Nghee to dulu okuhoololola okulesha ile okuhalesha ko-sceen

Hoolola elaka

Inda kelandulafano etivali

Inda koshikalimo

Inda koshikalimo

Eendombwedi daJehova

Oshikwanyama

Ombibeli otai hongo lela shike?

OSHIWEDELWAKO

“Babilon shinene” oshike?

“Babilon shinene” oshike?

EMBO lEhololo oli na omautumbulilo mahapu opafaneko. Pashihopaenenwa, otali tumbula omukainhu a shangwa edina moshipala shaye, “Babilon shinene.” Omukainhu oo ota popiwa e li omutumba kombada ‘yoiwana neengudu dovanhu.’ (Ehololo 17:1, 5, 15) Molwaashi kape na omukainhu wolelalela ta dulu okuninga ngaho, osha yela kutya Babilon Shinene omukainhu wopafaneko. Ndele mbela ombwada oyo yopafaneko otai faneke shike?

MEhololo 17:18, omukainhu oye tuu oo wopafaneko ota hokololwa e li “oshilando shinene shi nepangelo kombada yeehamba adishe dopedu.” Oshitya “oshilando” otashi ulike kutya omukainhu oo wopafaneko oku li ongudu yovanhu va unganekwa. Molwaashi ‘oshilando osho shinene’ otashi pangele ‘eehamba  adishe dopedu,’ omukainhu oo wedina Babilon Shinene oku li ehangano lomounyuni aushe olo li na enwefemo linene. Oshilando osho osha yeleka okwiifanwa ouhamba womounyuni aushe. Mbela ouhamba woludi lilipi? Ouhamba wopalongelokalunga. Didilika nghee eevelishe dikwao odo di li membo lEhololo, odo tadi popi shi na sha nomukainhu oo, tadi tu kwafele tu fike pexulifodiladilo olo.

Ouhamba otau dulu okukala wopapolotika, wopangeshefa ile wopalongelokalunga. Omukainhu wedina Babilon Shinene ke fi ouhamba wopapolotika molwaashi Eendjovo daKalunga otadi ti kutya “eehamba dopedu,” ile omahangano opapolotika ounyuni ou okwa “haela” naye. Oluhaelo laye otali ulike koukaume oo a panga novapangeli vokedu notali yelifa kutya omolwashike ta ifanwa ‘ombwada inene.’ — Ehololo 17:1, 2; Jakob 4:4.

Babilon Shinene itashi dulu okukala ouhamba wopangeshefa molwaashi ‘ovashingifi voipindi yokombada yedu,’ otava faneke eengeshefa, odo tadi ke shi nyikila oluhodi pokuhanaunwa po kwasho. Doshili, eehamba novashingifi otava hokololwa tava tale Babilon Shinene ve li “ofika kokule.” (Ehololo 18:3, 9, 10, 15-17) Onghee hano, oshi li pandunge okufika pexulifodiladilo kutya Babilon Shinene kashi fi ouhamba wopapolotika ile wopangeshefa, ndele owopalongelokalunga.

Oushili oo kutya Babilon Shinene oshi li ouhamba wopalongelokalunga otau kolekwa kepopyo olo kutya ohashi hongaula oiwana aishe ‘noupule’ washo. (Ehololo 18:23) Molwaashi omaludi aeshe oumhulile oku na ekwatafano nomalongelokalunga nokwa nwefwa mo keendemoni, itashi kumwifa eshi Ombibeli tai ti kutya Babilon Shinene oshi li “onhele yokukala eendemoni.” (Ehololo 18:2; Deuteronomion 18:10-12) Ouhamba oo otau hokololwa yo kutya ou li omhinge filufilu nelongelokalunga lashili, tau hepeke ‘ovaprofeti’ nosho yo ‘ovayapuki.’ (Ehololo 18:24) Molwaashi Babilon Shinene oshi na outondwe munene wokutonda elongelokalunga lashili wa tya ngaho, ohashi hepeke nonyanya ‘eendombwedi daJesus,’ noku di dipaa nokuli. (Ehololo 17:6) Onghee hano, osha yela kutya omukainhu oo ta ifanwa Babilon Shinene ota faneke ouhamba wounyuni womalongelokalunga oipupulu, oo wa kwatela mo omalongelokalunga aeshe oo e li omhinge naJehova Kalunga.