Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli otai hongo lela shike?

OSHIWEDELWAKO

Edina laKalunga—okulongifwa kwalo nosho yo eityo lalo

Edina laKalunga—okulongifwa kwalo nosho yo eityo lalo

MOMBIBELI yoye, Epsalme 83:19 (Epsalme 83:18 momatoloko Eembibeli dimwe) ola tolokwa ngahelipi? O-New World Translation of the Holy Scriptures otai toloka ovelishe 18 tai ti: “Opo ovanhu va shiive kutya ove, ou edina loye Jehova, oove auke Omukombadambada kedu alishe.” Omatoloko amwe Eembibeli otaa toloka sha faafana. Ndele omatoloko mahapu inaa longifa edina Jehova, okwe li pingena po nomadinafimaneko ngaashi “Omwene” ile “Omukwaalushe.” Mbela oshike shi na okukala movelishe oyo? Edinafimaneko ile edina Jehova?

Edina laKalunga meendada dOshiheberi

Ovelishe oyo otai popi shi na sha nedina. MOshiheberi shopehovelo omo oitukulwa ihapu yOmbibeli ya li ya shangwa, movelishe oyo omwa li edina olo le likalekelwa. Ohali shangwa ngaha יהוה (YHWH) meendada dOshiheberi. MOshikwanyama edina olo ohali shangwa: “Jehova.” Mbela edina olo oli li ashike movelishe imwe yOmbibeli? Hasho. Otali holoka mOmishangwa dopehovelo dOshiheberi lwoikando 7 000 lwaapo.

Edina laKalunga ola fimana shi fike peni? Tala koshihopaenenwa sheilikano osho Jesus Kristus a yandja. Ola hovela ngaha: “Tate yetu ou u li meulu! Edina loye nali yapulwe.” (Mateus 6:9) Nale, Jesus okwa li a ilikana kuKalunga a ti: “Tate, fimanekifa edina loye.” Kalunga okwa nyamukula okudja meulu, a ti: “Ame onde li fimanekifa nale, ndele ohandi li fimanekifa vali.” (Johannes 12:28) Osha yela kutya, edina laKalunga ola fimana neenghono adishe. Ndele mbela omolwashike ovatoloki vamwe va kufa mo edina olo momatoloko avo Eembibeli noku li pingena po nomadinafimaneko?

Ope na omatomheno avali makonekwedi. Lotete, ovanhu vahapu otava ti kutya edina olo kali na okulongifwa molwaashi onghedi omo kwa li hali tumbulwa pehovelo kai shiivike kunena. Oshiheberi shonale osha li hashi shangwa shi he na oulitumbuli. Onghee hano, kunena kape na oo ta dulu okupopya noushili filufilu nghee ovanhu vopefimbo lOmbibeli va li hava tumbula YHWH. Ndelenee mbela osho oshi na oku tu imba okulongifa  edina laKalunga? Mefimbo lOmbibeli, edina Jesus otashi dulika la li hali tumbulwa Yeshua ile tashi dulika Yehoshua — ndele kape na oo e na oushili. Ndele ovanhu mounyuni aushe kunena ohava tumbula edina Jesus she likolelela komishingo domalaka avo. Ihava ongaongao okulongifa edina olo molwaashi ashike ve he shii kutya ola li hali tumbulwa ngahelipi mefelemudo lotete. Sha faafana, ngeenge owa i koshilongo shimwe, otashi dulika ovanhu va ka tumbule edina loye meenghedi di lili momalaka amwe. Onghee hano, okuhakala noushili shi na sha nokutumbulwa kwonale kwedina laKalunga hako taku yandje etomheno loku he li longifa.

Etomheno etivali olo hali yandjwa omolwokukufa mo edina laKalunga mOmbibeli, ola kwatela mo onghulunghedi yonalenale yOvajuda. Vahapu vomuvo ova itavela kutya edina laKaunga kali na nandenande okutumbulwa. Eitavelo olo osha yela kutya ole likolelela ketulomoilonga la puka lomhango yOmbibeli oyo ya ti: “Edina lOmwene Kalunga koye, ino li tumbulila ongaho, osheshi Omwene ita efa a ha handukile ou ta tumbulile edina laye hamungaho.” — Exodus 20:7.

Omhango oyo otai dilike okulongifa nai edina laKalunga. Ndele mbela otai dilike okulongifa edina laye nefimaneko? Hasho nandenande. Ovashangi vOmishangwa dOshiheberi (“Etestamendi Likulu”) aveshe ova li ovalumenhu ovadiinini ovo va li hava dulika kOmhango oyo Kalunga kwa li a pa oshiwana shonale shaIsrael. Ndelenee ova longifa edina laKalunga luhapu. Pashihopaenenwa, ove likwatela momapsalme mahapu oo kwa li haa imbwa mokule keengudu dovalongelikalunga. Jehova Kalunga okwa lombwela nokuli ovalongeli vaye va ifane edina laye, novadiinini osho va ninga. (Joel 2:32; Oilonga 2:21) Hano, Ovakriste kunena ihava ongaonga okulongifa edina laKalunga nefimaneko, ngaashi naanaa Jesus e shi ninga. — Johannes 17:26.

Mokupingena po edina laKalunga nomadinafimaneko, ovatoloki vEembibeli ova ninga epuko la kwata moiti. Ova ningifa Kalunga a kale a fa e li kokule noku he na omaukwatya opanhu, ofimbo Ombibeli tai ladipike ovanhu va kale ve na ‘eendafano naye.’ (Epsalme 25:14) Diladila shi na sha nakaume koye kopofingoelela. Oto ka dula ngahelipi okukala popepi naye ngeenge ku shii nande edina laye? Sha faafana, ngeenge ovanhu inava shiivifilwa edina laKalunga, Jehova, otava dulu ngahelipi okweehena lela popepi naye? Natango, ngeenge ovanhu ihava longifa edina laKalunga,  ihava kala yo ve shii eityo lalo likumwifi. Edina laKalunga otali ti shike?

Kalunga okwa yelifila omupiya waye omudiinini Moses eityo ledina laye. Eshi Moses kwa li a pula shi na sha nedina laKalunga, Kalunga okwa nyamukula a ti: “Ame ohandi ka kala osho handi ka kala.” (Exodus 3:14, NW) Etoloko laRotherham ola toloka eendjovo odo la ti: “Ohandi ka kala keshe osho nda hala.” Hano Jehova ota dulu okuninga keshe osho sha pumbiwa opo a wanife po omalalakano aye.

Natu tye nee ngeno oho dulu okuninga keshe osho wa hala. Ngeno oto ka ningila shike ookaume koye? Ngeenge umwe womuvo okwa ehama neenghono, oto ka dula okuninga ndokotola e na owino ndele to mu velula. Ngeenge umwe okwa kanifa eliko, oto ka dula okuninga omukwafi oshipuna ndele to kandula po oupyakadi waye. Ndele oshili oyoyo kutya owa ngabekwa mwaasho to dulu okuninga. Atusheni otwa ngabekwa. Eshi to konakona Ombibeli, oto ka kala wa kumwa okumona kutya Jehova oha ningi keshe osho sha pumbiwa opo a wanife po omaudaneko aye. Nohashi mu hafifa okulongifa eenghono daye omolwaavo ve mu hole. (2 Omafimbo 16:9) Omaukwatya mawa aJehova oo kae shiivike kwaavo ve he shii edina laye.

Doshili, edina Jehova oli na okukala mOmbibeli. Okushiiva eityo lalo noku li longifa twa manguluka melongelokalunga letu, otashi ke tu kwafela neenghono tu ehene popepi elela naTate yetu womeulu, Jehova. *

^ okat. 3 Opo u mone ouyelele muhapu shi na sha nedina laKalunga, eityo lalo nosho yo omatomheno kutya omolwashike li na okulongifwa meilikano, tala oshishangomwa The Divine Name That Will Endure Forever, sha nyanyangidwa kEendombwedi daJehova.

 

Lihonga shihapu

Mbela Kalunga oku na ngoo edina?

Kalunga oku na omadinafimaneko mahapu, ngaashi Omunaenghono adishe, Omushiti nosho yo Omwene. Ashike edina laKalunga ola holoka mOmbiibeli lwoikando i dulife po 7 000.