tulwa po oye omunyumunwa Jesus Kristus. (Johannes 5:22) Efiku lEtokolo otali ka hovela naini? Otali ka kufa oule wefimbo li fike peni?

Embo lEhololo otali ulike kutya Efiku lEtokolo otali hovele konima yoita yaHarmagedon, eshi onghalelo yaSatana kombada yedu tai ka hanaunwa po. * (Ehololo 16:14, 16; 19:19–20:3) Konima yaHarmagedon, Satana neendemoni daye otava ka idililwa mombwili oule womido eyovi. Pefimbo olo, ovafyuululi pamwe naKristus 144 000 otava ka kala ovatokoli notava ka pangela ‘pamwe naye omido eyovi.’ (Ehololo 14:1-3; 20:1-4; Ovaroma 8:17) Efiku lEtokolo kali fi oshinima osho tashi ka kufa efimbo lixupi, eevili ashike 24, ndele otali ka kufa oule womido eyovi.

Pefimbo lomido odo eyovi, Jesus Kristus ota ka ‘tokola ovanamwenyo novafi.’ (2 Timoteus 4:1) “Ovanamwenyo” otava ka kala “ongudu inene” oyo tai ka xupa puHarmagedon. (Ehololo 7:9-17) Omuyapostoli Johannes okwa mona yo ‘oonakufya ve li ofika moipafi yolukalwapangelo’ letokolo. Ngaashi Jesus a udaneka, “ava va kala meembila otava udu ondaka yaye. Ndee tava holoka mo” okupitila menyumuko. (Johannes 5:28, 29; Oilonga 24:15) Ndele mbela ovanhu aveshe otava ka tokolwa she likolelela kushike?

Omuyapostoli Johannes okwa li a mona memoniko, ‘omambo a nyanunwa noonakufya ova tokolelwa ei ya shangwa momambo pailonga yavo.’ Mbela omambo oo okwa shangwa oilonga yovanhu yonale? Hasho, etokolo itali ka kala le likolelela kwaasho ovanhu va ningile fimbo inava fya. Otu shi shii ngahelipi? Ombibeli otai ti: “Ou a fya, oye okwa manguluka moulunde.” (Ovaroma 6:7) Onghee hano, ovo tava ka nyumunwa itava ka valulilwa omanyono avo onale. Hano omambo oo oku lile po oiteelelwa yaKalunga yokonahiya. Opo va kale nomwenyo fiyo alushe, ovaxupipo puHarmagedon novanyumunwa ove na okudulika koipango yaKalunga, mwa kwatelwa keshe oshiteelelwa shipe osho Kalunga ta ka yandja pefimbo lomido eyovi. Onghee hano, oohandimwe otava ka tokolwa she likolelela kwaasho tava ningi momukokomoko wEfiku lEtokolo.

Pefimbo lEfiku lEtokolo, ovanhu omamiliyona omayovi otava  ka mona omhito yavo yotete yokulihonga shi na sha nehalo laKalunga nokutwa kumwe nalo. Osho osha hala okutya otapa ka kala oilonga yokuhonga ovanhu inenenene. Doshili, “ovakwaunyuni otave [ke lihonga] ouyuki.” (Jesaja 26:9) Ndelenee havanhu aveshe tava ka kala va hala okutwa kumwe nehalo laKalunga. Jesaja 26:10 ota ti: “Ou e he na Kalunga nande na filwe onghenda, ite lilongo okushiiva ouyuki, medu louyuki oha kolokosha, ndele iha mono oshinge shOmwene.” Ovakolokoshi ovo otava ka hanaunwa po fiyo alushe mEfiku lEtokolo. — Jesaja 65:20.

Pexulilo lEfiku lEtokolo, ovanhu ovo tava ka xupa po otava ka “ninga omwenyo,” meityo lolela, ve li ovanhu va wanenena. (Ehololo 20:5) Onghee hano, mEfiku lEtokolo, ovanhu otava ka alulilwa mewaneneno. (1 Ovakorinto 15:24-28) Opo nee otapa ka ningwa eyeleko laxuuninwa. Satana ota ka mangululwa mo mombwili nota ka efuwa a kendabale okupukifa ovanhu lwaxuuninwa. (Ehololo 20:3, 7-10) Ovo tave mu kondjifa otava ka wanifilwa pauyadi eudaneko lOmbibeli, olo tali ti: “Ovayuki, vo otava ka fyuulula [edu, OB-1986], ndee tava kala mo alushe.” (Epsalme 37:29) Heeno, Efiku lEtokolo otali ka etela ovanhu ovadiinini omanangeko noupuna!

^ okat. 1 Shi na sha naHarmagedon, tala Insight on the Scriptures, Embo 1, epandja 594-595, 1037-1038, nosho yo etukulwa eti-20 lembo Longela Kalunga aeke kashili, a nyanyangidwa kEendombwedi daJehova.

 

Lihonga shihapu

OSHUNGONANGELO

“Exulilo”— oshike?

Mbela ou shii ngoo kutya osho Ombibeli ya popya shi na sha ‘nexulilo’ oshi li onghundana iwa?